Odisha Janamata : ନାଗା ବଳୀ ନଦୀରୁ ଅଜଣା ଯୁବକଙ୍କ ମୃତ ଦେହ ଉଦ୍ଧାର ||

ନାଗା ବଳୀ ନଦୀରୁ ଅଜଣା ଯୁବକଙ୍କ ମୃତ ଦେହ ଉଦ୍ଧାର ||

03-Aug-2026

ନାଗାବଳୀ ନଦୀରୁ ଅଜଣା ଯୁବକଙ୍କ ମୃତଦେହ ଉଦ୍ଧାର; ୭୨ ଘଣ୍ଟା ପାଇଁ ଶବଗୃହରେ ସଂରକ୍ଷିତ, ତଦନ୍ତରେ ଶେଷଖାଲ ପୋଲିସ

ଗୁରୁରାଜଗୁଡ଼ା ନିକଟରେ ଭାସୁଥିବା ଅବସ୍ଥାରେ ମିଳିଲା ମୃତଦେହ; ପରିଚୟ ଅସ୍ପଷ୍ଟ, ମୃତ୍ୟୁ ୨ - ୩ ଦିନ ପୂର୍ବରୁ ଘଟିଥିବା ସନ୍ଦେହ

ଓଡିଶା ଜନମତ ରାୟଗଡ଼ା, ୩/୮,

କାମେଶ୍ୱର କରକରିଆ :-----

ରାୟଗଡ଼ା ବ୍ଲକ୍ ଅନ୍ତର୍ଗତ ଶେଷଖାଲ ଥାନା ଅଧୀନ ଗୁରୁରାଜଗୁଡ଼ା ନିକଟସ୍ଥ ନାଗାବଳୀ ନଦୀରୁ ସୋମବାର ଜଣେ ଅଜଣା ଯୁବକଙ୍କ ମୃତଦେହ ଉଦ୍ଧାର ହୋଇଥିବା ଘଟଣା ସ୍ଥାନୀୟ ଅଞ୍ଚଳରେ ଚାଞ୍ଚଲ୍ୟ ସୃଷ୍ଟି କରିଛି। ମୃତକଙ୍କ ବୟସ ଆନୁମାନିକ ୨୦ରୁ ୨୫ ବର୍ଷ ହେବ ବୋଲି ପୋଲିସ ପକ୍ଷରୁ ଅନୁମାନ କରାଯାଉଛି। ସୂଚନା ଅନୁସାରେ, ସକାଳ ପ୍ରାୟ ୯ଟା ସମୟରେ ସ୍ଥାନୀୟ ଲୋକେ ନାଗାବଳୀ ନଦୀରେ ଏକ ମୃତଦେହ ଭାସୁଥିବା ଦେଖି ଶେଷଖାଲ ଥାନା ପୋଲିସକୁ ଖବର ଦେଇଥିଲେ। ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚି ଅଗ୍ନିଶମ ବାହିନୀ, ଡିଏଫ୍‌ଏସ୍‌ଏଲ୍ (DFSL) ସାଇଣ୍ଟିଫିକ୍ ଟିମ୍ ଏବଂ ଏଜିକ୍ୟୁଟିଭ୍ ମାଜିଷ୍ଟ୍ରେଟ୍‌ଙ୍କ ଉପସ୍ଥିତିରେ ମୃତଦେହକୁ ନଦୀରୁ ଉଦ୍ଧାର କରି ପଞ୍ଚନାମା କାର୍ଯ୍ୟ ଶେଷ କରିଥିଲେ। ପୋଲିସ ସୂଚନା ଅନୁଯାୟୀ, ମୃତଦେହଟି ସମ୍ପୂର୍ଣ୍ଣ ଫୁଲିଯାଇଥିବାରୁ ମୁହଁ ଚିହ୍ନଟ କରିବା ସମ୍ଭବ ହୋଇନାହିଁ। ପ୍ରାଥମିକ ଅନୁମାନ ଅନୁସାରେ, ଯୁବକଙ୍କ ମୃତ୍ୟୁ ପ୍ରାୟ ୨ରୁ ୩ ଦିନ ପୂର୍ବରୁ ଘଟିଥିବା ସନ୍ଦେହ କରାଯାଉଛି। ପରିଚୟ ଜାଣିବା ପାଇଁ ମୃତଦେହକୁ ୭୨ ଘଣ୍ଟା ପର୍ଯ୍ୟନ୍ତ ଶବଗୃହରେ ସୁରକ୍ଷିତ ଭାବେ ସଂରକ୍ଷଣ କରାଯାଇଛି। ମୃତ୍ୟୁର ପ୍ରକୃତ କାରଣ ସମ୍ପର୍କରେ ପୋଲିସ ପକ୍ଷରୁ କୌଣସି ସ୍ପଷ୍ଟ ସୂଚନା ମିଳିନଥିବା ବେଳେ, ଘଟଣାକୁ ନେଇ ଶେଷଖାଲ ଥାନା ପୋଲିସ ବିଭିନ୍ନ ଦିଗରୁ ତଦନ୍ତ ଜାରି ରଖିଛି। ମୃତକଙ୍କ ପରିଚୟ ମିଳିବା ପରେ ଘଟଣାର ଅଧିକ ସତ୍ୟତା ସାମ୍ନାକୁ ଆସିବ ବୋଲି ପୋଲିସ ଆଶା ପ୍ରକାଶ କରିଛି।