Odisha Janamata : ଚାକିରୀ ଦେବା ନାଁରେ 16 ଲକ୍ଷ ଟଙ୍କା ଠକେଇ କରିଥିବା ଅଭିଯୁକ୍ତ ଗିରଫ |

ଚାକିରୀ ଦେବା ନାଁରେ 16 ଲକ୍ଷ ଟଙ୍କା ଠକେଇ କରିଥିବା ଅଭିଯୁକ୍ତ ଗିରଫ |

19-Aug-2026

ଚାକିରି ଦେବା ନାଁରେ ୧୬ ଲକ୍ଷ ଟଙ୍କା ଠକେଇ: ମୁଖ୍ୟ ଅଭିଯୁକ୍ତ ଗିରଫ

ଜାଲ୍‌ OSSSC ମେରିଟ୍‌ ଲିଷ୍ଟ ଦେଖାଇ ଦୁଇଜଣଙ୍କୁ ସରକାରୀ ଚାକିରି ଦେବାର ମିଥ୍ୟା ପ୍ରତିଶ୍ରୁତି; ବ୍ୟାଙ୍କ କାରବାର ରସିଦ ଓ ଜାଲ୍‌ ଦସ୍ତାବିଜ ଜବତ |

ଓଡିଶା ଜନ ମତ,ବ୍ରହ୍ମପୁର, ୧୯/୮, କୃଷ୍ଣ ଚନ୍ଦ୍ରସାମନ୍ତରା ;---

ଚାକିରି ଦେବାର ମିଥ୍ୟା ପ୍ରତିଶ୍ରୁତି ଦେଇ ୧୬ ଲକ୍ଷ ଟଙ୍କାରୁ ଅଧିକ ଠକେଇ ଅଭିଯୋଗରେ ଗୋସାନିନୂଆଗାଁ ପୋଲିସ ଜଣେ ମୁଖ୍ୟ ଅଭିଯୁକ୍ତଙ୍କୁ ଗିରଫ କରିଛି। ଗିରଫ ଅଭିଯୁକ୍ତ ହେଲେ ନୟାଗଡ଼ ଜିଲ୍ଲା ସାରଣାକୁଲା ଥାନା ଅନ୍ତର୍ଗତ ଗୋଲା ସାହିର ଶ୍ୟାମ ସୁନ୍ଦର ପାତ୍ର (୬୧)। ପୋଲିସ ସୂଚନା ଅନୁଯାୟୀ, ଏନେଇ ଗୋସାନିନୂଆଗାଁ ଥାନାରେ କେସ୍‌ ନମ୍ବର ୧୬୧/୨୦୨୬ ରୁଜୁ ହୋଇଛି। ମାମଲାରେ ବିଏନ୍‌ଏସ୍‌ର ବିଭିନ୍ନ ଧାରା ଲାଗୁ କରାଯାଇ ତଦନ୍ତ ଚାଲିଛି। ଅଭିଯୋଗ ଅନୁସାରେ, ବ୍ରହ୍ମପୁର ଜଳେଶ୍ୱର ବିହାରର ବାସିନ୍ଦା ପ୍ରିୟ ରଞ୍ଜନ ପାତ୍ରୋ (୩୩) ଗତ ୬ ମେ ୨୦୨୬ରେ ଗୋସାନିନୂଆଗାଁ ଥାନାରେ ଲିଖିତ ଅଭିଯୋଗ କରିଥିଲେ। ଅଭିଯୁକ୍ତ ପ୍ରଥମେ ପରିବାରର ଜରୁରୀକାଳୀନ ଚିକିତ୍ସା ଖର୍ଚ୍ଚର ଆବଶ୍ୟକତା ଦର୍ଶାଇ ୧୯ ଏପ୍ରିଲ ୨୦୨୩ରେ ଅଭିଯୋଗକାରୀଙ୍କଠାରୁ ୧ ଲକ୍ଷ ଟଙ୍କା ନେଇଥିବା ଅଭିଯୋଗ ରହିଛି। ପରେ ଅଭିଯୁକ୍ତ ଅଭିଯୋଗକାରୀଙ୍କୁ ପଞ୍ଚାୟତ କାର୍ଯ୍ୟନିର୍ବାହୀ ଅଧିକାରୀ (PEO) ଏବଂ ତାଙ୍କ ପତ୍ନୀ ଏମ୍‌. ରୋଜା ପାତ୍ରୋଙ୍କୁ ଜୁନିୟର ଆସିଷ୍ଟାଣ୍ଟ (JA) ପଦରେ ସରକାରୀ ଚାକିରି କରାଇଦେବାର ପ୍ରତିଶ୍ରୁତି ଦେଇଥିଲେ। ଏହି ପ୍ରତିଶ୍ରୁତି ଦେଇ ବିଭିନ୍ନ ସମୟରେ ଅନଲାଇନ୍‌ NEFT କାରବାର ଜରିଆରେ ଆଉ ୧୫ ଲକ୍ଷ ଟଙ୍କା ନେଇଥିବା ଅଭିଯୋଗ ହୋଇଛି। ଠକେଇକୁ ବିଶ୍ୱସନୀୟ ଦେଖାଇବା ପାଇଁ ଅଭିଯୁକ୍ତ ଜାଲ୍‌ OSSSC ମେରିଟ୍‌ ଲିଷ୍ଟ ଦେଖାଇଥିଲେ। ଏଥିରେ ଅଭିଯୋଗକାରୀ, ତାଙ୍କ ପତ୍ନୀ ଏବଂ ଅଭିଯୁକ୍ତଙ୍କ ପୁଅମାନଙ୍କ ନାମ ଥିବା ଅଭିଯୋଗ ରହିଛି। ଏଥିସହ ଜାଲ୍‌ ଷ୍ଟାମ୍ପ ଲାଗିଥିବା ଚୁକ୍ତିନାମା ଦସ୍ତାବିଜ ମଧ୍ୟ ପ୍ରଦାନ କରାଯାଇଥିଲା। ତେବେ ପ୍ରତିଶ୍ରୁତି ଅନୁଯାୟୀ ଚାକିରି ନମିଳିବା ପରେ ଅଭିଯୋଗକାରୀ ନିଜ ଟଙ୍କା ଫେରସ୍ତ ମାଗିଥିଲେ। ଏହାକୁ ନେଇ ଅଭିଯୁକ୍ତମାନେ ତାଙ୍କୁ ଅଶ୍ଳୀଳ ଭାଷାରେ ଗାଳିଗୁଲଜ କରିବା ସହ ଅପହରଣ ଏବଂ ହତ୍ୟା କରିବାର ଧମକ ଦେଇଥିବା ଅଭିଯୋଗରେ ଉଲ୍ଲେଖ ରହିଛି। ତଦନ୍ତ ପରେ ପୋଲିସ ଗତ ୧୮ ଜୁନ୍‌ ୨୦୨୬ ସନ୍ଧ୍ୟା ପ୍ରାୟ ୫ଟା ୪୫ରେ ଶ୍ୟାମ ସୁନ୍ଦର ପାତ୍ରଙ୍କୁ ଗିରଫ କରିଥିଲା। ପଚରାଉଚରା ସମୟରେ ସେ ଅପରାଧ ସମ୍ପର୍କରେ ସ୍ୱୀକାରୋକ୍ତି ଦେଇଥିବା ପୋଲିସ ପକ୍ଷରୁ କୁହାଯାଇଛି। ତାଙ୍କୁ ବିଚାର ବିଭାଗୀୟ ରିମାଣ୍ଡ ପାଇଁ ବ୍ରହ୍ମପୁର ଉପଖଣ୍ଡ ବିଚାର ବିଭାଗୀୟ ମାଜିଷ୍ଟ୍ରେଟଙ୍କ ଅଦାଲତକୁ ପଠାଯାଇଛି। ପୋଲିସର ତଦନ୍ତରୁ ଅଭିଯୁକ୍ତ ଜଣେ ପୁନରାବୃତ୍ତି ଅପରାଧୀ ବୋଲି ଜଣାପଡ଼ିଛି। ତାଙ୍କ ବିରୋଧରେ ଓଡ଼ଗାଁ ଥାନା କେସ୍‌ ନମ୍ବର ୩୭୯/୨୦୨୫ ମଧ୍ୟ ରହିଥିବା ପୋଲିସ ସୂଚନା ଦେଇଛି। ଚାକିରି ଠକେଇରୁ ସତର୍କ ରହିବାକୁ ପୋଲିସର ପରାମର୍ଶ । ଚାକିରି ଦେବା ନାଁରେ କୌଣସି ବ୍ୟକ୍ତିଙ୍କୁ ଟଙ୍କା ନଦେବାକୁ ବ୍ରହ୍ମପୁର ପୋଲିସ ଜନସାଧାରଣଙ୍କୁ ସତର୍କ କରିଛି। ଉଚ୍ଚପଦସ୍ଥ ଅଧିକାରୀ, ରେଳ ବିଭାଗ କିମ୍ବା ବଡ଼ କମ୍ପାନୀ ସହ ସମ୍ପର୍କ ଥିବା ଦାବି କରୁଥିବା ଦଲାଲଙ୍କ ପ୍ରଲୋଭନରେ ନପଡ଼ିବାକୁ କୁହାଯାଇଛି। କୌଣସି ନିଯୁକ୍ତି ପ୍ରସ୍ତାବ ମିଳିଲେ ସରକାରୀ ୱେବସାଇଟ୍‌, ନିଯୁକ୍ତି ବିନିମୟ କିମ୍ବା ସମ୍ପୃକ୍ତ ସରକାରୀ ପୋର୍ଟାଲ୍‌ ମାଧ୍ୟମରେ ତାହାର ସତ୍ୟତା ଯାଞ୍ଚ କରିବାକୁ ପୋଲିସ ପରାମର୍ଶ ଦେଇଛି। ଏଭଳି କୌଣସି ଠକେଇର ଶିକାର ହେଲେ ନିକଟସ୍ଥ ଥାନାରେ ଅଭିଯୋଗ କରିବା ସହ ତୁରନ୍ତ ୧୧୨କୁ ଫୋନ୍‌ କରିବାକୁ ଅନୁରୋଧ କରାଯାଇଛି। ଚାକିରି ନାଁରେ ଠକେଇ କରୁଥିବା ଗ୍ୟାଙ୍ଗ ବିରୋଧରେ ବ୍ରହ୍ମପୁର ପୋଲିସ ପକ୍ଷରୁ ଅଭିଯାନ ଜାରି ରହିଥିବା ବେଳେ ଏଭଳି ଠକେଇରୁ ରକ୍ଷା ପାଇବା ପାଇଁ ସଚେତନତା ଓ ସତର୍କତା ହିଁ ସର୍ବୋତ୍ତମ ଉପାୟ ବୋଲି ପୋଲିସ ପକ୍ଷରୁ କୁହାଯାଇଛି। ଗଂଜାମ ଜିଲ୍ଲା ପ୍ରତିନିଧି କୃଷ୍ଣ ଚନ୍ଦ୍ର ସାମନ୍ତରାୟ ଙ୍କ ରିପୋର୍ଟ