Odisha Janamata : ଆବାସିକ ସେବାଶ୍ରମ ପାର୍ସାଲିର ପ୍ରଧାନ ସେବକ ଙ୍କୁ ଅବସର କାଳୀନ ବିଦାୟ ସମ୍ବର୍ଦ୍ଧନା |

ଆବାସିକ ସେବାଶ୍ରମ ପାର୍ସାଲିର ପ୍ରଧାନ ସେବକ ଙ୍କୁ ଅବସର କାଳୀନ ବିଦାୟ ସମ୍ବର୍ଦ୍ଧନା |

16-Oct-2026

ଆବାସିକ ସେବାଶ୍ରମ ପାର୍ସାଲିର ପ୍ରଧାନ ସେବକଙ୍କୁ ଅବସରକାଳୀନ ବିଦାୟ ସମ୍ବର୍ଦ୍ଧନା

ଶିକ୍ଷକ, ଶିକ୍ଷୟିତ୍ରୀ ଓ ଛାତ୍ରଛାତ୍ରୀଙ୍କ ପକ୍ଷରୁ ଭାବବିହ୍ୱଳ ବିଦାୟ

ଓଡିଶା ଜନମତ ରାୟଗଡ଼ା, ୧୪/୧୦( କାମେଶ୍ୱର କରକରିଆ):- ରାୟଗଡ଼ା ଜିଲ୍ଲା କଲ୍ୟାଣସିଂହପୁର ବ୍ଲକ୍‌ ଅନ୍ତର୍ଗତ ପାର୍ସାଲି ଆବାସିକ ସେବାଶ୍ରମର ପ୍ରଧାନ ସେବକ ଶ୍ରୀ ଚନ୍ଦ୍ରସେନ ଶ୍ରୀରାମଙ୍କ ଅବସରକାଳୀନ ବିଦାୟ ସମ୍ବର୍ଦ୍ଧନା ସଭା ବୁଧବାର ଅନୁଷ୍ଠିତ ହୋଇଯାଇଛି। ଦୀର୍ଘଦିନ ଧରି ଶିକ୍ଷା ଓ ଛାତ୍ରଛାତ୍ରୀଙ୍କ ସେବାରେ ନିଜକୁ ନିୟୋଜିତ କରିଥିବା ଶ୍ରୀରାମଙ୍କୁ ଏହି ଅବସରରେ ଶିକ୍ଷକ, ଶିକ୍ଷୟିତ୍ରୀ ଓ ଛାତ୍ରୀମାନଙ୍କ ପକ୍ଷରୁ ଭାବବିହ୍ୱଳ ବିଦାୟ ଦିଆଯାଇଥିଲା। ଏହି ସଭାରେ ମୁଖ୍ୟ ଅତିଥି ଭାବେ ବ୍ଲକ୍‌ ସମ୍ପ୍ରସାରଣ ଅଧିକାରୀ ଶ୍ରୀ ଚନ୍ଦନଦାସ ବାଙ୍ଗାରି ଯୋଗଦେଇଥିବା ବେଳେ ଏସ୍‌ଏମ୍‌ସି ସଭାପତି ଶ୍ରୀ ମୁନା ସିକକା ଓ ଭାରପ୍ରାପ୍ତ ପ୍ରଧାନ ସେବିକା ଶ୍ରୀମତୀ ଅଞ୍ଜଳି ନାଚିକା ମଞ୍ଚାସୀନ ଥିଲେ। ପ୍ରାରମ୍ଭରେ ସେବାଶ୍ରମର ଶିକ୍ଷକ ଓ ଶିକ୍ଷୟିତ୍ରୀମାନେ ପୁଷ୍ପଗୁଚ୍ଛ ପ୍ରଦାନ କରି ଶ୍ରୀରାମଙ୍କୁ ସ୍ୱାଗତ ଜଣାଇଥିଲେ। ପରେ ସେବାଶ୍ରମର ଛାତ୍ରୀମାନେ ବିଦାୟକାଳୀନ ସଙ୍ଗୀତ ପରିବେଷଣ କରିଥିଲେ। ଏହି କାର୍ଯ୍ୟକ୍ରମରେ ଅବସରପ୍ରାପ୍ତ ପ୍ରଧାନ ସେବକ ଶ୍ରୀରାମଙ୍କ ପରିବାର ସଦସ୍ୟ ମଧ୍ୟ ଉପସ୍ଥିତ ଥିଲେ। ସଭାରେ ଶିକ୍ଷକ ଶ୍ରୀ ଆରକ୍ଷିତ କୌଶଲ୍ୟା, ଶ୍ରୀ ବୀରେନ୍ଦ୍ର କୌଶଲ୍ୟା, ଶ୍ରୀ ଚନ୍ଦ୍ରଶେଖର କାଡ୍ରାକା ଓ ଭାରପ୍ରାପ୍ତ ପ୍ରଧାନ ସେବିକା ଶ୍ରୀମତୀ ଅଞ୍ଜଳି ନାଚିକା ଶ୍ରୀରାମଙ୍କ କାର୍ଯ୍ୟଦକ୍ଷତା, ଶିକ୍ଷା ପ୍ରତି ନିଷ୍ଠା ଓ ଛାତ୍ରଛାତ୍ରୀଙ୍କ ପ୍ରତି ତାଙ୍କର ଅବଦାନ ସମ୍ପର୍କରେ ନିଜ ନିଜର ମତ ରଖିଥିଲେ। ତାଙ୍କର କର୍ମମୟ ଜୀବନ ଅନ୍ୟ ଶିକ୍ଷକମାନଙ୍କ ପାଇଁ ପ୍ରେରଣାଦାୟକ ବୋଲି ମତ ପ୍ରକାଶ ପାଇଥିଲା। ମୁଖ୍ୟ ଅତିଥି ଶ୍ରୀ ଚନ୍ଦନଦାସ ବାଙ୍ଗାରି ନିଜ ଅଭିଭାଷଣରେ ଶିକ୍ଷାଦାନ ସହିତ ଛାତ୍ରଛାତ୍ରୀଙ୍କ ଉତ୍ତମ ଚରିତ୍ର ଗଠନ ଓ କର୍ତ୍ତବ୍ୟନିଷ୍ଠା ଉପରେ ଗୁରୁତ୍ୱାରୋପ କରିଥିଲେ। ଅବସରପ୍ରାପ୍ତ ପ୍ରଧାନ ସେବକ ଶ୍ରୀରାମ ମଧ୍ୟ ସେବାଶ୍ରମର ଛାତ୍ରଛାତ୍ରୀଙ୍କୁ ଶିକ୍ଷାର ମହତ୍ତ୍ୱ ଓ ଜୀବନରେ କର୍ତ୍ତବ୍ୟ ପାଳନର ଆବଶ୍ୟକତା ସମ୍ପର୍କରେ ବୁଝାଇଥିଲେ। ଏଥିସହ ଶିକ୍ଷକ ଓ ଶିକ୍ଷୟିତ୍ରୀମାନଙ୍କୁ ନିଜ କର୍ତ୍ତବ୍ୟକୁ ସେବା ମନୋଭାବ ନେଇ ସମ୍ପାଦନ କରିବାକୁ ପରାମର୍ଶ ଦେଇଥିଲେ।
ଶେଷରେ ସେବାଶ୍ରମର ସମସ୍ତ ଶିକ୍ଷକ, ଶିକ୍ଷୟିତ୍ରୀ, ଏଏନ୍‌ଏମ୍‌, ସିସିଏ ଓ ଏଲ୍‌ସିସିଏଙ୍କ ସହଯୋଗରେ କାର୍ଯ୍ୟକ୍ରମ ସମ୍ପନ୍ନ ହୋଇଥିଲା। ଶ୍ରୀରାମଙ୍କ ଅବସର ଅବସରରେ ତାଙ୍କର ଦୀର୍ଘଦିନର ସେବା ଓ ଅବଦାନକୁ ମନେ ପକାଇ ସମସ୍ତେ ତାଙ୍କର ସୁସ୍ଥ, ସୁଖମୟ ଓ ଶାନ୍ତିପୂର୍ଣ୍ଣ ଅବସର ଜୀବନ କାମନା କରିଥିଲେ।