Odisha Janamata : ଅଜଣା ସାପ କାମୁଡ଼ାରେ ଯୁବକଙ୍କ ମୃତ୍ୟୁ |

ଅଜଣା ସାପ କାମୁଡ଼ାରେ ଯୁବକଙ୍କ ମୃତ୍ୟୁ |

14-Jun-2026

ଅଜଣା ସାପ କାମୁଡ଼ାରେ ଯୁବକଙ୍କ ମୃତ୍ୟୁ, ନେଟୱାର୍କ ଅଭାବରୁ ମିଳିଲାନି ଆମ୍ବୁଲାନ୍ସ ସେବା
ଓଡିଶା ଜନମତ, ରାୟଗଡା , ୧୪/୦୬,

କାମେଶ୍ୱର କରକରିଆ :------

ରାୟଗଡା ଜିଲ୍ଲା କଲ୍ୟାଣସିଂହପୁର ବ୍ଲକ ପାର୍ସାଲି ପଞ୍ଚାୟତର ପାରାମଲୀ ଗାଁର ଜଣେ ୨୫ ବର୍ଷୀୟ ଯୁବକଙ୍କ ଅଜଣା ସାପ କାମୁଡ଼ାରେ ମୃତ୍ୟୁ ଘଟିଥିବା ଘଟଣା ସମଗ୍ର ଅଞ୍ଚଳରେ ଶୋକର ଛାୟା ଖେଳାଇ ଦେଇଛି। ମୃତ ଯୁବକ ହେଲେ ସ୍ୱର୍ଗତ ଲତ୍କ ଶିକକାଙ୍କ ପୁଅ ସେତ୍ରୁ ଶିକକା (୨୫)। ସୂଚନା ଅନୁଯାୟୀ, ସେତ୍ରୁ ଗତକାଲି ମୁନିଗୁଡା ବ୍ଲକର ମୁନିଖୋଲ ପଞ୍ଚାୟତ ଅନ୍ତର୍ଗତ ସାନ ଡେଙ୍ଗୁଣି ଗାଁକୁ ଏକ ବିବାହ ଉତ୍ସବରେ ଯୋଗଦେବା ପାଇଁ ଯାଇଥିଲେ। ବାହାଘର କାର୍ଯ୍ୟକ୍ରମ ଶେଷ ହେବା ପରେ ରାତି ଅଧିକ ହୋଇଯାଇଥିବାରୁ ସେ ନିଜ ଗାଁକୁ ଫେରିପାରିନଥିଲେ ଏବଂ ସାଙ୍ଗସାଥୀଙ୍କ ସହ ସେଠାରେ ରାତ୍ରିଯାପନ କରିଥିଲେ। ତେବେ ପାହାନ୍ତିଆ ସମୟରେ ଏକ ଅଜଣା ସାପ ତାଙ୍କୁ କାମୁଡ଼ି ଦେଇଥିବା ଜଣାପଡ଼ିଛି। ସାପ କାମୁଡ଼ା ପରେ ସେତ୍ରୁଙ୍କ ସ୍ୱାସ୍ଥ୍ୟାବସ୍ଥା ହଠାତ୍ ଗୁରୁତର ହୋଇପଡ଼ିଥିଲା। ପରିବାର ଓ ସ୍ଥାନୀୟ ଲୋକଙ୍କ ଅଭିଯୋଗ ଅନୁଯାୟୀ, ଘଟଣାସ୍ଥଳ ଅଞ୍ଚଳରେ ମୋବାଇଲ ନେଟୱାର୍କ ସୁବିଧା ନଥିବାରୁ ସମୟମତେ ଆମ୍ବୁଲାନ୍ସ ସେବା ସହ ଯୋଗାଯୋଗ କରିବା ସମ୍ଭବ ହୋଇନଥିଲା। ଫଳରେ ତୁରନ୍ତ ଚିକିତ୍ସା ସୁବିଧା ମିଳିନଥିବା ବେଳେ କିଛି ସମୟ ମଧ୍ୟରେ ସେତ୍ରୁଙ୍କ ମୃତ୍ୟୁ ଘଟିଥିଲା। ଘଟଣାକୁ ନେଇ ମୁନିଗୁଡା ଥାନାରେ ଅଭିଯୋଗ ହେବା ପରେ ପୋଲିସ ଘଟଣାସ୍ଥଳରେ ପହଞ୍ଚି ଶବ ଜବତ କରିଥିଲା। ପୋଲିସ ଏକ ଅପମୃତ୍ୟୁ ମାମଲା ରୁଜୁ କରି ଶବକୁ ବ୍ୟବଚ୍ଛେଦ ପାଇଁ ପଠାଇଥିଲା। ବ୍ୟବଚ୍ଛେଦ ପରେ ଶବକୁ ପରିବାର ଲୋକଙ୍କ ହସ୍ତାନ୍ତର କରାଯାଇଛି। ସରକାରୀ ନିୟମ ଅନୁଯାୟୀ ମୃତକଙ୍କ ପରିବାରକୁ ଯେଉଁ କ୍ଷତିପୂରଣ ମିଳିବା କଥା, ତାହା ପ୍ରଦାନ କରାଯିବ ବୋଲି ପୋଲିସ ପକ୍ଷରୁ ସୂଚନା ମିଳିଛି। ଜଣେ ଯୁବକଙ୍କ ଏଭଳି ଅକାଳ ବିୟୋଗରେ ପାରାମଲୀ ଗାଁ ସମେତ ଆଖପାଖ ଅଞ୍ଚଳରେ ଗଭୀର ଶୋକର ପରିବେଶ ସୃଷ୍ଟି ହୋଇଛି। ବର୍ଷା ଋତୁ ଆରମ୍ଭ ହେବା ସହ ସାପଙ୍କ ଉପଦ୍ରବ ବୃଦ୍ଧି ପାଉଥିବା ବେଳେ ଦୁର୍ଗମ ଅଞ୍ଚଳରେ ମୋବାଇଲ ନେଟୱାର୍କ, ଆପାତକାଳୀନ ଆମ୍ବୁଲାନ୍ସ ସେବା ଏବଂ ତୁରନ୍ତ ଚିକିତ୍ସା ବ୍ୟବସ୍ଥା ସୁଦୃଢ଼ କରିବା ପାଇଁ ସ୍ଥାନୀୟ ଲୋକେ ଦାବି କରିଛନ୍ତି। ଏହି ଘଟଣା ପୁଣିଥରେ ଦୁର୍ଗମ ଅଞ୍ଚଳରେ ମୌଳିକ ସ୍ୱାସ୍ଥ୍ୟ ଓ ଯୋଗାଯୋଗ ସୁବିଧାର ଅଭାବକୁ ପଦାରେ ପକାଇଛି।