Odisha Janamata : ତିନିମାସ ହେଲା ଭତ୍ତା ଟଙ୍କା ମିଳିନଥିବାରୁ ଭୋକ ଉପାସରେ ଦିନ କାଟୁଛନ୍ତି ବିଧବା ବୃଦ୍ଧା ||

ତିନିମାସ ହେଲା ଭତ୍ତା ଟଙ୍କା ମିଳିନଥିବାରୁ ଭୋକ ଉପାସରେ ଦିନ କାଟୁଛନ୍ତି ବିଧବା ବୃଦ୍ଧା ||

01-Jun-2026

୩ ମାସ ହେଲା ମିଳୁନି ଭତ୍ତା, ଭୋକ ଓ ଅନିଶ୍ଚିତତାରେ ଦିନ କାଟୁଛନ୍ତି ବିଧବା ବୃଦ୍ଧା
ଓଡିଶା ଜନମତ ରାୟଗଡା , ୦୧/୦୬,

କାମେଶ୍ୱର କରକରିଆ :-----

ସରକାର ଗରିବ, ବୃଦ୍ଧ, ବିଧବା ଓ ଅସହାୟ ଲୋକଙ୍କ ପାଇଁ ବିଭିନ୍ନ ସାମାଜିକ ସୁରକ୍ଷା ଯୋଜନା ଘୋଷଣା କରୁଥିବା ବେଳେ, ରାୟଗଡା ଜିଲ୍ଲା କଲ୍ୟାଣସିଂହପୁର ବ୍ଲକ ନିୟମଗିରି ଅଞ୍ଚଳର ପାର୍ସାଲି ପଞ୍ଚାୟତର କୃଷମୁହିଁ ଗ୍ରାମର ବିଧବା ବୃଦ୍ଧା ବାଙ୍ଗାରି କୃଷିକାଙ୍କ ଦୁଃଖଭରା କାହାଣୀ ସେହି ଯୋଜନାର ବାସ୍ତବ ଚିତ୍ରକୁ ପଦାର୍ପଣ କରିଛି। ବାଙ୍ଗାରି କୃଷିକା କହିଛନ୍ତି ଯେ, ସେ ପୂର୍ବରୁ ନିୟମିତ ଭାବେ ବାର୍ଦ୍ଧକ୍ୟ ଭତ୍ତା ପାଉଥିଲେ ଏବଂ ସେହି ଟଙ୍କାରେ ତାଙ୍କ ଦୈନନ୍ଦିନ ଜୀବନ କଷ୍ଟେମଷ୍ଟେ ଚାଲୁଥିଲା। କିନ୍ତୁ ଗତ ତିନି ମାସ ହେଲା ତାଙ୍କ ଖାତାକୁ ଭତ୍ତା ଆସୁନଥିବାରୁ ସେ ଚରମ ଦୁର୍ଦ୍ଦଶାରେ ଦିନ କାଟୁଛନ୍ତି। ସ୍ୱାମୀଙ୍କ ମୃତ୍ୟୁ ପରେ ସରକାରୀ ଭତ୍ତା ହିଁ ତାଙ୍କର ଏକମାତ୍ର ଭରସା ଥିଲା। ବର୍ତ୍ତମାନ ଭତ୍ତା ବନ୍ଦ ହୋଇଯିବାରୁ ତାଙ୍କ ସାମ୍ନାରେ ଖାଦ୍ୟ ଓ ଜୀବିକାର ଗୁରୁତର ସଙ୍କଟ ସୃଷ୍ଟି ହୋଇଛି। ମୁଁ ଜଣେ ବିଧବା ବୃଦ୍ଧା। କାହାକୁ କହିବି? କଣ ଖାଇବି? କେମିତି ଚଳିବି? ଭତ୍ତା ଟଙ୍କାରେ ମୋର ପେଟ ପୋଷା ହେଉଥିଲା। ଏବେ ତିନି ମାସ ହେଲା କିଛି ମିଳୁନାହିଁ। ମୋ ଅବସ୍ଥା ବହୁତ ଦୟନୀୟ,ବୋଲି କୋହଭରା