Odisha Janamata : ପ୍ରଧାନମନ୍ତ୍ରୀ ମାତୃ ସୁରକ୍ଷା ଯୋଜନା ରେ ଅବ୍ୟବସ୍ଥା ଅଭିଯୋଗ ||

ପ୍ରଧାନମନ୍ତ୍ରୀ ମାତୃ ସୁରକ୍ଷା ଯୋଜନା ରେ ଅବ୍ୟବସ୍ଥା ଅଭିଯୋଗ ||

10-Jul-2026

ପ୍ରଧାନମନ୍ତ୍ରୀ ମାତୃ ସୁରକ୍ଷା ଯୋଜନାରେ ଅବ୍ୟବସ୍ଥା ଅଭିଯୋଗ: ଗର୍ଭବତୀଙ୍କୁ ଖାଦ୍ୟ ବଣ୍ଟନରେ ବିଳମ୍ବ ଅସନ୍ତୋଷ

ଓଡିଶା ଜନମତ ରାୟଗଡା,୧୦/୭

କାମେଶ୍ୱର କରକରିଆ : -------

ରାୟଗଡ଼ା ଜିଲ୍ଲା କଲ୍ୟାଣସିଂହପୁର ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ପ୍ରତି ମାସର ୯ ତାରିଖରେ ପାଳନ କରାଯାଉଥିବା ପ୍ରଧାନମନ୍ତ୍ରୀ ସୁରକ୍ଷିତ ମାତୃତ୍ୱ ଅଭିଯାନ (PMSMA) କାର୍ଯ୍ୟକ୍ରମରେ ଅବ୍ୟବସ୍ଥା ଓ ଅବହେଳା ଅଭିଯୋଗ ସାମ୍ନାକୁ ଆସିଛି। ଗର୍ଭବତୀ ମହିଳାମାନଙ୍କ ସ୍ୱାସ୍ଥ୍ୟ ପରୀକ୍ଷା ସହ ସେମାନଙ୍କୁ ପୌଷ୍ଟିକ ଖାଦ୍ୟ ଯୋଗାଇ ଦିଆଯିବାର ବ୍ୟବସ୍ଥା ଥିବା ସତ୍ତ୍ୱେ, ଏହାର ସଠିକ୍ ପରିଚାଳନା ହେଉନଥିବା ଅଭିଯୋଗ ହୋଇଛି। ସୂଚନା ଅନୁଯାୟୀ, ପ୍ରତି ମାସର ୯ ତାରିଖରେ ଗର୍ଭବତୀ ମହିଳାମାନଙ୍କର ବିଶେଷ ସ୍ୱାସ୍ଥ୍ୟ ପରୀକ୍ଷା, ରକ୍ତଚାପ, ରକ୍ତହୀନତା, ଶିଶୁର ବିକାଶ ସମେତ ବିଭିନ୍ନ ଆବଶ୍ୟକ ଯାଞ୍ଚ ବିଶେଷଜ୍ଞ ଡାକ୍ତରଙ୍କ ତତ୍ତ୍ୱାବଧାନରେ କରାଯାଇଥାଏ। ଏହି ଉଦ୍ଦେଶ୍ୟରେ ଦୂରଦୂରାନ୍ତରୁ ଅନେକ ଗର୍ଭବତୀ ମହିଳା ସ୍ୱାସ୍ଥ୍ୟ କେନ୍ଦ୍ରକୁ ଆସିଥାନ୍ତି। ତେବେ ଆଜିର କାର୍ଯ୍ୟକ୍ରମରେ ଅନେକ ଗର୍ଭବତୀ ମହିଳାଙ୍କୁ ଦୀର୍ଘ ସମୟ ଧରି ଖାଦ୍ୟ ପାଇଁ ଅପେକ୍ଷା କରିବାକୁ ପଡ଼ିଥିବା ଅଭିଯୋଗ ହୋଇଛି। ଉପସ୍ଥିତ ମହିଳାମାନଙ୍କ କହିବା ଅନୁଯାୟୀ ସେମାନଙ୍କ ପାଇଁ ଖାଦ୍ୟ ପ୍ରସ୍ତୁତ ହୋଇଥିଲେ ମଧ୍ୟ ପ୍ରଥମେ ସ୍ୱାସ୍ଥ୍ୟ କେନ୍ଦ୍ରର କର୍ମଚାରୀମାନେ ଭୋଜନ କରିଥିଲେ। ଏହାପରେ ଅବଶିଷ୍ଟ ଖାଦ୍ୟ ଗର୍ଭବତୀ ମହିଳାମାନଙ୍କୁ ବଣ୍ଟନ କରାଯାଇଥିବାରୁ ସେମାନଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଥିଲା। ଗର୍ଭବତୀ ମହିଳାମାନେ କହିଛନ୍ତି ଯେ ସେମାନେ ସକାଳୁ ଖାଲି ପେଟରେ ସ୍ୱାସ୍ଥ୍ୟ କେନ୍ଦ୍ରକୁ ଆସି ଘଣ୍ଟା ଘଣ୍ଟା ଧରି ପରୀକ୍ଷା ପାଇଁ ଅପେକ୍ଷା କରୁଥିବା ବେଳେ ଖାଦ୍ୟ ବଣ୍ଟନରେ ଅବହେଳା ସେମାନଙ୍କ ପାଇଁ ଅଧିକ କଷ୍ଟଦାୟକ ହୋଇପଡ଼ିଥିଲା। ମାତୃ ଓ ଶିଶୁ ସ୍ୱାସ୍ଥ୍ୟକୁ ସର୍ବାଧିକ ଗୁରୁତ୍ୱ ଦେବାକୁ ସରକାର ବାରମ୍ବାର ନିର୍ଦ୍ଦେଶ ଦେଉଥିବା ସତ୍ତ୍ୱେ ଏଭଳି ଅବ୍ୟବସ୍ଥା ଚିନ୍ତାର ବିଷୟ ବୋଲି ସ୍ଥାନୀୟ ଲୋକମାନେ ମତ ପ୍ରକାଶ କରିଛନ୍ତି।ଏହି ଘଟଣାକୁ ନେଇ ସ୍ୱାସ୍ଥ୍ୟ କେନ୍ଦ୍ରର ବି ପି ଏମ କୈଳାଶ ନାଏକ ଙ୍କ ପରିଚାଳନା ବ୍ୟବସ୍ଥା ଉପରେ ପ୍ରଶ୍ନ ଉଠିଛି। ଗର୍ଭବତୀ ମହିଳାମାନଙ୍କ ପାଇଁ ଉଦ୍ଦିଷ୍ଟ ସେବାରେ କାହିଁକି ଅବହେଳା କରାଗଲା ଏବଂ ଭବିଷ୍ୟତରେ ଏଭଳି ଘଟଣାର ପୁନରାବୃତ୍ତି ରୋକିବା ପାଇଁ କେଉଁ ପଦକ୍ଷେପ ନିଆଯିବ | ଏନେଇ ଜିଲ୍ଲା ସ୍ୱାସ୍ଥ୍ୟ ବିଭାଗ ଦୃଢ଼ କାର୍ଯ୍ୟନୁଷ୍ଠାନ ନେବାକୁ ସାଧାରଣରେ ଦାବି ହେଉଛି।