Odisha Janamata : ବାଘଚ୍ଛାଲ ବିକ୍ରି କରୁଥିବା ବେଳେ ବନବିଭାଗର ଚଢ଼ାଉ ବାଘଚ୍ଛାଲ ସହ ଆଠ ଜଣ ଗିରଫ |

ବାଘଚ୍ଛାଲ ବିକ୍ରି କରୁଥିବା ବେଳେ ବନବିଭାଗର ଚଢ଼ାଉ ବାଘଚ୍ଛାଲ ସହ ଆଠ ଜଣ ଗିରଫ |

06-Jun-2026

କଲରାପତରିଆ ବାଘ ଛାଲ ଜବତ : ୮ ଜଣ ଗିରଫ, ବନ ବିଭାଗର ବଡ଼ ସଫଳତା
ଓଡିଶା ଜନମତ,ରାୟଗଡ଼ା, ୬/୬:

କାମେଶ୍ୱର କରକରିଆ :-----

ରାୟଗଡ଼ା ଜିଲ୍ଲା କଲ୍ୟାଣସିଂହପୁର ରେଞ୍ଜ ଅଧୀନସ୍ଥ ରିଭଲକଣା ଛକରେ ଚାଲିଥିବା ଏକ ବେଆଇନ କଲରାପତରିଆ ବାଘ ଛାଲ କିଣାବିକା ଚକ୍ର ଉପରେ ବନ ବିଭାଗ ବଡ଼ ଧରଣର ଚଢ଼ାଉ କରି ସଫଳତା ହାସଲ କରିଛି। ଚଢ଼ାଉ ସମୟରେ ଗୋଟିଏ କଲରାପତରିଆ ବାଘ ଛାଲ ଜବତ ହୋଇଥିବା ବେଳେ ଏହି ଘଟଣାରେ ସଂପୃକ୍ତ ୮ ଜଣଙ୍କୁ ଗିରଫ କରାଯାଇଛି। ସେମାନଙ୍କ ନିକଟରୁ ଏକ ମୋଟରସାଇକେଲ ଓ କିଛି ମୋବାଇଲ ଫୋନ ମଧ୍ୟ ଜବତ କରାଯାଇଛି। ଗିରଫ ହୋଇଥିବା ଅଭିଯୁକ୍ତଙ୍କ ମଧ୍ୟରୁ ୩ ଜଣ କଳାହାଣ୍ଡି ଜିଲ୍ଲାର ହୋଇଥିବା ବେଳେ ୫ ଜଣ ରାୟଗଡ଼ା ଜିଲ୍ଲାର ବୋଲି ଜଣାପଡ଼ିଛି। କଳାହାଣ୍ଡି ଜିଲ୍ଲାର ଜିତେନ୍ଦ୍ର ବେନିଆ, ଇ.ଜେ. ରାଓ ସାହୁ ଓ ମୁନୁଗା ମାଝିଙ୍କ ସହ ରାୟଗଡ଼ା ଜିଲ୍ଲାର ଭରତ ନାଚିକା, ସୀମାଦ୍ରି ତାଡ଼ିଙ୍ଗି, କୈଳାସ ଜାନି, ପ୍ରଶାନ୍ତ କାଡ୍ରାକା ଏବଂ ଧର୍ମ ପାତିକାଙ୍କୁ ବନ ବିଭାଗ ଗିରଫ କରିଛି। କଲ୍ୟାଣସିଂହପୁର ରେଞ୍ଜର ସଚ୍ଚିଦାନନ୍ଦ ପରିଡ଼ାଙ୍କ ସୂଚନା ଅନୁଯାୟୀ, ଦୁଇ ଦିନ ପୂର୍ବରୁ ଏହି ବେଆଇନ କାରବାର ସମ୍ପର୍କରେ ବନ ବିଭାଗକୁ ଗୁପ୍ତ ସୂଚନା ମିଳିଥିଲା। ଏହାପରେ ରାୟଗଡ଼ା ଡିଏଫଓ ସଚିନ ଆନ୍ନାସାହେବ ଓହୋଲଙ୍କ ପ୍ରତ୍ୟକ୍ଷ ନେତୃତ୍ୱରେ କଲ୍ୟାଣସିଂହପୁର ଓ ରାୟଗଡ଼ା ରେଞ୍ଜର ମିଳିତ ଟିମ୍ ଯୋଜନାବଦ୍ଧ ଭାବେ ଟ୍ରାପ୍ ବିଛାଇ ଚଢ଼ାଉ କରିଥିଲେ। ଅଭିଯୁକ୍ତମାନଙ୍କ ଚିହ୍ନଟ ଓ ଗିରଫ ପ୍ରକ୍ରିୟାରେ କଳାହାଣ୍ଡି ବନ ବିଭାଗର ସହଯୋଗ ମଧ୍ୟ ଗୁରୁତ୍ୱପୂର୍ଣ୍ଣ ରହିଥିଲା।ପ୍ରାଥମିକ ତଦନ୍ତରୁ ଜଣାପଡ଼ିଛି ଯେ, ପ୍ରାୟ ୨ରୁ ୪ ମାସ ପୂର୍ବେ କଳାହାଣ୍ଡି ଜିଲ୍ଲା ଭବାନୀପାଟଣା ନିକଟସ୍ଥ ଜଙ୍ଗଲ ଅଞ୍ଚଳରେ ଏହି କଲରାପତରିଆ ବାଘର ଶିକାର କରାଯାଇଥିଲା। ଶିକାର ସହ ସଂପୃକ୍ତ ଜଣେ ଅଭିଯୁକ୍ତଙ୍କୁ କଳାହାଣ୍ଡି ବନ ବିଭାଗ ପୂର୍ବରୁ ଗିରଫ କରିଥିବା ସୂଚନା ମିଳିଛି। କଲ୍ୟାଣସିଂହପୁର ବ୍ଲକ ଓ କଳାହାଣ୍ଡି ଜିଲ୍ଲାର ସୀମା ସଂଲଗ୍ନ ଅଞ୍ଚଳ ହୋଇଥିବାରୁ ବେପାରୀମାନେ ଏହି ରୁଟ୍ ବ୍ୟବହାର କରି ରିଭଲକଣା ଛକକୁ ଡିଲ୍ ପାଇଁ ଆସିଥିବା ତଦନ୍ତରୁ ଜଣାପଡ଼ିଛି। ଘଟଣାର ଅଧିକ ତଦନ୍ତ ଜାରି ରହିଥିବା ବେଳେ ବନ୍ୟଜନ୍ତୁ ଚୋରାଚାଲାଣ ରୋକିବା ଦିଗରେ ଏହା ବନ ବିଭାଗର ଏକ ବଡ଼ ସଫଳତା ବୋଲି କୁହାଯାଉଛି।

ବିଶ୍ୱ ପରିବେଶ ଦିବସରେ ରାୟଗଡା ପୈର ପରିଷଦ ର ଅଭିନଵ ପଦକ୍ଷେପ |

ବାଲିଗୁଡା ଆଇ ଟି ଡି ଏ ସରକାରୀ ନିର୍ବାହୀ ଯନ୍ତ୍ରୀଙ୍କ ଘରେ ଭିଜିଲାନ୍ସ ରେଡ଼ ||