Odisha Janamata : ଡଙ୍ଗରିଆ କନ୍ଧଙ୍କ ଜୀବିକା ର ଭରଷା ନିୟମ ଗିରିର ଆମ୍ବସୋଡ଼ା ଓ ଚମ୍ପେଇତ |

ଡଙ୍ଗରିଆ କନ୍ଧଙ୍କ ଜୀବିକା ର ଭରଷା ନିୟମ ଗିରିର ଆମ୍ବସୋଡ଼ା ଓ ଚମ୍ପେଇତ |

16-May-2026

ନିୟମଗିରିର ଆମ୍ବସଡ଼ା ଓ ଚମ୍ପେଇତ : ଡଙ୍ଗରିଆ କନ୍ଧଙ୍କ ଜୀବିକାର ଭରସା,
ଓଡିଶା ଜନ ମତ,ରାୟଗଡା,୧୬/୦୪,

କାମେଶ୍ୱର କରକରିଆ : ----

ରାୟଗଡ଼ା ଜିଲ୍ଲା କଲ୍ୟାଣସିଂହପୁର ବ୍ଲକ୍‌ର ନିୟମଗିରି ପାହାଡ଼ ଅଞ୍ଚଳ ପ୍ରାକୃତିକ ସମ୍ପଦରେ ଭରପୁର। ବିଶେଷକରି ଖରାଦିନେ ଏଠାରେ ପ୍ରଚୁର ପରିମାଣରେ ଆମ୍ବ ମିଳିଥାଏ। ନିୟମଗିରି ପାହାଡ଼ିଆ ଅଞ୍ଚଳର ଆମ୍ବ ତାହାର ସ୍ୱାଦ ଓ ସୁଗନ୍ଧ ପାଇଁ ବେଶ ପରିଚିତ। ଏହି ଆମ୍ବ ନିୟମଗିରିରେ ବସବାସ କରୁଥିବା ଡଙ୍ଗରିଆ କନ୍ଧ ସମ୍ପ୍ରଦାୟର ଲୋକଙ୍କ ପାଇଁ ଜୀବିକାର ଏକ ମୁଖ୍ୟ ରୋଜଗାର ପନ୍ଥା ସାଜିଛି।ଖରାଦିନ ଆସିଲେ ଡଙ୍ଗରିଆ ମହିଳା ଓ ପୁରୁଷମାନେ ଭୋରରୁ ଡାଲା ଓ ଚାଙ୍ଗୁଡ଼ି ଧରି ଜଙ୍ଗଲ ଅଭିମୁଖେ ବାହାରି ପଡ଼ନ୍ତି। ପ୍ରାୟ ୪ ରୁ ୫ ଘଣ୍ଟା ଧରି ଜଙ୍ଗଲରେ ପଡ଼ିଥିବା ପାଚିଲା ଆମ୍ବ ସଂଗ୍ରହ କରି ଘରକୁ ଆଣିଥାନ୍ତି। ଜଙ୍ଗଲୀ ଜନ୍ତୁଙ୍କ ଭୟ ଥିଲେ ମଧ୍ୟ ପରିବାର ଭରଣପୋଷଣ ପାଇଁ ଜୀବନକୁ ବାଜି ଲଗାଇ ୮ ରୁ ୧୦ ଘଣ୍ଟା ଦିନକୁ ପରିଶ୍ରମ କରି ଏହି କାମ କରୁଛନ୍ତି। ସଂଗ୍ରହ କରାଯାଇଥିବା ଭଲ ଆମ୍ବକୁ ବଜାରରେ ବିକ୍ରି କରାଯାଉଥିବା ବେଳେ ପୂରା ପାଚିଥିବା ଆମ୍ବକୁ ବିଭିନ୍ନ ପ୍ରକାରରେ କାଟି ପ୍ରସ୍ତୁତ କରିଥାନ୍ତି । ପ୍ରଥମେ ଆମ୍ବର ଚୋପା ଛଡ଼ାଇ ଟାକୁଆକୁ ଅଲଗା କରାଯାଏ। ଟାକୁଆ ଉପରୁ ବାହାର କରାଯାଇଥିବା ଅଂଶ ଫୁଲପରି ଦେଖାଯାଇଥାଏ। ସେହି ଅଂଶକୁ ଖରାରେ ଶୁଖାଇ ପ୍ରସ୍ତୁତ କରାଯାଏ ଚମ୍ପେଇତ। ଶୁଖିବା ପରେ ଏହାର ସ୍ୱାଦ ଆହୁରି ବଢ଼ିଯାଏ ଏବଂ ବଜାରରେ ଏହାର ଚାହିଦା ଭଲ ରହିଥାଏ।