Odisha Janamata : କମ୍ରେଡ ଚାରୁ ମଜୁମ ଦାର ଙ୍କ 54ତମ ସହିଦ ଦିବସ ପାଳିତ |

କମ୍ରେଡ ଚାରୁ ମଜୁମ ଦାର ଙ୍କ 54ତମ ସହିଦ ଦିବସ ପାଳିତ |

28-Jul-2026

କୋଲନରାରେ କମ୍ରେଡ଼ ଚାରୁ ମଜୁମଦାରଙ୍କ ୫୪ତମ ଶହୀଦ ଦିବସ ପାଳିତ, ଆଦିବାସୀ ଅଧିକାର ସୁରକ୍ଷା ଦାବିରେ ସ୍ୱର ଉଠିଲା

ଓଡିଶା ଜନମତ ରାୟଗଡା, ୨୮/୭,

କାମେଶ୍ୱର କରକରିଆ : -----

ରାୟଗଡା ଜିଲ୍ଲା କୋଲନରା ବ୍ଲକ ଅନ୍ତର୍ଗତ ତଳ ଶିକାବାଡ଼ି ଗ୍ରାମରେ ମଙ୍ଗଳବାର ସିପିଆଇ (ଏମଏଲ) ଲିବରେସନ ପକ୍ଷରୁ କମ୍ରେଡ଼ ଚାରୁ ମଜୁମଦାରଙ୍କ ୫୪ତମ ଶହୀଦ ଦିବସ ପାଳନ କରାଯାଇଛି। ଏହି ଅବସରରେ ତାଙ୍କ ପ୍ରତିମୂର୍ତ୍ତିରେ ପୁଷ୍ପମାଲ୍ୟାର୍ପଣ କରାଯିବା ସହ ଆଦିବାସୀମାନଙ୍କ ଏକ ଶୋଭାଯାତ୍ରା ଅନୁଷ୍ଠିତ ହୋଇଥିଲା। ସଭାରେ ବକ୍ତାମାନେ ଚାରୁ ମଜୁମଦାରଙ୍କ ଜୀବନ ସଂଘର୍ଷ ଓ କୃଷକ ଆନ୍ଦୋଳନରେ ତାଙ୍କ ଅବଦାନ ସମ୍ପର୍କରେ ଆଲୋକପାତ କରିଥିଲେ। ନକ୍ସଲବାଡ଼ି କୃଷକ ଆନ୍ଦୋଳନ ଦେଶବ୍ୟାପୀ କୃଷକ ସଂଗ୍ରାମକୁ ପ୍ରେରଣା ଦେଇଥିବା ସେମାନେ ମତ ପ୍ରକାଶ କରିଥିଲେ।
ଏହି ଅବସରରେ ସିପିଆଇ (ଏମଏଲ) ଲିବରେସନର ଜିଲ୍ଲା ସମ୍ପାଦକ ତ୍ରିପତି ଗମାଙ୍ଗ କହିଥିଲେ ଯେ, ବିକାଶ ନାମରେ ପ୍ରାକୃତିକ ସମ୍ପଦର ଶୋଷଣ କରାଯାଉଛି ଏବଂ ଆଦିବାସୀଙ୍କ ଜମି, ଜଳ ଓ ଜଙ୍ଗଲ ଉପରେ ଥିବା ସାମ୍ବିଧାନିକ ଅଧିକାର କ୍ଷୁଣ୍ଣ ହେଉଛି। ସେ ଅଭିଯୋଗ କରିଥିଲେ ଯେ, କାଶୀପୁର ସମେତ ବିଭିନ୍ନ ଅଞ୍ଚଳରେ ଆଦିବାସୀମାନଙ୍କ ଦଖଲରେ ଥିବା ଜମିକୁ ନେଇ ପ୍ରଶାସନ ଦମନମୂଳକ ପଦକ୍ଷେପ ନେଉଛି ଏବଂ ବନ ଅଧିକାର ଆଇନ, ୨୦୦୬ ଓ ପେସା ଆଇନର ସଠିକ୍ କାର୍ଯ୍ୟକାରିତା ହେଉନାହିଁ। ଏହି ସମସ୍ତ ପ୍ରସଙ୍ଗରେ ସଂଗଠିତ ଆନ୍ଦୋଳନକୁ ତୀବ୍ର କରିବା ପାଇଁ ସେ ଆହ୍ୱାନ ଦେଇଥିଲେ।କାର୍ଯ୍ୟକ୍ରମରେ ପୂର୍ବତନ ସରପଞ୍ଚ ଅନିରୁଦ୍ଧ ନିଶିକା, ସିମାଦ୍ରି ପାତିକା, ମୁରଲି ମୁଟୁକା, ବୁଡୁ ତୋଇକା, ତୁଳସୀ କୁମ୍ଭୁରିକା, ମୋହନ ପାତିକା, ଶିବ ହାରାକା, ସେଞ୍ଚିଆମା କଣ୍ଡାଗରି, ମୋହନ ନିଶିକା, ଗୁଣ୍ଡୁ ତୋଇକା ପ୍ରମୁଖ ଉପସ୍ଥିତ ଥିଲେ।