Odisha Janamata : ନିୟମ ଗିରୀ ଗ୍ରସ୍ତରେ ସିଡିଓ, ପିଏମ ଜନମନ ଘର କାମ ଜୁନ 30 ସୁଦ୍ଧା ସରେଇବାକୁ ନିର୍ଦେଶ |

ନିୟମ ଗିରୀ ଗ୍ରସ୍ତରେ ସିଡିଓ, ପିଏମ ଜନମନ ଘର କାମ ଜୁନ 30 ସୁଦ୍ଧା ସରେଇବାକୁ ନିର୍ଦେଶ |

20-May-2026

ନିୟମଗିରି ଗସ୍ତରେ ସିଡିଓ, ପିଏମ ଜନମନ ଘର କାମ ଜୁନ୍ ୩୦ ସୁଧା ସରାଇବାକୁ ନିର୍ଦ୍ଦେଶ
ଓଡିଶା ଜନମତ ରାୟଗଡା, ୨୦/୦୫,

କାମେଶ୍ୱର କରକରିଆ :---

ରାୟଗଡ଼ ଜିଲ୍ଲାର ନିୟମଗିରି ଅଞ୍ଚଳକୁ ଆଜି ଜିଲ୍ଲା ମୁଖ୍ୟ ଉନ୍ନୟନ ଅଧିକାରୀ (ସିଡିଓ) ଶ୍ରୀ ଅକ୍ଷୟ କୁମାର ଖେମୁଣ୍ଡୁ ଗସ୍ତ କରି ପିଏମ ଜନମନ ଯୋଜନାର ଅଗ୍ରଗତି ସମୀକ୍ଷା କରିଛନ୍ତି। ପ୍ରଥମେ ସେ କଲ୍ୟାଣସିଂହପୁର ବ୍ଲକର ପାର୍ଶାଲି ପଞ୍ଚାୟତରେ ପହଞ୍ଚି ବ୍ଲକ ପ୍ରଶାସନ ଓ ଗୋଷ୍ଠୀ ଉନ୍ନୟନ ଅଧିକାରୀଙ୍କ ସହ ଆଲୋଚନା କରିଥିଲେ। ଆଗାମୀ ଜୁନ୍ ୩୦ ସୁଧା ସମସ୍ତ ପିଏମ ଜନମନ ଘର କାର୍ଯ୍ୟ ସମାପନ ପାଇଁ ବିସ୍ତୃତ ଖସଡା ପ୍ରସ୍ତୁତ କରି ତତ୍ପରତାର ସହ କାମ କରିବାକୁ ସେ ନିର୍ଦ୍ଦେଶ ଦେଇଥିଲେ।ପରେ ସିଡିଓ ଓ ଅନ୍ୟାନ୍ୟ ଅଧିକାରୀମାନେ ବାଙ୍ଗାପଡ଼ି ଗ୍ରାମକୁ ଯାଇ ସେଠାର ପରିସ୍ଥିତି ପରଖିଥିଲେ। ଅଧା ବାଟ ଗାଡ଼ିରେ ଯାଇବା ପରେ ଚାଲି ଚାଲି ଗ୍ରାମରେ ପହଞ୍ଚି ପିଭିଟିଜି ପରିବାରମାନଙ୍କୁ ସରକାରୀ ସୁବିଧା ଯଥା ପିଇବା ପାଣି, ସ୍ୱାସ୍ଥ୍ୟ ସେବା, ଅଙ୍ଗନୱାଡ଼ି ଖାଦ୍ୟ ଓ ରାସନ୍ ସଠିକ ଭାବେ ମିଳୁଛି କି ନାହିଁ ସେ ସମ୍ପର୍କରେ ସବିଶେଷ ତଥ୍ୟ ନେଇଥିଲେ। ବର୍ଷା ଋତୁ ଆସୁଥିବାରୁ ରାସ୍ତା ସମସ୍ୟା ଗୃହ ନିର୍ମାଣ କାମରେ ବାଧା ସୃଷ୍ଟି କରିପାରେ ବୋଲି ଉଲ୍ଲେଖ କରି ଲାଭାନ୍ୱିତମାନଙ୍କ ଘର କାମ ଶୀଘ୍ର ସରାଇବାକୁ ବ୍ଲକ ପ୍ରଶାସନକୁ ତତ୍ପର ହେବାକୁ କହିଥିଲେ। ଏହାପରେ ସିଡିଓ ନିଶିଖାଲ ଭଳି ଦୁର୍ଗମ ଅଞ୍ଚଳକୁ ମଧ୍ୟ ଗସ୍ତ କରିଥିଲେ। ନିର୍ଗୁଣ୍ଡିରୁ ନିଶିଖାଲ ପର୍ଯ୍ୟନ୍ତ ରାସ୍ତାର ସ୍ଥିତି ଅନୁଧ୍ୟାନ କରି ଗ୍ରାମ୍ୟ ଉନ୍ନୟନ ବିଭାଗକୁ ରାସ୍ତାକୁ ଆହୁରି ସୁଗମ କରିବାକୁ ନିର୍ଦ୍ଦେଶ ଦେଇଥିଲେ। ଏହା ଦ୍ୱାରା ଅମ୍ବଦାନି ଗ୍ରାମକୁ ଗୃହ ନିର୍ମାଣ ସାମଗ୍ରୀ ପହଞ୍ଚାଇବାରେ ସୁବିଧା ହେବ ବୋଲି ସେ କହିଥିଲେ।ସୂଚନା ଅନୁଯାୟୀ, ରାୟଗଡ଼ ଜିଲ୍ଲାରେ ପିଏମ ଜନମନ ଯୋଜନାରେ ମୋଟ ୭୭୦୧ଟି ଘର ମଞ୍ଜୁର ହୋଇଥିବା ବେଳେ ଏପର୍ଯ୍ୟନ୍ତ ୬୬୫୮ଟି ଘର କାମ ସମ୍ପୂର୍ଣ୍ଣ ହୋଇଛି, ଯାହା ଶତକଡା ୮୬ ପ୍ରତିଶତ। ଅବଶିଷ୍ଟ ୧୪ ପ୍ରତିଶତ କାମ ଶୀଘ୍ର ସମାପନ ପାଇଁ ଜିଲ୍ଲା ପ୍ରଶାସନ ଓ ସମସ୍ତ ବ୍ଲକ ପ୍ରଶାସନ ତତ୍ପର ହୋଇଥିବା ଜଣାପଡ଼ିଛି।
ଏହି ଗସ୍ତ ସମୟରେ କଲ୍ୟାଣସିଂହପୁର ବିଡିଓ, ନିର୍ବାହୀ ଯନ୍ତ୍ରୀ, ଗ୍ରାମୀଣ ଗୃହ ବିଭାଗର ପ୍ରୋଗ୍ରାମ ମ୍ୟାନେଜର, ଜିଲ୍ଲା ପରିଷଦ ଅଧିକାରୀ, ସ୍ଥାନୀୟ ସରପଞ୍ଚ, ସମିତି ସଭ୍ୟ, କନିଷ୍ଠ ଯନ୍ତ୍ରୀ, ପିଇଓ, ଜିଆରଏସ ସହ ଗ୍ରାମ୍ୟ ଉନ୍ନୟନ ବିଭାଗର ଅନ୍ୟାନ୍ୟ ଅଧିକାରୀମାନେ ଉପସ୍ଥିତ ଥିଲେ।