Odisha Janamata : ନିମ୍ନ ମାନର କାମ ଯୋଗୁଁ ବର୍ଷା ରେ ଛାତ ରୁ ଗଳୁ ଥିବା ଓଦା ଘରେ ପଢୁଛନ୍ତି ପିଲା |

ନିମ୍ନ ମାନର କାମ ଯୋଗୁଁ ବର୍ଷା ରେ ଛାତ ରୁ ଗଳୁ ଥିବା ଓଦା ଘରେ ପଢୁଛନ୍ତି ପିଲା |

28-Jul-2026

ନିମ୍ନମାନର ମରାମତିର ପରିଣାମ? ବର୍ଷାରେ ଛାତରୁ ଝରୁଛି ପାଣି
ଓଦା ଶ୍ରେଣୀଗୃହରେ ଚାଲିଛି ପାଠପଢ଼ା
ଓଡିଶା ଜନମତ ରାୟଗଡା , ୨୮/୭,

କାମେଶ୍ୱର କରକରିଆ :------

ରାୟଗଡ଼ା ଜିଲ୍ଲା କଲ୍ୟାଣସିଂହପୁର ବ୍ଲକ ବୁଡ଼ାଗୁଡ଼ା ଗ୍ରାମ ପଞ୍ଚାୟତ ଅଧୀନ ବଳଦିଆ ସରକାରୀ ପ୍ରାଥମିକ ବିଦ୍ୟାଳୟର ଅବସ୍ଥା ଏବେ ଚିନ୍ତାଜନକ ହୋଇପଡ଼ିଛି। ସମ୍ପ୍ରତି ବିଦ୍ୟାଳୟର ମରାମତି କାମ କରାଯାଇଥିଲେ ମଧ୍ୟ ସାମାନ୍ୟ ବର୍ଷା ହେଲେ ଛାତରୁ ପାଣି ଝରୁଥିବାରୁ ଶ୍ରେଣୀଗୃହ ସମ୍ପୂର୍ଣ୍ଣ ଓଦା ହୋଇଯାଉଛି। ଫଳରେ ଛାତ୍ରଛାତ୍ରୀମାନେ ଭୟଭୀତ ପରିବେଶରେ ପାଠ ପଢ଼ିବାକୁ ବାଧ୍ୟ ହେଉଛନ୍ତି। ବିଦ୍ୟାଳୟର ଶ୍ରେଣୀଗୃହ ଭିତରେ ବର୍ଷା ପାଣି ପଡ଼ୁଥିବାରୁ ପିଲାମାନଙ୍କ ବସି ପାଠ ପଢ଼ିବା ଅତ୍ୟନ୍ତ କଷ୍ଟସାଧ୍ୟ ହୋଇପଡ଼ିଛି। ବାହାର ପିଣ୍ଡା ବର୍ଷାରେ ଭିଜୁଥିବା ବେଳେ ଭିତରେ ମଧ୍ୟ ସମାନ ଅବସ୍ଥା ଦେଖିବାକୁ ମିଳୁଛି। ବିଦ୍ୟାଳୟରେ ଦୁଇଟି ଶ୍ରେଣୀଗୃହ ଓ ଗୋଟିଏ ରୋଷେଇ ଘର ରହିଥିବା ବେଳେ ଏଠାରେ ମୋଟ ୪୯ ଜଣ ଛାତ୍ରଛାତ୍ରୀ ପାଠ ପଢ଼ୁଛନ୍ତି। ଏଭଳି ପରିସ୍ଥିତିରେ ପିଲାଙ୍କ ସୁରକ୍ଷାକୁ ନେଇ ଗ୍ରାମବାସୀଙ୍କ ମଧ୍ୟରେ ଉଦ୍ବେଗ ପ୍ରକାଶ ପାଇଛି। ସୂଚନା ଅନୁଯାୟୀ, ପୂର୍ବରୁ ବିଦ୍ୟାଳୟର ସମସ୍ୟା ସମ୍ପର୍କରେ ଭାରପ୍ରାପ୍ତ ପ୍ରଧାନ ଶିକ୍ଷୟିତ୍ରୀ ସୁନୀତା ସେଠୀ ସ୍ଥାନୀୟ ସରପଞ୍ଚଙ୍କୁ ଅବଗତ କରାଇଥିଲେ। ଏହା ପରେ ମରାମତି କାମ ହୋଇଥିଲା। କିନ୍ତୁ କାମର ମାନ ନିମ୍ନ ଥିବାରୁ ଅଳ୍ପ ବର୍ଷାରେ ମଧ୍ୟ ଛାତରୁ ପାଣି ଝରୁଥିବା ଘଟଣାକୁ ନେଇ ବୁଦ୍ଧିଜୀବୀ ମହଲରେ ପ୍ରଶ୍ନ ଉଠିଛି ଏବଂ କାର୍ଯ୍ୟର ଗୁଣବତ୍ତା ଉପରେ ସନ୍ଦେହ ପ୍ରକାଶ ପାଉଛି। ଏ ସମ୍ପର୍କରେ ପିଇଓ ବିଷ୍ଣୁ ପାଣିଗ୍ରାହୀ ଙ୍କୁ ପଚାରିବାରୁ ସେ କହିଛନ୍ତି ଯେ ଯେତିକି ଅର୍ଥ ଆସିଥିଲା ସେତିକି ମରାମତି କରାଯାଇଥିଲା। ତଥାପି ମଧ୍ୟ ସମସ୍ୟା ସମ୍ପର୍କରେ ଉଚ୍ଚ କର୍ତ୍ତୃପକ୍ଷଙ୍କୁ ପ୍ରସ୍ତାବ ପଠାଯାଇଛି। ଅନୁମୋଦନ ମିଳିବା ପରେ ଶ୍ରେଣୀଗୃହ ଛାତ ମରାମତି କାମ କରାଯିବ।ବର୍ଷା ଋତୁରେ ବିଦ୍ୟାଳୟର ଏପରି ଦୟନୀୟ ଅବସ୍ଥାକୁ ଦୃଷ୍ଟିରେ ରଖି ଛାତ୍ରଛାତ୍ରୀଙ୍କ ସୁରକ୍ଷା ସହ ଶିକ୍ଷା ପରିବେଶ ସୁନିଶ୍ଚିତ କରିବା ପାଇଁ ପ୍ରଶାସନ ତୁରନ୍ତ ସ୍ଥାୟୀ ପଦକ୍ଷେପ ନେବାକୁ ସ୍ଥାନୀୟ ଲୋକେ ଦାବି କରିଛନ୍ତି।