Odisha Janamata : କଲଭର୍ଟ କାମରେ ଅନିୟମିତତା ନେଇ ଅଞ୍ଚଳ ବାସି ତଦନ୍ତ ଦାବିକଳେ |

କଲଭର୍ଟ କାମରେ ଅନିୟମିତତା ନେଇ ଅଞ୍ଚଳ ବାସି ତଦନ୍ତ ଦାବିକଳେ |

27-May-2026

କଲଭର୍ଟ କାମରେ ଅନିୟମିତତା, ତଦନ୍ତ ଦାବି କଲେ ଅଞ୍ଚଳବାସୀ,

ଓଡିଶା ଜନମତ | ରାୟଗଡା, ୨୬/୦୫,

କାମେଶ୍ୱର କରକରିଆ,

ରାୟଗଡ଼ା ଜିଲ୍ଲା କଲ୍ୟାଣସିଂହପୁର ବ୍ଲକର ବିଭିନ୍ନ ପଞ୍ଚାୟତରେ ଚାଲିଥିବା ଗ୍ରାମ୍ୟ ଉନ୍ନୟନ (ଆରଡି) ବିଭାଗର ରାସ୍ତା ଓ କଲଭର୍ଟ ନିର୍ମାଣ କାର୍ଯ୍ୟରେ ବ୍ୟାପକ ଅନିୟମିତତା ହେଉଥିବା ଅଭିଯୋଗ ଉଠିଛି। ବିଶେଷ କରି ପାର୍ସାଲି ପଞ୍ଚାୟତରେ ନିମ୍ନମାନର କାମ ହେଉଥିବାରୁ ଅଞ୍ଚଳବାସୀଙ୍କ ମଧ୍ୟରେ ଅସନ୍ତୋଷ ତୀବ୍ର ହୋଇଛି। ଏହାର ଉଚ୍ଚସ୍ତରୀୟ ତଦନ୍ତ ପାଇଁ ସ୍ଥାନୀୟ ଲୋକେ ଦାବି କରିଛନ୍ତି।ସୂଚନା ଅନୁଯାୟୀ, ପାର୍ସାଲି ପଞ୍ଚାୟତର ଚାଟିକଣାରୁ କୃଷମୁହିଁକୁ ସଂଯୋଗ କରୁଥିବା ୩ କିଲୋମିଟରରୁ ଅଧିକ ରାସ୍ତାରେ ୪ଟି କଲଭର୍ଟ ନିର୍ମାଣ କାମ ଚାଲିଛି। ତେବେ ସରକାରୀ ଗାଇଡଲାଇନକୁ ଅଣଦେଖା କରି ମେଟାଲ ଓ କଂକ୍ରିଟ ବେଡ୍ ନକରି ସିଧାସଳଖ ମାଟି ଉପରେ ପାଇପ୍ ପକାଯାଉଥିବା ଅଭିଯୋଗ ହୋଇଛି। କାମକୁ ତଡ଼ଘଡ଼ିରେ ସାରିବା ପାଇଁ ଠିକାଦାର ଏଭଳି କରୁଥିବା କୁହାଯାଉଛି।ଅଞ୍ଚଳବାସୀଙ୍କ କହିବା ଅନୁସାରେ, କଂକ୍ରିଟ ବେଡ୍ ବିନା ନିର୍ମାଣ ହେଉଥିବାରୁ ଆଗାମୀ ଦିନରେ କଲଭର୍ଟ ଦବିଯିବା ସହ ବଡ଼ ଧରଣର ଦୁର୍ଘଟଣା ଘଟିବାର ଆଶଙ୍କା ରହିଛି। ସେଥିପାଇଁ ସମ୍ପୃକ୍ତ ଠିକାଦାରଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ସହ ପୂର୍ବରୁ ପକାଯାଇଥିବା ପାଇପ୍ ବାହାର କରି ପୁନର୍ବାର ନିୟମାନୁଯାୟୀ କଂକ୍ରିଟ କାମ କରାଯାଉ ବୋଲି ଦାବି ହେଉଛି। ଏନେଇ ଆରଡି ବିଭାଗର ଯନ୍ତ୍ରୀ ରମେଶ ନାଏକଙ୍କୁ ପଚାରିବାରୁ ସେ କହିଛନ୍ତି ଯେ, ଘଟଣାର ଯାଞ୍ଚ କରାଯିବ ଏବଂ କାର୍ଯ୍ୟରେ ତ୍ରୁଟି ମିଳିଲେ ଆବଶ୍ୟକୀୟ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।