Odisha Janamata : ଅସୁବିଧା ରେ ପଡ଼ିଥିବା ଗର୍ଭବତୀ ମହିଳାଙ୍କୁ ବଢ଼ାଇଲେ ସହଯୋଗର ହାତ |

ଅସୁବିଧା ରେ ପଡ଼ିଥିବା ଗର୍ଭବତୀ ମହିଳାଙ୍କୁ ବଢ଼ାଇଲେ ସହଯୋଗର ହାତ |

03-Aug-2026

୧୦୮ କର୍ମଚାରୀ ଦେଖାଇଲେ ମାନବିକତା, କାଦୁଅ ରାସ୍ତା ରେ ଗର୍ଭବତୀ ଙ୍କୁ ବୋହି ନେଲେ ଏକ କିମି ରାସ୍ତା |

ଓଡିଶା ଜନ ମତ ବ୍ୟୁରୋ,

ସଂସାର ରେ କିଛି ଏପରି ଲୋକ ଅଛନ୍ତି ବୋଲିତ ଚାଲିଛି ଦୁନିଆ | ଯେକୌଣସି ଲୋକ ଅସୁବିଧା ରେ ପଡିଲେ ତାଙ୍କୁ ସାହାଯ୍ୟ କରିବା ହେଉଛି ସେମାନଙ୍କର ପ୍ରଧାନ କାମ |ଏପରି କିଛି କାର୍ଯ୍ୟ କରି ସେମାନେ ଦେଖାଇ ଛନ୍ତି ତାଙ୍କର ମାନବିକତା | ତାହା ହେଉଛି ନୂଆପଡ଼ା ଜିଲ୍ଲା ବୋଡ଼େନ ବ୍ଲକ ଅନ୍ତର୍ଗତ ପାଟଦର ଗ୍ରାମରେ ବର୍ଷା ଯୋଗୁଁ ରାସ୍ତା ସମ୍ପୂର୍ଣ୍ଣ କାଦୁଅ ହୋଇ ଅଚଳ ହୋଇପଡ଼ିଥିବାରୁ ଜଣେ ଗର୍ଭବତୀଙ୍କୁ ହସ୍ପିଟାଲ ପହଞ୍ଚାଇବା ପାଇଁ ୧୦୮ ଆମ୍ବୁଲାନ୍ସ କର୍ମଚାରୀମାନେ ମାନବିକତାର ଅନନ୍ୟ ପରିଚୟ ଦେଇଛନ୍ତି। ପ୍ରାୟ ଏକ କିଲୋମିଟର ପର୍ଯ୍ୟନ୍ତ ଗର୍ଭବତୀଙ୍କୁ କାନ୍ଧରେ ବୋହି ମୁଖ୍ୟ ରାସ୍ତାକୁ ଆଣିବା ପରେ ଆମ୍ବୁଲାନ୍ସ ଯୋଗେ ବୋଡ଼େନ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରକୁ ନିଆଯାଇଥିଲା।
ସୂଚନା ଅନୁଯାୟୀ, ପାଟଦର ଗ୍ରାମର ପ୍ରେମଲାଲ ମାଝୀଙ୍କ ୨୩ ବର୍ଷୀୟା ସ୍ତ୍ରୀ ଲଳିତା ମାଝୀଙ୍କର ହଠାତ୍ ପ୍ରସବ ବେଦନା ଆରମ୍ଭ ହୋଇଥିଲା। ପରିବାର ଲୋକେ ତୁରନ୍ତ ୧୦୮ ଆମ୍ବୁଲାନ୍ସକୁ ଖବର ଦେଇଥିଲେ। କିନ୍ତୁ ଗ୍ରାମକୁ ସଂଯୋଗ କରୁଥିବା ରାସ୍ତା ବର୍ଷା ପାଣି ଓ କାଦୁଅରେ ସମ୍ପୂର୍ଣ୍ଣ ଅଚଳ ହୋଇପଡ଼ିଥିବାରୁ ଆମ୍ବୁଲାନ୍ସ ଗ୍ରାମ ପର୍ଯ୍ୟନ୍ତ ପହଞ୍ଚିପାରିନଥିଲା।
ଏପରି ପରିସ୍ଥିତିରେ ଆମ୍ବୁଲାନ୍ସର ଡ୍ରାଇଭର ହେମଲାଲ ବାଗ, ଫାର୍ମାସିଷ୍ଟ ରୂପେଶ କୁମାର ହେର୍ଣ୍ଣା ଏବଂ ସହଯୋଗୀ ଲାଲମୋହନ ବନ୍ଦିଛୋର୍ କୌଣସି ଦ୍ୱିଧା ନକରି ଗର୍ଭବତୀଙ୍କୁ କାନ୍ଧରେ ବୋହି ପ୍ରାୟ ଏକ କିଲୋମିଟର ଦୁର୍ଗମ କାଦୁଅ ରାସ୍ତା ଅତିକ୍ରମ କରି ମୁଖ୍ୟ ସଡ଼କରେ ପହଞ୍ଚାଇଥିଲେ। ସେଠାରୁ ଆମ୍ବୁଲାନ୍ସରେ ତାଙ୍କୁ ବୋଡ଼େନ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରକୁ ନେଇ ଚିକିତ୍ସା ପାଇଁ ଭର୍ତ୍ତି କରାଯାଇଥିଲା। ଏହି ଘଟଣା ଏକପଟେ ୧୦୮ କର୍ମଚାରୀଙ୍କ କର୍ତ୍ତବ୍ୟନିଷ୍ଠା ଓ ମାନବିକତାର ଉଜ୍ଜ୍ୱଳ ଉଦାହରଣ ସୃଷ୍ଟି କରିଥିବାବେଳେ, ଅନ୍ୟପଟେ ପାଟଦର ଗ୍ରାମର ଦୟନୀୟ ରାସ୍ତା ବ୍ୟବସ୍ଥାକୁ ପୁଣିଥରେ ସାମ୍ନାକୁ ଆଣିଛି। ସ୍ଥାନୀୟବାସୀଙ୍କ କହିବା ଅନୁଯାୟୀ, ଉଦୀର୍ଘ ଦିନ ଧରି ରାସ୍ତାର ଅବସ୍ଥା ଶୋଚନୀୟ ରହିଥିଲେ ମଧ୍ୟ ସ୍ଥାୟୀ ମରାମତି କିମ୍ବା ଉନ୍ନତି କାମ ହୋଇନାହିଁ। ବର୍ଷା ଋତୁରେ ଏହି ରାସ୍ତା ସମ୍ପୂର୍ଣ୍ଣ ଅଚଳ ହୋଇପଡ଼ୁଥିବାରୁ ରୋଗୀ, ଗର୍ଭବତୀ ମହିଳା, ଛାତ୍ରଛାତ୍ରୀ ଓ ସାଧାରଣ ଲୋକେ ନାହିଁନଥିବା ଅସୁବିଧାର ସମ୍ମୁଖୀନ ହେଉଛନ୍ତି।