Odisha Janamata : ମୌଳିକ ସୁବିଧା ରୁ ବଞ୍ଚିତ ବେଳକଣାଗୁଡା ପ୍ରାଥମିକ ବିଦ୍ୟାଳୟ |

ମୌଳିକ ସୁବିଧା ରୁ ବଞ୍ଚିତ ବେଳକଣାଗୁଡା ପ୍ରାଥମିକ ବିଦ୍ୟାଳୟ |

12-Jul-2026

ମୌଳିକ ସୁବିଧାରୁ ବଞ୍ଚିତ ବେଳକଣାଗୁଡା ପ୍ରାଥମିକ ବିଦ୍ୟାଳୟ; ବିଦ୍ୟୁତ, ଶୌଚାଳୟ ଓ ପାଚେରୀ ଅଭାବରେ ପାଠପଢା ବାଧାପ୍ରାପ୍ତ,

ଓଡିଶା ଜନମତ ରାୟଗଡା ,୧୨/୭,

କାମେଶ୍ୱର କରକରିଆ : --------

ରାୟଗଡ଼ା ଜିଲ୍ଲା କଲ୍ୟାଣସିଂହପୁର ବ୍ଲକ ସିକରପାଇ ପଞ୍ଚାୟତ ଅନ୍ତର୍ଗତ ବେଳକଣାଗୁଡା ସରକାରୀ ପ୍ରାଥମିକ ବିଦ୍ୟାଳୟ ଆଜିବି ମୌଳିକ ସୁବିଧାରୁ ବଞ୍ଚିତ ରହିଛି। ସରକାର ସ୍ମାର୍ଟ ଶିକ୍ଷା ବ୍ୟବସ୍ଥା ଓ ବିଦ୍ୟାଳୟର ଭିତ୍ତିଭୂମି ବିକାଶ ଉପରେ ଗୁରୁତ୍ୱ ଦେଉଥିବା ବେଳେ ଏହି ବିଦ୍ୟାଳୟର ଦୟନୀୟ ଅବସ୍ଥା ସ୍ଥାନୀୟ ଅଞ୍ଚଳରେ ଚିନ୍ତାର ବିଷୟ ପାଲଟିଛି। ବିଦ୍ୟାଳୟରେ ବାଲବାଟିକାରୁ ପଞ୍ଚମ ଶ୍ରେଣୀ ପର୍ଯ୍ୟନ୍ତ ପ୍ରାୟ ୨୫ ଜଣ ଛାତ୍ରଛାତ୍ରୀ ପାଠ ପଢ଼ୁଥିବା ବେଳେ ମାତ୍ର ଦୁଇଜଣ ଶିକ୍ଷୟିତ୍ରୀଙ୍କ ଉପରେ ସମସ୍ତ ଶିକ୍ଷାଦାନର ଦାୟିତ୍ୱ ସୀମିତ ରହିଛି। କିନ୍ତୁ ବିଦ୍ୟାଳୟରେ ଶୌଚାଳୟ ବାଥରୁମ, ପାଚେରୀ ଓ ବିଦ୍ୟୁତ ସଂଯୋଗ ନଥିବାରୁ ଛାତ୍ରଛାତ୍ରୀଙ୍କ ସହ ଶିକ୍ଷୟତ୍ରୀ ମାନେ ମଧ୍ୟ ବିଭିନ୍ନ ସମସ୍ୟାର ସମ୍ମୁଖୀନ ହେଉଛନ୍ତି |ବିଦ୍ୟାଳୟକୁ ସରକାରଙ୍କ ପକ୍ଷରୁ ଟିଭି ଓ ଅନ୍ୟାନ୍ୟ ଡିଜିଟାଲ ଶିକ୍ଷା ସାମଗ୍ରୀ ଯୋଗାଇ ଦିଆଯାଇଥିଲେ ମଧ୍ୟ ବିଦ୍ୟୁତ ସଂଯୋଗ ନଥିବାରୁ ସେଗୁଡ଼ିକ ଅକାମୀ ହୋଇ ପଡ଼ିଛି। ଫଳରେ ଛାତ୍ରଛାତ୍ରୀମାନେ ସ୍ମାର୍ଟ ଶିକ୍ଷାର ସୁବିଧାରୁ ବଞ୍ଚିତ ହେଉଛନ୍ତି। ଗ୍ରାମବାସୀଙ୍କ ସହଯୋଗରେ ପଞ୍ଚାୟତ ପକ୍ଷରୁ ସୋଲାର ବ୍ୟବସ୍ଥା କରାଯାଇଥିଲେ ମଧ୍ୟ ବର୍ଷା ଋତୁରେ ପର୍ଯ୍ୟାପ୍ତ ସୂର୍ଯ୍ୟକିରଣ ନ ମିଳିବାରୁ ଏହା କାର୍ଯ୍ୟକ୍ଷମ ହୋଇପାରୁନାହିଁ। ଫଳରେ ବିଦ୍ୟୁତ ନିର୍ଭର ଶିକ୍ଷା ସାମଗ୍ରୀ ବ୍ୟବହାର କରିବା ସମ୍ଭବ ହେଉନାହିଁ। ବିଦ୍ୟାଳୟ ପରିଚାଳନା କମିଟିର ସଭାପତି ଓ ଗ୍ରାମବାସୀଙ୍କ କହିବା ଅନୁଯାୟୀ, ଏହି ସମସ୍ୟା ସମ୍ପର୍କରେ ବାରମ୍ବାର ପିଇଓ ପ୍ରଶାନ୍ତ ସାହୁଙ୍କୁ ଅବଗତ କରାଯାଇଥିଲେ ମଧ୍ୟ ଏପର୍ଯ୍ୟନ୍ତ କୌଣସି ସ୍ଥାୟୀ ସମାଧାନ ହୋଇନାହିଁ। ଏହାକୁ ନେଇ ଅଭିଭାବକ ଓ ଗ୍ରାମବାସୀଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି।ଗ୍ରାମର ସାମାଜିକ କର୍ମୀ କମଲୋଚନ ମିଣିଆକା କହିଛନ୍ତି, ଛାତ୍ରଛାତ୍ରୀଙ୍କ ଭବିଷ୍ୟତକୁ ଦୃଷ୍ଟିରେ ରଖି ବିଦ୍ୟାଳୟରେ ଶୀଘ୍ର ବିଦ୍ୟୁତ ସଂଯୋଗ, ଶୌଚାଳୟ, ପାଚେରୀ ଓ ଅନ୍ୟାନ୍ୟ ମୌଳିକ ସୁବିଧା ଯୋଗାଇ ଦେବାକୁ ପ୍ରଶାସନ ତୁରନ୍ତ ପଦକ୍ଷେପ ନେବା ଆବଶ୍ୟକ ବୋଲି କହିଛନ୍ତି। ଏ ସମ୍ପର୍କ ରେ ପିଇଓ ପ୍ରଶାନ୍ତ ସାହୁ ଙ୍କୁ ଯୋଗାଯୋଗ କରିବାରୁ ସେ କହିଛନ୍ତି ଉପକ୍ତ ଅଧିକାରୀଙ୍କୁ ପ୍ରପଜାଲ ଦିଆଯାଇଛି ଆସିଲେ ଆମେ ଉକ୍ତ ସମସ୍ୟା ଗୁଡିକର କାର୍ଯ୍ୟ ଆରମ୍ଭ କରିବୁ ବୋଲି କହିଛନ୍ତି।