Odisha Janamata : ଦେବଗିରି ପଞ୍ଚମୁଖେଶ୍ଵର ଶୈବ ପୀଠରେ ହଜାର, ହଜାର କାଉ ଡିଆ ଙ୍କ ସମାଗମ |

ଦେବଗିରି ପଞ୍ଚମୁଖେଶ୍ଵର ଶୈବ ପୀଠରେ ହଜାର, ହଜାର କାଉ ଡିଆ ଙ୍କ ସମାଗମ |

03-Aug-2026

ଶ୍ରାବଣର ପ୍ରଥମ ସୋମବାରରେ ଦେବଗିରି ପଞ୍ଚମୁଖେଶ୍ୱର ଶୈବପୀଠରେ ହଜାର ହଜାର ଭକ୍ତଙ୍କ ସମାଗମ

ଓଡିଶା ଜନମତ ରାୟଗଡା , ୦୩/୦୮,

କାମେଶ୍ୱର କରକରିଆ : -----

ରାୟଗଡା ଜିଲ୍ଲା କଲ୍ୟାଣସିଂହପୁର ବ୍ଲକ ସଦରସ୍ଥିତ ପ୍ରସିଦ୍ଧ ଦେବଗିରି ପଞ୍ଚମୁଖେଶ୍ୱର ଶୈବପୀଠରେ ଶ୍ରାବଣ ମାସର ପ୍ରଥମ ସୋମବାର ଅବସରରେ ଭକ୍ତି ଓ ଆଧ୍ୟାତ୍ମିକତାର ଅପୂର୍ବ ପରିବେଶ ସୃଷ୍ଟି ହୋଇଥିଲା। ଓଡ଼ିଶା ସମେତ ଆନ୍ଧ୍ରପ୍ରଦେଶ, ଛତିଶଗଡ଼ ଓ ପଶ୍ଚିମବଙ୍ଗର ବିଭିନ୍ନ ଅଞ୍ଚଳରୁ ହଜାର ହଜାର ବୋଲବମ ଭକ୍ତ ଓ ଶ୍ରଦ୍ଧାଳୁ ବାବା ପଞ୍ଚମୁଖେଶ୍ୱର ନୀଳକଣ୍ଠେଶ୍ୱରଙ୍କ ଦର୍ଶନ ପାଇଁ ଏଠାରେ ପହଞ୍ଚିଥିଲେ। ରବିବାର ସକାଳଠାରୁ ଦୂରଦୁରାନ୍ତରୁ ଆସିଥିବା ବୋଲବମ ଭକ୍ତମାନେ କଲ୍ୟାଣସିଂହପୁର ମା` ଗୁଣ୍ଡିଚା ମନ୍ଦିର ଓ ଗାୟତ୍ରୀ ମନ୍ଦିରରେ ରହିଥିଲେ। ସୋମବାର ଭୋରୁ ରୀତିନୀତି ଅନୁଯାୟୀ ପୂଜାର୍ଚ୍ଚନା କରି ନାଗାବଳୀ ଓ କଲ୍ୟାଣୀ ନଦୀ ସଙ୍ଗମରୁ ପବିତ୍ର ଜଳ ଉଠାଇ ବୋଲ ବମ୍ ଧ୍ୱନିରେ ୫୪୫ଟି ପାହାଚ ଅତିକ୍ରମ କରି ଦେବଗିରି ପାହାଡ଼ ଶୀର୍ଷରେ ଦୁଇ ପାହାଡ଼ ମଧ୍ୟରେ ଅବସ୍ଥିତ ଶ୍ରୀଶ୍ରୀଶ୍ରୀ ପଞ୍ଚମୁଖୀ ସ୍ପଟିକ ଲିଙ୍ଗ ନୀଳକଣ୍ଠେଶ୍ୱରଙ୍କ ଉପରେ ଜଳାଭିଷେକ କରିଥିଲେ। ଦକ୍ଷିଣ ଓଡ଼ିଶାର ଅନ୍ୟତମ ପ୍ରମୁଖ ଶୈବପୀଠ ଭାବେ ପରିଚିତ ଦେବଗିରିକୁ ପ୍ରତିବର୍ଷ ଶ୍ରାବଣ ମାସରେ ଲକ୍ଷାଧିକ ଭକ୍ତ ନିଜ ମନସ୍କାମନା ପୂରଣ ଆଶାରେ ଆସିଥାନ୍ତି। ଚଳିତ ବର୍ଷ ମଧ୍ୟ ପ୍ରଥମ ସୋମବାରରେ ଭକ୍ତଙ୍କ ଅସମ୍ଭବ ଭିଡ଼ ପରିଲକ୍ଷିତ ହୋଇଥିଲା। ସମଗ୍ର ଦେବଗିରି ପାହାଡ଼ ହର ହର ମହାଦେବ ଓ ବୋଲ ବମ୍ ଧ୍ୱନିରେ ପ୍ରକମ୍ପିତ ହୋଇଉଠିଥିଲା। ପାହାଡ଼ ଉପରେ ଥିବା ପ୍ରାକୃତିକ ସୌନ୍ଦର୍ଯ୍ୟ, ଗୋଟିଏ ଉଣା କୋଟିଏ କୁଣ୍ଡ, ଧୋବା ଧୋବୁଣି କୁଣ୍ଡ ଓ ଶାନ୍ତ ପରିବେଶ ଶ୍ରଦ୍ଧାଳୁଙ୍କୁ ବେଶ୍ ଆକର୍ଷିତ କରିଥିଲା। ଦର୍ଶନ ପରେ ଭକ୍ତମାନେ ବାବା ପଞ୍ଚମୁଖେଶ୍ୱରଙ୍କ ଆଶୀର୍ବାଦ ଲାଭ କରି ନିଜକୁ ଧନ୍ୟ ମନେ କରିଥିଲେ। ପ୍ରଥମ ସୋମବାରରେ ଦେବଗିରି ଶୈବପୀଠରେ ଦେଖାଯାଇଥିବା ଭକ୍ତଙ୍କ ଢଳ ଓ ଭକ୍ତିମୟ ପରିବେଶ ସମଗ୍ର ଅଞ୍ଚଳକୁ ଶିବମୟ କରିଦେଇଥିଲା। ସେହିପରି ନାଗାବଳୀ ଓ କଲ୍ୟାଣୀ ନଦୀ ମୁହାଁ ନିକଟ ଶିବ ମନ୍ଦିର,ନାରାୟଣପୁର,ସୁନାଖଣ୍ଡି, ସୁଳିପଦର, ସିକରପାଇ, ଶିବ ମନ୍ଦିରରେ ମଧ୍ୟ ଭକ୍ତ ମାନଙ୍କ ଭିଡ଼ ଦେଖିବାକୁ ମିଳିଥିଲା।