ସେହିପରି ଅଧିକ ପାଚିଯାଇଥିବା ଆମ୍ବରୁ ଆମ୍ବସଡ଼ା ପ୍ରସ୍ତୁତ କରାଯାଏ। ଆମ୍ବର ଚୋପା ବାହାର କରି ଟାକୁଆକୁ ରସ ହାଣ୍ଡିରେ ରଖି ବାଉଁଶ କିମ୍ବା କାଠ ସାହାଯ୍ୟରେ କୁଟିଥାନ୍ତି । ପରେ ସେଥିରୁ ରସ ବାହାର କରି ୨୦ ରୁ ୩୦ମିନିଟ୍ ପର୍ଯ୍ୟନ୍ତ କାଠଚୁଲାରେ ସିଝାଇଥାନ୍ତି । ଫୁଟିଥିବା ଆମ୍ବ ରସକୁ ବାଉଁଶ କୁଲା ଓ ଡାଲାରେ ପକାଇ ଟାଣ ଖରାରେ ଶୁଖାଇଥାନ୍ତି । ପ୍ରାୟ ୧୦ ରୁ ୧୨ ଦିନ ଧରି ଲଗାତାର ଭାବେ ଆମ୍ବରସ ସମାନ ପ୍ରସ୍ତୁତିରେ ପକାଇ ଥାନ୍ତି। ସେହିପରି ଆମ୍ବସଡା କୁ ପ୍ରାୟ ସପ୍ତାହ ଶୁଖାଇବା ପରେ ତାହା ଆମ୍ବସଡ଼ାରେ ପରିଣତ ହୋଇଥାଏ। ପରେ ଏହାକୁ ଛୋଟ ଛୋଟ ପିସ୍‌କରି କାଟି ଘରେ ବ୍ୟବହାର କରନ୍ତି ଓ ବଜାରରେ ମଧ୍ୟ ବିକ୍ରି କରିଥାନ୍ତି। ନିୟମଗିରିର ଆମ୍ବସଡ଼ା ଓ ଚମ୍ପେଇତର ଚାହିଦା କେବଳ ରାୟଗଡ଼ା କିମ୍ବା ଓଡ଼ିଶାରେ ନୁହେଁ, ରାଜ୍ୟ ବାହାରେ ମଧ୍ୟ ଚାହିଦା ରହିଛି। ଏହା ସହ ସୁପାରୀ, ପଣସ, କଞ୍ଚା ହଳଦୀ, ଜଙ୍ଗଲୀ କନ୍ଦା, ବାଉଁଶ କରଡ଼ି ଓ ଛତୁ ଭଳି ଅନେକ ବନଜାତ ଦ୍ରବ୍ୟ ଡଙ୍ଗରିଆ କନ୍ଧଙ୍କ ଜୀବନ ଜୀବିକାର ଆଧାର ପାଲଟିଛି। ତେବେ ଏତେ ପରିଶ୍ରମ ପରେ ମଧ୍ୟ ସେମାନେ ଉଚିତ ମୂଲ୍ୟ ପାଉନାହାନ୍ତି। ବଜାରରେ ଦଲାଲମାନେ କମ୍ ଦରରେ ଏହି ସାମଗ୍ରୀ କିଣି ଅଧିକ ଲାଭବାନ ହେଉଥିବା ଅଭିଯୋଗ ହେଉଛି। ରୋଜଗାରର ଅନ୍ୟ କୌଣସି ବିକଳ୍ପ ନଥିବାରୁ ନିୟମଗିରି ପାହାଡ଼ ପାର୍ସାଲି ଓ ୧୨ ପଦର ଅଞ୍ଚଳର ଲୋକେ ଏହି ବନଜାତ ଦ୍ରବ୍ୟ ଉପରେ ନିର୍ଭର କରି ଜୀବନ ଜୀବିକା ଚଳାଇଥିବା ନିୟମଗିରି ସମିତି ସୁରକ୍ଷା ସଭାପତି ଶିକକା ଲଦ କହିଛନ୍ତି।