Odisha Janamata : ଆମ୍ବୁଲାନ୍ସ ସେବା ନ ମିଳିବାରୁ ଯୁବକଙ୍କ ମୃତ୍ୟୁ ଅଭିଯୋଗ |

ଆମ୍ବୁଲାନ୍ସ ସେବା ନ ମିଳିବାରୁ ଯୁବକଙ୍କ ମୃତ୍ୟୁ ଅଭିଯୋଗ |

05-Jun-2026

ଆମ୍ବୁଲାନ୍ସ ସେବା ନ ମିଳିବାରୁ ଯୁବକଙ୍କ ମୃତ୍ୟୁ ଅଭିଯୋଗ
ଭଡ଼ା ଗାଡ଼ିରେ ବ୍ରହ୍ମପୁର ନେଉଥିବା ବେଳେ ଅଧା ରାସ୍ତାରେ ଚାଲିଗଲା ଜୀବନ,
ଓଡିଶା ଜନମତ, ରାୟଗଡା , ୦୫/୦୬,

କାମେଶ୍ୱର କରକରି:-------

ଠିକ ସମୟରେ ଆମ୍ବୁଲାନ୍ସ ସେବା ନ ମିଳିବାରୁ ଜଣେ ଦୁର୍ଘଟଣାଗ୍ରସ୍ତ ଯୁବକଙ୍କ ମୃତ୍ୟୁ ଘଟିଥିବା ନେଇ ପରିବାର ପକ୍ଷରୁ ଗୁରୁତର ଅଭିଯୋଗ ହୋଇଛି। ଏହି ଘଟଣା ସ୍ୱାସ୍ଥ୍ୟ ସେବା ଓ ଆପତ୍କାଳୀନ ଚିକିତ୍ସା ବ୍ୟବସ୍ଥାକୁ ନେଇ ପୁଣିଥରେ ପ୍ରଶ୍ନ ଉଠାଇଛି। ମୃତ ଯୁବକ ହେଲେ ରାୟଗଡ଼ା ଜିଲ୍ଲା କଲ୍ୟାଣସିଂହପୁର ବ୍ଲକ ସେରିଗୁମା ପଞ୍ଚାୟତ ଭାଲୁମାସ୍କା ଗାଁର କାସ୍ତୁ ପ୍ରାସ୍କାଙ୍କ ପୁଅ ଅରୁଣ ପ୍ରାସ୍କା (୨୩)। ସୂଚନା ଅନୁଯାୟୀ, ଗତ ଗୁରୁବାର ସନ୍ଧ୍ୟାରେ ଅରୁଣ ଜଣେ ସାଙ୍ଗଙ୍କ ଜନ୍ମଦିନ ପାଳନ କରିବା ପାଇଁ ରାୟଗଡ଼ା ଅଭିମୁଖେ ଏକ ବାଇକ ଯୋଗେ ଯାଉଥିବା ବେଳେ ଆର.କେ ନଗର ପରିସରରେ ଦୁର୍ଘଟଣାର ଶିକାର ହୋଇଥିଲେ। ଗୁରୁତର ଆହତ ଅବସ୍ଥାରେ ତାଙ୍କୁ ରାୟଗଡ଼ା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଥିଲା। ସେଠାରେ ଚିକିତ୍ସା ପରେ ଅବସ୍ଥା ସଙ୍କଟାପନ୍ନ ଥିବାରୁ ଡାକ୍ତର ତାଙ୍କୁ ଉନ୍ନତ ଚିକିତ୍ସା ପାଇଁ ବ୍ରହ୍ମପୁର ମେଡିକାଲକୁ ରେଫର କରିଥିଲେ। ମାତ୍ର ସେହି ସମୟରେ ଆମ୍ବୁଲାନ୍ସ ଉପଲବ୍ଧ ନଥିବାରୁ ପରିବାର ଲୋକେ ବାଧ୍ୟ ହୋଇ ଏକ ଭଡ଼ା ଗାଡ଼ି ଯୋଗେ ତାଙ୍କୁ ବ୍ରହ୍ମପୁର ନେଉଥିଲେ। କିନ୍ତୁ ଦୁର୍ଭାଗ୍ୟବଶତଃ ଅଧା ରାସ୍ତାରେ ହିଁ ଅରୁଣଙ୍କ ମୃତ୍ୟୁ ଘଟିଥିଲା। ଏହି ଘଟଣା ପରେ ପରିବାର ପକ୍ଷରୁ ଆମ୍ବୁଲାନ୍ସ ସେବାର ଅଭାବକୁ ନେଇ ତୀବ୍ର କ୍ଷୋଭ ପ୍ରକାଶ କରାଯାଇଛି। ସମୟରେ ଆମ୍ବୁଲାନ୍ସ ମିଳିଥାନ୍ତା ହେଲେ ଅରୁଣଙ୍କ ଜୀବନ ବଞ୍ଚି ପାରିଥାନ୍ତା ବୋଲି ପରିବାର ଅଭିଯୋଗ କରିଛନ୍ତି। ଘଟଣା ସମ୍ପର୍କରେ ଖବର ପାଇ ରାୟଗଡ଼ା ପୁଲିସ ପହଞ୍ଚି ଶବ ଜବତ କରି ଏକ ଏକ କେଶ ଫାଇଲ କରି ଅଧିକ ତଦନ୍ତ ଆରମ୍ବ କରୁଛି ଓ ବ୍ୟବଚ୍ଛେଦ ପରେ ମୃତଦେହ ପରିବାର ଲୋକଙ୍କୁ ହସ୍ତାନ୍ତର କରିଛି । ଏହି ଘଟଣା ପରେ ଅଞ୍ଚଳରେ ଶୋକର ଛାୟା ଖେଳିଛି।

ପାଣି ପାଇଁ ଗ୍ରାମବାସୀଙ୍କ ରାସ୍ତା ରୋକ | କୋରାପୁଟ ରାୟଗଡା ଯାତାୟତ ଠପ ||

ପରିବେଶ ଦିବସ ଉପଲକ୍ଷେ ସିଂହପୁର ସରପଞ୍ଚଙ୍କ ସଚେତନତା ବାର୍ତ୍ତା |