Odisha Janamata : କନ୍ଧ କୂଳ ସମାଜର ପୂର୍ବତନ ସଭାପତି ବିଶ୍ଵନାଥ କାଡାକାଙ୍କ ପରଲୋକ |

କନ୍ଧ କୂଳ ସମାଜର ପୂର୍ବତନ ସଭାପତି ବିଶ୍ଵନାଥ କାଡାକାଙ୍କ ପରଲୋକ |

25-Jul-2026

ଜଣାଶୁଣା ଶିକ୍ଷକ ତଥା କନ୍ଧକୁଳ ସମାଜର ପୂର୍ବତନ ସଭାପତି ବିଶ୍ୱନାଥ କାଡ୍ରାକାଙ୍କ ପରଲୋକ |

ଓଡିଶା ଜନମତ ରାୟଗଡ଼ା, ୨୫/୭,

କାମେଶ୍ୱର କରକରିଆ : ------

ରାୟଗଡ଼ା ଜିଲ୍ଲା କଲ୍ୟାଣସିଂହପୁର ବ୍ଲକ ନାରାୟଣପୁର ପଞ୍ଚାୟତ ଅନ୍ତର୍ଗତ ସିରିପୁର ଗ୍ରାମର ଜଣାଶୁଣା ଶିକ୍ଷକ ତଥା କନ୍ଧକୁଳ ସମାଜର ପୂର୍ବତନ ସଭାପତି ବିଶ୍ୱନାଥ କାଡ୍ରାକାଙ୍କ ଅକାଳ ବିୟୋଗ ଘଟିଛି। ତାଙ୍କ ବିୟୋଗ ଖବର ପ୍ରଚାରିତ ହେବା ପରେ କଲ୍ୟାଣସିଂହପୁର ବ୍ଲକ ସମେତ ସମଗ୍ର ଜିଲ୍ଲାରେ ଶୋକର ଛାୟା ଖେଳିଯାଇଛି। ସ୍ୱର୍ଗତ କାଡ୍ରାକା ନାରାୟଣପୁର ପଞ୍ଚାୟତର ଭାତପରଷି ପ୍ରାଥମିକ ବିଦ୍ୟାଳୟରେ ଦୀର୍ଘଦିନ ଧରି ଶିକ୍ଷକ ଭାବେ କାର୍ଯ୍ୟରତ ଥିଲେ। ଜଣେ ଦକ୍ଷ, କର୍ତ୍ତବ୍ୟନିଷ୍ଠ ଓ ଛାତ୍ରବତ୍ସଳ ଶିକ୍ଷକ ଭାବେ ସେ ସମସ୍ତଙ୍କ ପ୍ରିୟ ଥିଲେ। ଏହା ସହିତ କନ୍ଧକୁଳ ସମାଜର ପୂର୍ବତନ ସଭାପତି ଭାବେ ଦୀର୍ଘ ବର୍ଷ ଧରି ସମାଜର ସଂଗଠନ, ଏକତା ଓ ବିକାଶ ଦିଗରେ ଉଲ୍ଲେଖନୀୟ ଅବଦାନ ରଖିଥିଲେ। ପରିବାର ସୂତ୍ରରୁ ପ୍ରକାଶ ଯେ, ପବିତ୍ର ବାହୁଡ଼ା ଯାତ୍ରା ଅବସରରେ ସେ ଯାତ୍ରାରେ ଯୋଗଦେଇ ବହୁ ଲୋକଙ୍କ ସହ ହସଖୁସିରେ ସମୟ ଅତିବାହିତ କରି ସନ୍ଧ୍ୟାରେ ଘରକୁ ଫେରିଥିଲେ। କିନ୍ତୁ ପରଦିନ ପାହାନ୍ତିଆ ସମୟରେ ପରିବାର ଲୋକେ ତାଙ୍କୁ ଉଠାଇବାକୁ ଯାଇଥିବା ବେଳେ ସେ ଆଉ ନିଦ୍ରାରୁ ଉଠିନଥିଲେ। ନିଦ୍ରାବସ୍ଥାରେ ହିଁ ତାଙ୍କର ପରଲୋକ ଘଟିଥିବା ଜଣାପଡ଼ିଛି। ଏହି ଦୁଃଖଦ ଖବର ପ୍ରଚାରିତ ହେବା ପରେ କନ୍ଧକୁଳ ସମାଜର ବହୁ ସଦସ୍ୟ, ବୁଦ୍ଧିଜୀବୀ, ଶିକ୍ଷକ, ବିଭିନ୍ନ ସଂଗଠନର ପ୍ରତିନିଧି ଓ ଶୁଭେଚ୍ଛୁମାନେ ସିରିପୁର ଗ୍ରାମରେ ପହଞ୍ଚି ସ୍ୱର୍ଗତ କାଡ୍ରାକାଙ୍କ ପ୍ରତି ଶେଷ ଶ୍ରଦ୍ଧାଞ୍ଜଳି ଜଣାଇଥିଲେ। ପୂର୍ବତନ ମନ୍ତ୍ରୀ ଜଗନ୍ନାଥ ସାରକା ଓ ରାୟଗଡ଼ା ବିଧାୟକ ଆପଲସ୍ୱାମୀ କାଡ୍ରାକା ମଧ୍ୟ ତାଙ୍କ ବାସଭବନରେ ପହଞ୍ଚି ସ୍ୱର୍ଗତ କାଡ୍ରାକାଙ୍କ ପାର୍ଥିବ ଶରୀରରେ ପୁଷ୍ପମାଲ୍ୟ ଅର୍ପଣ କରି ଶେଷ ଶ୍ରଦ୍ଧାଞ୍ଜଳି ଜଣାଇବା ସହ ଶୋକସନ୍ତପ୍ତ ପରିବାରବର୍ଗଙ୍କୁ ସମବେଦନା ଜଣାଇଥିଲେ। ପରେ ତାଙ୍କର ଶେଷକୃତ୍ୟ ସମ୍ପନ୍ନ ହୋଇଥିଲା। ଜଣେ ଆଦର୍ଶ ଶିକ୍ଷକ, ସମାଜସେବୀ ଓ କନ୍ଧକୁଳ ସମାଜର ସଂଗଠକଙ୍କ ବିୟୋଗରେ ଅଞ୍ଚଳବାସୀ ଜଣେ ସ୍ନେହୀ, ମିଷ୍ଟଭାଷୀ ଓ କର୍ମଠ ବ୍ୟକ୍ତିତ୍ୱଙ୍କୁ ହରାଇଥିବା ପ୍ରକାଶ କରିଛନ୍ତି।