Odisha Janamata : ସ୍ୱାମୀଙ୍କ ଦୀର୍ଘାୟୁ କାମନା କରି ମହିଳା ପାଳିଲେ ସାବିତ୍ରୀ ବ୍ରତ |

ସ୍ୱାମୀଙ୍କ ଦୀର୍ଘାୟୁ କାମନା କରି ମହିଳା ପାଳିଲେ ସାବିତ୍ରୀ ବ୍ରତ |

16-May-2026

ସ୍ୱାମୀଙ୍କ ଦୀର୍ଘାୟୁ କାମନାରେ ସାବିତ୍ରୀ ବ୍ରତ ପାଳନ

ଓଡିଶା ଜନ ମତ,ରାୟଗଡା,୧୬/୦୫

କାମେଶ୍ୱର କରକରିଆ : ---

ରାୟଗଡା ଜିଲ୍ଲା କଲ୍ୟାଣସିଂହପୁର ବ୍ଲକ ସଦର ମହକୁମାର ଜଗନ୍ନାଥ ମନ୍ଦିର ପରିସରରେ ଶନିବାର ସାବିତ୍ରୀ ବ୍ରତ ଭକ୍ତି ଓ ଆସ୍ଥାର ସହ ପାଳନ କରାଯାଇଥିବା ଦେଖିବାକୁ ମିଳିଛି। ବ୍ଲକର ବିଭିନ୍ନ ଅଞ୍ଚଳରୁ ଆସିଥିବା ସଧବା ନାରୀମାନେ ସକାଳୁ ସ୍ନାନ ସାରି ଉପବାସ ରହି ପୂଜାର୍ଚ୍ଚନା କରିଥିଲେ। ପୂଜା ପାଇଁ ଆମ୍ବ, କଦଳୀ, ପଣସ, ଲିଚୁ, ପିଜୁଳି, ଜାମୁକୋଳି, ଖଜୁରୀ, ଅଙ୍ଗୁର, ସେଓ ଓ କମଳା ଭଳି ବିଭିନ୍ନ ପ୍ରକାରର ଫଳମୂଳ ସଂଗ୍ରହ କରି ମନ୍ଦିରରେ ଭଗବାନଙ୍କୁ ଅର୍ପଣ କରାଯାଇଥିଲା। ବ୍ଲକର ପ୍ରାୟ ପ୍ରତ୍ୟେକ ଗାଁରେ ହଜାର ହଜାର ସଂଖ୍ୟାରେ ସଧବା ନାରୀମାନେ ସାବିତ୍ରୀ ବ୍ରତ ପାଳନ କରୁଥିବା ଦେଖାଯାଇଛି। ପ୍ରତିବର୍ଷ ଜ୍ୟେଷ୍ଠ ମାସ କୃଷ୍ଣପକ୍ଷ ଅମାବାସ୍ୟା ତିଥିରେ ସାବିତ୍ରୀ ବ୍ରତ ପାଳନ କରାଯାଏ। ଏହି ଦିନ ସଧବା ନାରୀମାନେ ସ୍ୱାମୀଙ୍କ ଦୀର୍ଘାୟୁ, ପରିବାରର ସୁଖ-ଶାନ୍ତି ଓ ସମୃଦ୍ଧି କାମନା କରି ଦିନତମାମ ଉପବାସ ରହିଥାନ୍ତି। ବିଶ୍ୱାସ ଅନୁସାରେ ଏହି ବ୍ରତ ପାଳନ କଲେ ପରିବାରରେ ସୁଖ ସମୃଦ୍ଧି ବଜାୟ ରହିବା ସହ ନବଦମ୍ପତିମାନେ ସନ୍ତାନ ପ୍ରାପ୍ତିର ସୌଭାଗ୍ୟ ଅର୍ଜନ କରନ୍ତି। ସଧବା ନାରୀମାନେ ନୂତନ ବସ୍ତ୍ର ପରିଧାନ କରି ଭଗବାନ ଶିବ ଓ ମାତା ପାର୍ବତୀଙ୍କୁ ପୂଜା କରିଥିଲେ। ସେମାନଙ୍କ କହିବା ଅନୁଯାୟୀ, ଯୁଗ ଯୁଗ ଧରି ଚାଲିଆସୁଥିବା ଏହି ପରମ୍ପରା ଦାମ୍ପତ୍ୟ ଜୀବନର ସୁଖ ଓ ଅଖଣ୍ଡ ସୌଭାଗ୍ୟର ପ୍ରତୀକ ଭାବେ ପାଳନ କରାଯାଉଛି। ପୌରାଣିକ କଥାନୁସାରେ ସାବିତ୍ରୀ ନିଜ ସ୍ୱାମୀ ସତ୍ୟବାନଙ୍କର ଅଳ୍ପ ଆୟୁକାଳ ବିଷୟରେ ଜାଣିଥିଲେ ମଧ୍ୟ ତାଙ୍କୁ ବିବାହ କରିଥିଲେ। ନିଜ ଦୃଢ଼ ମନୋବଳ ଓ ନିଷ୍ଠାବଳେ ସେ ଯମରାଜଙ୍କୁ ପ୍ରସନ୍ନ କରି ସତ୍ୟବାନଙ୍କୁ ପୁନର୍ଜୀବନ ଦେଇଥିଲେ। ସେହି ପୌରାଣିକ କାହାଣୀକୁ ସ୍ମରଣ କରି ସଧବା ନାରୀମାନେ ଆଜି ମଧ୍ୟ ସାବିତ୍ରୀ ବ୍ରତ ପାଳନ କରୁଥିବା ଜଣାପଡ଼ିଛି।