Odisha Janamata : ହତ୍ୟା କରି ଶବ ପୋତି ଦେବା ଘଟଣା ରେ , ଗଳିତ ଶବକୁ ଉଦ୍ଧାର କଲା ପୋଲିସ |

ହତ୍ୟା କରି ଶବ ପୋତି ଦେବା ଘଟଣା ରେ , ଗଳିତ ଶବକୁ ଉଦ୍ଧାର କଲା ପୋଲିସ |

18-May-2026

ହତ୍ୟା କରି ଶବ ପୋତିଦେଲେ, ପୋଲିସ ଉଦ୍ଧାର କଲା ଗଳିତ ମୃତଦେହ,

ଓଡିଶା ଜନମତ ରାୟଗଡା, ୧୮/୦୫,

କାମେଶ୍ୱର କରକରିଆ : ------

ପୂର୍ବ ଶତ୍ରୁତାକୁ କେନ୍ଦ୍ର କରି ରାୟଗଡ଼ା ଜିଲ୍ଲା କୋଲନରା ବ୍ଲକ ତୋଟାଗୁଡା ଗ୍ରାମରେ ଘଟିଛି ଏକ ଚଞ୍ଚଲ୍ୟକର ହତ୍ୟାକାଣ୍ଡ। ଜଣେ ବୃଦ୍ଧଙ୍କୁ ପଥରରେ ଛେଚି ହତ୍ୟା କରିବା ପରେ ମୃତଦେହକୁ ପାହାଡ଼ ଅଞ୍ଚଳରେ ପୋତି ଦେଇଥିବା ଅଭିଯୋଗ ହୋଇଛି। ପୋଲିସ ପୋତିଥିବା ସ୍ଥାନ ଖୋଳି ଗଳିତ ମୃତଦେହ ଉଦ୍ଧାର କରିଥିବା ବେଳେ ଘଟଣାରେ ଜଡିତ ଦୁଇ ଅଭିଯୁକ୍ତଙ୍କୁ ଗିରଫ କରିଛି।ମୃତ ବୃଦ୍ଧ ଜଣକ ହେଲେ ତୋଟାଗୁଡା ଗ୍ରାମର କାଳିଆ ମାଣ୍ଡାଙ୍ଗି। ଅଭିଯୋଗ ଅନୁସାରେ, ପୂର୍ବ ଶତ୍ରୁତାକୁ ନେଇ ଗାଁର ଦୁଇ ଭାଇ ମିଥୁନ କାଲକା ଓ ଚିନାରାଓ କାଲକା କାଳିଆଙ୍କୁ ପଥରରେ ଛେଚି ହତ୍ୟା କରିଥିଲେ। ପରେ ପ୍ରମାଣ ନଷ୍ଟ କରିବା ଉଦ୍ଦେଶ୍ୟରେ ଗାଁ ନିକଟସ୍ଥ ପାହାଡ଼ ଅଞ୍ଚଳରେ ମୃତଦେହକୁ ପୋତି ଦେଇଥିଲେ।ଏନେଇ ମୃତକଙ୍କ ପୁଅ ବିଦ୍ୟାରାଓ ମାଣ୍ଡାଙ୍ଗି ଚାନ୍ଦିଲି ଥାନାରେ ଅଭିଯୋଗ କରିବା ପରେ ପୋଲିସ ତଦନ୍ତ ଆରମ୍ଭ କରିଥିଲା। କୋଲନରା ଅତିରିକ୍ତ ତହସିଲଦାରଙ୍କ ଉପସ୍ଥିତିରେ ମାଜିଷ୍ଟ୍ରେଟ ତଦନ୍ତ କରାଯାଇ ପୋତିଥିବା ସ୍ଥାନ ଖୋଳି ଗଳିତ ମୃତଦେହ ଉଦ୍ଧାର କରାଯାଇଥିଲା।ପରେ ରାୟଗଡା ଜିଲ୍ଲା ଡାକ୍ତରୀ ଟିମ୍‌ର ସହାୟତାରେ ଘଟଣାସ୍ଥଳରେ ହିଁ ଶବ ବ୍ୟବଚ୍ଛେଦ କରାଯାଇଥିଲା। ଶବ ବ୍ୟବଚ୍ଛେଦ ପରେ ମୃତଦେହକୁ ପରିବାର ଲୋକଙ୍କୁ ହସ୍ତାନ୍ତର କରାଯାଇଛି।ଘଟଣାରେ ସମ୍ପୃକ୍ତ ଥିବା ଅଭିଯୋଗରେ ଚାନ୍ଦିଲି ପୋଲିସ ଦୁଇ ଅଭିଯୁକ୍ତ ମିଥୁନ କାଲକା ଓ ଚିନାରାଓ କାଲକାଙ୍କୁ ଗିରଫ କରି ଅଧିକ ତଦନ୍ତ ଚଳାଇଛି।