Odisha Janamata : ବାୟୁସେନା କର୍ମଚାରୀ ଙ୍କ ସଡ଼କ ଦୁର୍ଘଟଣା ରେ ମୃତ୍ୟୁ |

ବାୟୁସେନା କର୍ମଚାରୀ ଙ୍କ ସଡ଼କ ଦୁର୍ଘଟଣା ରେ ମୃତ୍ୟୁ |

25-Oct-2026

ସଡ଼କ ଦୁର୍ଘଟଣାରେ ବାୟୁ ସେନା ଯବାନ ଚିଣ୍ଟୁଙ୍କ ମୃତ୍ୟୁ

ଏକମାତ୍ର ପୁଅକୁ ହରାଇ ଅସହାୟ ମା’ । ଗଣ୍ଡଳା ଗ୍ରାମରେ ଶୋକର ଛାୟା ।

ଓଡିଶା ଜନ ମତ, ନ୍ରହ୍ମପୁର, କୃଷ୍ଣ ଚନ୍ଦ୍ର ସାମନ୍ତରା :----

ଦେଶ ସେବାର ସ୍ୱପ୍ନ ନେଇ ଭାରତୀୟ ବାୟୁ ସେନାରେ ଯୋଗ ଦେଇ ଥିଲେ। ହେଲେ ବିଧିର ବିଧାନ ଥିଲା କିଛି ଅଲଗା। ସଡ଼କ ଦୁର୍ଘଟଣାରେ ଚାଲିଗଲା ଜଣେ ଯୁବ ଯବାନଙ୍କ ଜୀବନ। ଆସାମରେ କାର୍ଯ୍ୟରତ ଗଞ୍ଜାମ ଜିଲ୍ଲା ହିଞ୍ଜିଳିକାଟୁ ବ୍ଲକ୍‌ ଗଣ୍ଡଳା ଗ୍ରାମର ଚିଣ୍ଟୁ ସେଠୀଙ୍କ ମୃତ୍ୟୁରେ ସ୍ତବ୍ଧ ପୂରା ଗାଁ। ଏକମାତ୍ର ପୁଅକୁ ହରାଇ ଭାଙ୍ଗିପଡ଼ିଛନ୍ତି ମା’ ସଂଯୁକ୍ତା ସେଠୀ। ଗାଁକୁ ଫେରିଛି ପୁଅ ର ପାର୍ଥିବ ଶରୀର, ଆଉ ଚାରିଆଡ଼େ ଖେଳିଯାଇଛି ଶୋକର ପରିବେଶ।
ଗଞ୍ଜାମ ଜିଲ୍ଲା ହିଞ୍ଜିଳିକାଟୁ ବ୍ଲକ୍‌ ଅନ୍ତର୍ଗତ ଗଣ୍ଡଳା ଗ୍ରାମରେ ଶୋକାକୁଳ ପରିବେଶ। ଗାଁର ବଡ଼ଧୋବାସାହିର ଚିଣ୍ଟୁ ସେଠୀଙ୍କ ଅକାଳ ବିୟୋଗରେ ମର୍ମାହତ ପରିବାର, ବନ୍ଧୁବାନ୍ଧବ ଓ ଗ୍ରାମବାସୀ।
ପ୍ରାୟ ଦୁଇ ବର୍ଷ ପୂର୍ବେ ଭାରତୀୟ ବାୟୁସେନାରେ ଯବାନ ଭାବେ ନିଯୁକ୍ତି ପାଇଥିଲେ ଚିଣ୍ଟୁ। ଆସାମର ଏକ ଏୟାର ବେସ୍‌ରେ କାର୍ଯ୍ୟରତ ଥିବା ସମୟରେ ସେ ଏକ ସଡ଼କ ଦୁର୍ଘଟଣାର ଶିକାର ହୋଇଥିଲେ। ଦୁର୍ଘଟଣାରେ ଗୁରୁତର ଆହତ ହେବା ପରେ ତାଙ୍କୁ ସେନା ହସ୍ପିଟାଲରେ ଭର୍ତ୍ତି କରାଯାଇଥିଲା। ଦୀର୍ଘଦିନ ଧରି ଚିକିତ୍ସା ଚାଲିଥିଲେ ମଧ୍ୟ ଗୁରୁବାର ସକାଳ ପ୍ରାୟ ସାତଟା ସମୟରେ ଚିକିତ୍ସାଧୀନ ଅବସ୍ଥାରେ ଚିଣ୍ଟୁଙ୍କ ମୃତ୍ୟୁ ଘଟିଥିଲା।
