ଖଲ୍ଲିକୋଟ ଠାରେ ଥିବା ଜିଲ୍ଲା ଶିକ୍ଷା ଓ ପ୍ରଶିକ୍ଷଣ ପ୍ରତିଷ୍ଠାନ ତରଫରୁ ବିଶ୍ୱ ଦିବ୍ୟାଙ୍ଗ ଦିବସ ପାଳିତ |
03-Dec-2025
ଜିଲ୍ଲା ଶିକ୍ଷା ଓ ପ୍ରଶିକ୍ଷଣ ପ୍ରତିଷ୍ଠାନ, ଗଂଜାମ, ଖଲ୍ଲିକୋଟ ପକ୍ଷରୁ ଅନ୍ତର୍ଜାତୀୟ ଦିବ୍ୟାଙ୍ଗ ଦିବସ ପାଳିତ
ଓଡିଶା ଜନ ମତ ବ୍ୟୁରୋ
ଜିଲ୍ଲା ଶିକ୍ଷା ଓ ପ୍ରଶିକ୍ଷଣ ପ୍ରତିଷ୍ଠାନ, ଗଞ୍ଜାମ, ଖଲ୍ଲିକୋଟ ପକ୍ଷରୁ ଅନ୍ତର୍ଜାତୀୟ ଦିବ୍ୟାଙ୍ଗ ଦିବସ ଆନୁଷ୍ଠାନିକ ରୀତିରେ ପାଳିତ ହୋଇଯାଇଅଛି । ଅନୁଷ୍ଠାନର ବରିଷ୍ଠ ଶିକ୍ଷକ ପ୍ରଶିକ୍ଷକ ବିଷ୍ଣୁ ନାରାୟଣ ଜେନା ଅନ୍ତର୍ଜାତୀୟ ଦିବ୍ୟାଙ୍ଗ ଦିବସର ଲକ୍ଷ୍ୟ ଆଭିମୁଖ୍ୟ ସଂପର୍କରେ ସବିଶେଷ ଆଲୋଚନା କରିଥିଲେ । ଏହି କାର୍ଯ୍ୟକୁ ଶିକ୍ଷକ ପ୍ରଶିକ୍ଷକ ନବୀନ କୁମାର ପ୍ରମାଣିକ ସଂଯୋଜନା କରିଥିବା ବେଳେ ପ୍ରଥମ ବର୍ଷର ଗୁରୁ ଛାତ୍ର ଗଜେନ୍ଦ୍ର ଭୂୟାଁ ଓ ଗୁରୁ ଛାତ୍ରୀ ଚିନ୍ମୟୀ ସାହୁ ମଞ୍ଚ ପରିଚାଳନା କରୁଥିଲେ । ଉକ୍ତ ଦିବସ ଉପଲକ୍ଷେ ପଦଯାତ୍ରା, ସ୍ଲୋଗାନ, କବିତା ପାଠ ଏବଂ ପୋଷ୍ଟର ପ୍ରସ୍ତୁତି ପ୍ରତିଯୋଗିତା ଆଦି ଆୟୋଜନ କରାଯାଇଥିଲା ।
ଅନୁଷ୍ଠାନର ସମସ୍ତ ଗୁରୁ ଛାତ୍ର ଛାତ୍ରୀ ଏଥିରେ ଅଂଶଗ୍ରହଣ କରି ନିଜ ନିଜର ବକ୍ତବ୍ୟ ପ୍ରତିପାଦନ କରିଥିଲେ । ପ୍ରତିବର୍ଷ ପ୍ରତିଷ୍ଠାନରେ ୩ ଡିସେମ୍ବରକୁ ଅନ୍ତର୍ଜାତୀୟ ଦିବ୍ୟାଙ୍ଗ ଦିବସ ଭାବେ ପାଳନ କରାଯାଉଅଛି । ସମସ୍ତଙ୍କ ମଧ୍ୟରେ ସମାନ ଅଧିକାର, ସମାନ ସୁଯୋଗ ଓ ସଶକ୍ତିକରଣ ପ୍ରତିଷ୍ଠା କରିବା ଏହି ଦିବସର ପ୍ରମୁଖ ଉଦ୍ଦେଶ୍ୟ ବୋଲି ମତପ୍ରକାଶ ପାଇଛି । ଦିବ୍ୟାଙ୍ଗ ଭାଇ–ଭଉଣୀମାନଙ୍କ ପ୍ରତି ଶ୍ରଦ୍ଧା ସମ୍ମାନ, ସହାନୁଭୂତି ଓ ସହଯୋଗ ଦେଇ ଆମେ ତାଙ୍କ ଜୀବନରେ ଆଶାର ଆଲୋକ ଜଳାଇପାରିବା । ସମାଜର ପ୍ରତ୍ୟେକ ନାଗରିକଙ୍କ ଦାୟିତ୍ୱ ହେଉଛି ଦିବ୍ୟାଙ୍ଗଙ୍କୁ ସମାନ ସୁବିଧା ଏବଂ ସମର୍ଥନ ଦେବା ।
ଆୟୋଜିତ ହୋଇଥିବା ପୋଷ୍ଟର ପ୍ରସ୍ତୁତି ପ୍ରତିଯୋଗିତାରେ ଦଳ -୪ ପ୍ରଥମ ସ୍ଥାନ ହାସଲ କରିଥିଲେ,ଦଳ -୨ ଦ୍ୱିତୀୟ ସ୍ଥାନ ହାସଲ କରିଥିବା ବେଳେ ଦଳ - ୮ ତୃତୀୟ ସ୍ଥାନ ଅଧିକାର କରିଥିଲେ । ଅନୁଷ୍ଠାନର ବରିଷ୍ଠ ଶିକ୍ଷକ ପ୍ରଶିକ୍ଷକ ଅଭିରାମ ବିଶ୍ବାଳ, ବିଷ୍ଣୁ ନାରାୟଣ ଜେନା, ଶିକ୍ଷକ ପ୍ରଶିକ୍ଷିକା ଜୟନ୍ତୀ ବେହେରା, ଭାବିଲିତା ନାୟକ, ଗାୟତ୍ରୀ ସ୍ବାଇଁ, ଶିକ୍ଷକ ପ୍ରଶିକ୍ଷକ ଜିତେନ୍ଦ୍ର କୁମାର ପଣ୍ଡା, ସୁକୁଲେଇ ଟୁଡୁ ଏବଂ ଆଇ. ସି. ଟି. ପ୍ରଶିକ୍ଷକ ମନୋରଞ୍ଜନ ବାରିକ୍ ପ୍ରଭୁତି ଉପସ୍ଥିତ ରହି ନିଜର ବକ୍ତବ୍ୟ ପ୍ରଦାନ କରିଥିଲେ । ବିଚାରକ ମଣ୍ଡଳୀ ଭାବରେ ଶିକ୍ଷକ ପ୍ରଶିକ୍ଷିକା କଲ୍ୟାଣୀ କୁମାରୀ ଗୌଡ଼, ବବିତା ସିଂ ନାୟକ ଏବଂ ଶିକ୍ଷକ ପ୍ରଶିକ୍ଷକ ମୁକ୍ତି କାନ୍ତ ବେହେରା ଉପସ୍ଥିତ ରହି ନିରୀକ୍ଷଣ କରିଥିଲେ । ଶେଷରେ ଶିକ୍ଷକ ପ୍ରଶିକ୍ଷକ ନବୀନ କୁମାର ପ୍ରମାଣିକ ସମସ୍ତଙ୍କୁ ଧନ୍ୟବାଦ ଜ୍ଞାପନ କରିଥିଲେ ।
Breaking
News