କଣ୍ଠରେ କହିଛନ୍ତି ବାଙ୍ଗାରି। ସ୍ଥାନୀୟ ଲୋକଙ୍କ ଅଭିଯୋଗ ଅନୁସାରେ, କେବଳ ବାଙ୍ଗାରି ନୁହେଁ, ପାର୍ସାଲି ପଞ୍ଚାୟତ ସହ ସମଗ୍ର କଲ୍ୟାଣସିଂହପୁର ବ୍ଲକର ଅନେକ ବୃଦ୍ଧ, ବିଧବା, ଅବିବାହିତା ମହିଳା ଓ ଅସହାୟ ବ୍ୟକ୍ତି ସାମାଜିକ ସୁରକ୍ଷା ଭତ୍ତାରୁ ବଞ୍ଚିତ ରହିଛନ୍ତି। ବାରମ୍ବାର ବ୍ଲକ କାର୍ଯ୍ୟାଳୟ ଓ ସମ୍ପୃକ୍ତ ବିଭାଗକୁ ଯାଇ ନିରାଶ ହୋଇ ଫେରୁଥିବା ଅଭିଯୋଗ ହେଉଛି। ଏନେଇ କଲ୍ୟାଣସିଂହପୁର ବ୍ଲକ ସାମାଜିକ ସୁରକ୍ଷା ଅଧିକାରୀ ବିଶ୍ୱଜିତ ସିଂଙ୍କୁ ପଚାରିବାରୁ ସେ କହିଥିଲେ ଉପରୁ ଯେତିକି ଟାର୍ଗେଟ ଆସୁଛି ସେହି ଅନୁଯାୟୀ ଭତ୍ତା ପ୍ରଦାନ କରାଯାଉଛି। ବର୍ତ୍ତମାନ ନୂଆ ଟାର୍ଗେଟ ନାହିଁ। ଟାର୍ଗେଟ ଆସିଲେ ଆବଶ୍ୟକ ପଦକ୍ଷେପ ନିଆଯିବ। ତେବେ ପ୍ରଶ୍ନ ଉଠୁଛି, ସାମାଜିକ ସୁରକ୍ଷା ଯୋଜନାର ମୂଳ ଉଦ୍ଦେଶ୍ୟ ଯଦି ଅସହାୟ ଲୋକଙ୍କୁ ସୁରକ୍ଷା ଦେବା। ତେବେ କେବଳ ‘ଟାର୍ଗେଟ’ ଅଭାବ ଦର୍ଶାଇ ବୃଦ୍ଧ, ବିଧବା ଓ ଅସହାୟଙ୍କୁ ମାସ ମାସ ଧରି ଭତ୍ତାରୁ ବଞ୍ଚିତ ରଖିବା କେତେ ଯୁକ୍ତିସଙ୍ଗତ? ଯେଉଁ ଯୋଜନା ଗରିବଙ୍କ ମୁହଁରେ ଦାନା ଦେବା ପାଇଁ, ସେହି ଯୋଜନାର ଅବହେଳା ଆଜି ଅନେକ ପରିବାରକୁ ଭୋକ ଓ ଅନିଶ୍ଚିତତା ମଧ୍ୟରେ ଠେଲି ଦେଇଛି। ନିୟମଗିରି ପରି ଦୁର୍ଗମ ଅଞ୍ଚଳରେ ଜଣେ ବିଧବା ବୃଦ୍ଧା ଯେତେବେଳେ ତିନି ମାସ ଧରି ଭତ୍ତା ପାଇଁ ଅପେକ୍ଷା କରୁଛନ୍ତି, ସେତେବେଳେ ସରକାରୀ ବ୍ୟବସ୍ଥାର ସମ୍ବେଦନଶୀଳତାକୁ ନେଇ ପ୍ରଶ୍ନ ଉଠିବା ସ୍ୱାଭାବିକ। ତେଣୁ ଜିଲ୍ଲା ପ୍ରଶାସନ ଓ ରାଜ୍ୟ ସରକାର ତୁରନ୍ତ ଏହି ସମସ୍ୟା ଉପରେ ଦୃଷ୍ଟି ଦେଇ ବଞ୍ଚିତ ହିତାଧିକାରୀଙ୍କୁ ଭତ୍ତା ପ୍ରଦାନ କରିବାକୁ ସାଧାରଣରେ ଦାବି ଜୋର ଧରିଛି।