ଚିଣ୍ଟୁ ଥିଲେ ମା’ ସଂଯୁକ୍ତାଙ୍କ ଏକମାତ୍ର ପୁଅ ଏବଂ ପରିବାରର ଏକମାତ୍ର ରୋଜଗାରିଆ ସଦସ୍ୟ। ପୁଅ ର ଭବିଷ୍ୟତକୁ ନେଇ ଅନେକ ସ୍ୱପ୍ନ ଦେଖିଥିବା ମାଆଙ୍କ ପାଇଁ ଏହି ଦୁଃଖଦ ଖବର ଏକ ବଡ଼ ଆଘାତ ପାଲଅଟିଛି। ଯେଉଁ ପୁଅକୁ ନେଇ ତାଙ୍କ ଆଖିରେ ଅନେକ ସ୍ୱପ୍ନ ଥିଲା, ଆଜି ସେହି ପୁଅକୁ ହରାଇ ମାଆଙ୍କ କୋଳ ଶୂନ୍ୟ ହୋଇଯାଇଛି।
ଚିଣ୍ଟୁଙ୍କ ପାର୍ଥିବ ଶରୀର ଗଣ୍ଡଳା ଗ୍ରାମରେ ପହଞ୍ଚିବା ପରେ ଶେଷଦର୍ଶନ ପାଇଁ ଗ୍ରାମବାସୀଙ୍କ ଭିଡ଼ ଜମିଥିଲା। ଶୋକାକୁଳ ପରିବେଶରେ ତାଙ୍କୁ ଗାର୍ଡ ଅଫ୍ ଅନର୍‌ ପ୍ରଦାନ କରାଯାଇଥିଲା। ପରେ ଗ୍ରାମ ପରିକ୍ରମା କରାଯାଇ ଶ୍ମଶାନକୁ ନିଆଯାଇଥିଲା। ସେଠାରେ ତାଙ୍କ ଭଉଣୀ ସ୍ମୃତି ସେଠୀ ମୁଖାଗ୍ନି ଦେବା ପରେ ଶେଷକୃତ୍ୟ ସମ୍ପନ୍ନ ହୋଇଥିଲା।
ଏହି ସମୟରେ ବେଲଗାଁ ଥାନା ଆଇଆଇସି ସ୍ମିତାଞ୍ଜଳି ପ୍ରଧାନ, ହିଞ୍ଜିଳିକାଟୁର ଅତିରିକ୍ତ ତହସିଲଦାର ପୁରୁଷୋତ୍ତମ ବେଣିଆ, ସ୍ଥାନୀୟ ସରପଞ୍ଚ, ସମିତିସଭ୍ୟଙ୍କ ସମେତ ବହୁ ଗ୍ରାମବାସୀ ଉପସ୍ଥିତ ରହି ଦିବଂଗତ ଯବାନଙ୍କୁ ଶେଷ ସମ୍ମାନ ଜଣାଇଥିଲେ।
ଅଳ୍ପ ବୟସରେ ଜଣେ ଯୁବ ଯବାନଙ୍କ ଏଭଳି ଅକାଳ ବିୟୋଗ ଗଣ୍ଡଳା ଗ୍ରାମ ପାଇଁ ଏକ ଅପୂରଣୀୟ କ୍ଷତି। ଦେଶସେବାରେ ନିୟୋଜିତ ଥିବା ଚିଣ୍ଟୁଙ୍କ ବିୟୋଗରେ ପରିବାରଠାରୁ ଆରମ୍ଭ କରି ସମଗ୍ର ଗ୍ରାମ ମର୍ମାହତ। ଏକମାତ୍ର ପୁଅକୁ ହରାଇ ମା’ଙ୍କ ଆଖିରୁ ଲୁହ ଶୁଖୁନଥିବା ବେଳେ ଗାଁରେ ଏବେ ଶୋକର ବାତାବରଣ।