Odisha Janamata : ରାୟଗଡା ଆବାସିକ ବିଦ୍ୟାଳୟ ରେ ରାଗିଂ ଓ ହିଂସା,

ରାୟଗଡା ଆବାସିକ ବିଦ୍ୟାଳୟ ରେ ରାଗିଂ ଓ ହିଂସା,

04-Aug-2026

ରାୟଗଡ଼ାର ଆବାସିକ ବିଦ୍ୟାଳୟରେ ରାଗିଂ ଓ ହିଂସା: ୨୦ରୁ ଅଧିକ କନିଷ୍ଠ ଛାତ୍ରଙ୍କୁ ଅମାନବୀୟ ମାଡ଼, ତଦନ୍ତ ଆରମ୍ଭ

ଭାଇରାଲ ଭିଡିଓ ପରେ ଚଞ୍ଚଳତା; ଅଭିଯୁକ୍ତ ଛାତ୍ରଙ୍କ ବିରୋଧରେ ଏତଲା, ବହିଷ୍କାର ପ୍ରକ୍ରିୟା ଆରମ୍ଭ

ଓଡିଶା ଜନମତ ରାୟଗଡ଼ା, ୪/୮,

କାମେଶ୍ୱର କରକରିଆ :-----

ରାୟଗଡ଼ା ଜିଲ୍ଲା କୋଲନରା ବ୍ଲକ ଅନ୍ତର୍ଗତ ରିଭଲକଣା ଉଚ୍ଚ ବିଦ୍ୟାଳୟର ଆବାସିକ ହଷ୍ଟେଲରେ ଘଟିଥିବା ଏକ ହିଂସାତ୍ମକ ଘଟଣା ଚର୍ଚ୍ଚାର ବିଷୟ ପାଲଟିଛି। ବରିଷ୍ଠ ଛାତ୍ରମାନେ କନିଷ୍ଠ ଛାତ୍ରମାନଙ୍କୁ ନଡ଼ିଆ ବାହୁଙ୍ଗା ଓ ବାଡ଼ିରେ ନିର୍ମମ ଭାବେ ପିଟୁଥିବା ଏକ ଭିଡିଓ ସାମାଜିକ ଗଣମାଧ୍ୟମରେ ଭାଇରାଲ ହେବା ପରେ ଘଟଣା ସାମ୍ନାକୁ ଆସିଛି।ସୂଚନା ଅନୁଯାୟୀ, ଦଶମ ଶ୍ରେଣୀର ଜଣେ ଛାତ୍ରଙ୍କ ବିରୋଧରେ ନବମ ଶ୍ରେଣୀର କିଛି ଛାତ୍ର ଶିକ୍ଷକଙ୍କ ନିକଟରେ ଅଭିଯୋଗ କରିଥିଲେ। ଏହା ପରେ ସମ୍ପୃକ୍ତ ଛାତ୍ରଙ୍କୁ ତାଗିଦ କରାଯାଇଥିଲା। ଏଥିରେ କ୍ଷୁବ୍ଧ ହୋଇ ସେ ଓ ତାଙ୍କର କିଛି ସହପାଠୀ ଗତ ରବିବାର ରାତିରେ ହଷ୍ଟେଲରେ ରହୁଥିବା ନବମ ଶ୍ରେଣୀର ୨୦ରୁ ଅଧିକ ଛାତ୍ରଙ୍କୁ ଅମାନବୀୟ ଭାବେ ମାଡ଼ ମାରିଥିବା ଅଭିଯୋଗ ହୋଇଛି।ଘଟଣା ସମ୍ପର୍କରେ ହଷ୍ଟେଲ ଦାୟିତ୍ୱରେ ଥିବା ଡମ୍ବରୁଧର ତ୍ରିପାଠୀ କହିଛନ୍ତି ଯେ, ସମ୍ପୃକ୍ତ ଛାତ୍ରଙ୍କ ବିରୋଧରେ ଥାନାରେ ଏତଲା ଦାଖଲ କରାଯାଇଛି ଏବଂ ତାଙ୍କୁ ବିଦ୍ୟାଳୟରୁ ବହିଷ୍କାର କରିବା ପାଇଁ ପଦକ୍ଷେପ ନିଆଯାଉଛି।ଖବର ପାଇ କୋଲନରା ବ୍ଲକ ମଙ୍ଗଳ ସମ୍ପ୍ରସାରଣ ଅଧିକାରୀ ଦେବାଶିଷ ମୁଣ୍ଡ ବିଦ୍ୟାଳୟକୁ ଯାଇ ଘଟଣାର ତଦନ୍ତ କରିଛନ୍ତି। ସେହିପରି ଜିଲ୍ଲା ମଙ୍ଗଳ ଅଧିକାରୀ ଅସୀମା ରାଓ କୋଲନରା ଡବ୍ଲ୍ୟୁଇଓଙ୍କୁ ତଦନ୍ତ ରିପୋର୍ଟ ଦାଖଲ କରିବାକୁ ନିର୍ଦ୍ଦେଶ ଦେଇଥିବା ସହ ଜିଲ୍ଲାପାଳଙ୍କୁ ମଧ୍ୟ ଅବଗତ କରାଯାଇଛି।
ଘଟଣା ପରେ ହଷ୍ଟେଲରେ ରହୁଥିବା ଅନ୍ୟ ଛାତ୍ରମାନେ ଭୟଭୀତ ଅବସ୍ଥାରେ ରହିଥିବା ଜଣାପଡ଼ିଛି। ତେବେ ଘଟଣା ସମୟରେ ହଷ୍ଟେଲର ଦାୟିତ୍ୱରେ କିଏ ଥିଲେ, କେଉଁ ପରିସ୍ଥିତିରେ ଏପରି ଘଟଣା ଘଟିଲା ଏବଂ ଛାତ୍ରମାନଙ୍କ ସୁରକ୍ଷାରେ କୌଣସି ଅବହେଳା ହୋଇଛି କି ନାହିଁ, ସେନେଇ ବିଭାଗୀୟ ତଦନ୍ତ ରିପୋର୍ଟ ପରେ ସ୍ପଷ୍ଟ ଚିତ୍ର ସାମ୍ନାକୁ ଆସିବ।