Odisha Janamata : କଲ୍ୟାଣ ସିଂହପୁର ବ୍ଲକରେ ଅନାଥ ଓ ଅସହାୟ ଶିଶୁଙ୍କୁ ଚିନ୍ହଟ ପାଇଁ ସ୍ୱତନ୍ତ୍ର ଶିବିର ଅନୁଷ୍ଠିତ ||

କଲ୍ୟାଣ ସିଂହପୁର ବ୍ଲକରେ ଅନାଥ ଓ ଅସହାୟ ଶିଶୁଙ୍କୁ ଚିନ୍ହଟ ପାଇଁ ସ୍ୱତନ୍ତ୍ର ଶିବିର ଅନୁଷ୍ଠିତ ||

01-Jun-2026

ଅନାଥ ଓ ଅସହାୟ ଶିଶୁଙ୍କ ଚିହ୍ନଟ ପାଇଁ ସ୍ୱତନ୍ତ୍ର ଶିବିର ଅନୁଷ୍ଠିତ
ଓଡିଶା ଜନମତ ରାୟଗଡା , ୦୧/୦୬

କାମେଶ୍ୱର କରକରିଆ : ---

ରାୟଗଡ଼ା ଜିଲ୍ଲା କଲ୍ୟାଣସିଂହପୁର ବ୍ଲକ ଅନ୍ତର୍ଗତ ଆଇସିଡିଏସ୍ କାର୍ଯ୍ୟାଳୟ ପରିସରରେ ଆଜି ଅନାଥ ଓ ଅସହାୟ ଶିଶୁଙ୍କ ଚିହ୍ନଟ ନିମନ୍ତେ ଏକ ସ୍ୱତନ୍ତ୍ର ଶିବିର ଅନୁଷ୍ଠିତ ହୋଇଯାଇଛି। ସକାଳ ୮ଟାରୁ ସନ୍ଧ୍ୟା ୪ଟା ପର୍ଯ୍ୟନ୍ତ ଚାଲିଥିବା ଏହି ଶିବିରରେ ଜିଲ୍ଲା ଶିଶୁ ସୁରକ୍ଷା ଅଧିକାରୀ ମହାଦେବ ଚିଛୁଆନଙ୍କ ଅଧ୍ୟକ୍ଷତାରେ ଅରଫାନ ସର୍ଭେ ଅନ୍ତର୍ଗତ ଚିହ୍ନଟ ହୋଇଥିବା ଶିଶୁ ଓ ସେମାନଙ୍କ ପରିବାରବର୍ଗ ଅଂଶଗ୍ରହଣ କରିଥିଲେ। ଶିବିରରେ ଶିଶୁ ସୁରକ୍ଷା ଅଧିକାରୀ ମନୋରଞ୍ଜନ ବାଘ, କଲ୍ୟାଣସିଂହପୁରର ଭାରପ୍ରାପ୍ତ ସିଡିପିଓ ଜୟଲକ୍ଷ୍ମୀ, ଶିଶୁ ମଙ୍ଗଳ କମିଟିର ଅଧ୍ୟକ୍ଷ ପ୍ରମୋଦ କୁମାର ନାୟକ,ସଦସ୍ୟ ରାଧାଶ୍ୟାମ ପଣ୍ଡା ଓ ସଙ୍ଗୀତା ବେହେରାଙ୍କ ସମେତ ପରାମର୍ଶଦାତା ବିଶ୍ୱବନ୍ଦିତା ବେଉରା ଉପସ୍ଥିତ ରହି ଶିଶୁମାନଙ୍କ ଅଧିକାର, ସୁରକ୍ଷା ଏବଂ ସରକାରୀ ସହାୟତା ସମ୍ପର୍କରେ ସଚେତନ କରାଇଥିଲେ। କଲ୍ୟାଣସିଂହପୁର ବ୍ଲକର ବିଭିନ୍ନ ଅଞ୍ଚଳରୁ ୫୪ଟି ପରିବାର ଏହି ଶିବିରରେ ଯୋଗଦେଇଥିବା ବେଳେ ୪୩ ଜଣ ଶିଶୁଙ୍କୁ ଚିହ୍ନଟ କରାଯାଇଥିଲା। ଚିହ୍ନଟ ହୋଇଥିବା ଶିଶୁମାନଙ୍କୁ ସରକାରଙ୍କ ପକ୍ଷରୁ ଉପଲବ୍ଧ ବିଭିନ୍ନ କଲ୍ୟାଣମୂଳକ ଯୋଜନା ଓ ସୁବିଧାସୁଯୋଗ ପ୍ରଦାନ କରାଯିବ ବୋଲି ଅଧିକାରୀମାନେ ସୂଚନା ଦେଇଥିଲେ।ଏହି କାର୍ଯ୍ୟକ୍ରମକୁ ସଫଳ କରିବାରେ କଲ୍ୟାଣସିଂହପୁର ଆଇସିଡିଏସ୍‌ର ସମସ୍ତ କର୍ମଚାରୀ ସକ୍ରିୟ ସହଯୋଗ କରିଥିଲେ। ଶିଶୁମାନଙ୍କ ସୁରକ୍ଷା, ଶିକ୍ଷା ଓ ଭବିଷ୍ୟତ ଉନ୍ନତି ପାଇଁ ଏପରି ଶିବିର ଗୁରୁତ୍ୱପୂର୍ଣ୍ଣ ଭୂମିକା ନିଭାଉଥିବା ମତ ପ୍ରକାଶ ହୋଇଛି।