Odisha Janamata : ଲଗାଣ ବର୍ଷା ରେ ଦୁଇ ଘର କାନ୍ଥ ପଡି ପରିବାର କ୍ଷତିଗ୍ରସ୍ତ |

ଲଗାଣ ବର୍ଷା ରେ ଦୁଇ ଘର କାନ୍ଥ ପଡି ପରିବାର କ୍ଷତିଗ୍ରସ୍ତ |

17-Aug-2026

ପ୍ରଶାସନ ର ସହାୟତା ଅପେକ୍ଷାରେ କ୍ଷତିଗ୍ରସ୍ତ ପରିବାର, ଲଗାଣ ବର୍ଷାରେ ପଡିଗଲା ଦୁଇ ଘରର କାନ୍ଥ |

ଓଡିଶା ଜନ ମତ ବ୍ୟୁରୋ,

ଲଘୁଚାପଜନିତ ଲଗାଣ ବର୍ଷାରେ କେନ୍ଦୁଝର ଜିଲ୍ଲା ଯୋଡ଼ା ବ୍ଲକ ଅନ୍ତର୍ଗତ ଭଦ୍ରାସାହି ପଞ୍ଚାୟତର ଟଣ୍ଟ ଗ୍ରାମରେ ଦୁଇଟି ଘରର କାନ୍ଥ ଭୁଶୁଡ଼ି ପଡ଼ିଛି। ଏଥିରେ ଦଶମା ମୁଣ୍ଡା ଓ ରାଉତୁ ଲାଗୁରିଙ୍କ ପରିବାର ପ୍ରଭାବିତ ହୋଇଥିବା ଜଣାପଡ଼ିଛି।
ସୂଚନା ଅନୁଯାୟୀ, ଲଗାଣ ବର୍ଷା ଯୋଗୁଁ ଶୁକ୍ରବାର ବିଳମ୍ବିତ ରାତିରେ ଦଶମା ମୁଣ୍ଡାଙ୍କ ଘରର ଗୋଟିଏ ପଟ କାନ୍ଥ ଧସିବା ଆରମ୍ଭ ହୋଇଥିଲା। ଶନିବାର ସକାଳେ କାନ୍ଥଟି ସମ୍ପୂର୍ଣ୍ଣ ଭାବେ ଭୁଶୁଡ଼ି ପଡ଼ିବାରୁ ଘରଟି ବ୍ୟବହାର ଅନୁପଯୋଗୀ ହୋଇପଡ଼ିଛି। ସୌଭାଗ୍ୟବଶତଃ ଏହି ଘଟଣାରେ ପରିବାରର କୌଣସି ସଦସ୍ୟଙ୍କ ଜୀବନହାନି କିମ୍ବା ଆହତ ହେବା ଭଳି ଅଘଟଣ ଘଟିନାହିଁ।
ସେହିପରି ରାଉତୁ ଲାଗୁରିଙ୍କ ଘରର କାନ୍ଥ ମଧ୍ୟ ବର୍ଷା ଯୋଗୁଁ ଭାଙ୍ଗି ଆଂଶିକ ଭାବେ କ୍ଷତିଗ୍ରସ୍ତ ହୋଇଛି। ଘର ଦୁଇଟି କ୍ଷତିଗ୍ରସ୍ତ ହେବା ପରେ ଦୁଇ ପରିବାର ଏବେ ଦୁର୍ଦ୍ଦଶାରେ ଦିନ କାଟୁଛନ୍ତି। ବର୍ଷା ଜାରି ରହିଥିବାରୁ ସୁରକ୍ଷିତ ଭାବେ ମୁଣ୍ଡ ଗୁଞ୍ଜିବା ପାଇଁ ସେମାନଙ୍କ ସମ୍ମୁଖରେ ସମସ୍ୟା ସୃଷ୍ଟି ହୋଇଛି।
କ୍ଷତିଗ୍ରସ୍ତ ପରିବାରଙ୍କ ଅଭିଯୋଗ ଅନୁଯାୟୀ, ଏପର୍ଯ୍ୟନ୍ତ ପ୍ରଶାସନ ପକ୍ଷରୁ ଘଟଣାସ୍ଥଳରେ ପହଞ୍ଚି କ୍ଷୟକ୍ଷତିର ଆକଳନ କରାଯାଇନାହିଁ। ଏଭଳି ସଙ୍କଟ ସମୟରେ ପୂର୍ବତନ ସରପଞ୍ଚ ଅର୍ଜୁନ ସାଣ୍ଡିଲ ଦଶମା ମୁଣ୍ଡାଙ୍କ ପରିବାରକୁ ଏକ ପାଲ ଯୋଗାଇ ଦେଇଛନ୍ତି। ଏଥିସହ ପରିବାରର ସୁବିଧା-ଅସୁବିଧା ବୁଝିବା ସହ ଆବଶ୍ୟକ ସହଯୋଗ ପାଇଁ ପ୍ରୟାସ କରୁଥିବା ଜଣାପଡ଼ିଛି।
ଅନ୍ୟପକ୍ଷରେ, ଆଗାମୀ ଦିନରେ ପ୍ରବଳ ବର୍ଷାର ଆଶଙ୍କା ଥିବାରୁ ଆଂଶିକ ଭାବେ କ୍ଷତିଗ୍ରସ୍ତ ଘରେ ରହିବା ଦୁଇ ପରିବାର ପାଇଁ ବିପଦପୂର୍ଣ୍ଣ ହୋଇପାରେ। ତେଣୁ ପ୍ରଶାସନ ତୁରନ୍ତ ଘଟଣାସ୍ଥଳ ପରିଦର୍ଶନ କରି କ୍ଷୟକ୍ଷତିର ଆକଳନ କରିବା ସହ ତାରପଲିନ୍‌, ରିଲିଫ୍‌ ସାମଗ୍ରୀ ଓ ଆବଶ୍ୟକ ସହାୟତା ଯୋଗାଇଦେବାକୁ କ୍ଷତିଗ୍ରସ୍ତ ପରିବାର ପକ୍ଷରୁ ଦାବି କରାଯାଇଛି।