Odisha Janamata : ଗାଁକୁ ପକ୍କା ରାସ୍ତା ନଥିବାରୁ ଖଟିଆ ରେ ନଦୀପାର ହୋଇ ବୁହା ହେଲେ ରୋଗୀ |

ଗାଁକୁ ପକ୍କା ରାସ୍ତା ନଥିବାରୁ ଖଟିଆ ରେ ନଦୀପାର ହୋଇ ବୁହା ହେଲେ ରୋଗୀ |

31-Aug-2026

ପୁଣି ଖଟିଆରେ ବୁହା ହେଲେ ରୋଗୀ

ପକ୍କା ରାସ୍ତା ନଥିବାରୁ ନଦୀ ପାର କରି ୨ କିମି ବୋହିଲେ ଗ୍ରାମବାସୀ

ଓଡିଶା ଜନମତ ରାୟଗଡା, ୩୧/୮,

କାମେଶ୍ୱର କରକରିଆ: -----

ଦୁର୍ଗମ ଅଞ୍ଚଳରେ ଏବେ ବି ବିକାଶର ବାସ୍ତବ ଚିତ୍ର ସାମ୍ନାକୁ ଆସୁଛି। ଗାଁକୁ ପକ୍କା ରାସ୍ତା ନଥିବାରୁ ପୁଣି ଜଣେ ଅସୁସ୍ଥ ରୋଗୀଙ୍କୁ ଖଟିଆରେ ବୋହି ନଦୀ ପାର କରାଯାଇ ମୁଖ୍ୟ ରାସ୍ତା ପର୍ଯ୍ୟନ୍ତ ନିଆଯାଇଛି। ଏଭଳି ଅଭାବନୀୟ ଘଟଣା ରାୟଗଡ଼ା ଜିଲ୍ଲା କାଶୀପୁର ବ୍ଲକ ଡଙ୍ଗାସିଲି ପଞ୍ଚାୟତର ସିସପାସ ଗାଁରେ ଦେଖିବାକୁ ମିଳିଛି। ସୂଚନା ଅନୁଯାୟୀ, ସିସପାସ ଗାଁର ଗୋପୀନାଥ ସାହୁ ହଠାତ୍ ଅସୁସ୍ଥ ହୋଇପଡ଼ିଥିଲେ। ତାଙ୍କୁ ତୁରନ୍ତ ଚିକିତ୍ସା ପାଇଁ ନେବା ଆବଶ୍ୟକ ହୋଇଥିଲେ ମଧ୍ୟ ଗାଁକୁ ଯିବା ପାଇଁ ପକ୍କା ରାସ୍ତା ନଥିବାରୁ ଆମ୍ବୁଲାନ୍ସ ପହଞ୍ଚିପାରି ନଥିଲା। ଫଳରେ ପରିବାର ଲୋକ ଓ ଗ୍ରାମବାସୀ ତାଙ୍କୁ ଖଟିଆରେ ବୋହି ନେଇଥିଲେ। ଗାଁଠାରୁ ମୁଖ୍ୟ ରାସ୍ତାର ଦୂରତା ପ୍ରାୟ ଦୁଇ କିଲୋମିଟର ହୋଇଥିବା ବେଳେ ରାସ୍ତା ମଝିରେ ରହିଛି ଏକ ନଦୀ। ରୋଗୀଙ୍କୁ ଖଟିଆରେ ବୋହି ଗ୍ରାମବାସୀ ବିପଦସଙ୍କୁଳ ଭାବେ ନଦୀ ପାର କରିଥିଲେ। ପରେ ପ୍ରାୟ ଦୁଇ କିଲୋମିଟର ଖଟିଆରେ ବୋହି ମୁଖ୍ୟ ରାସ୍ତାକୁ ଆଣିଥିଲେ। ସେଠାରୁ ଏକ ଅଟୋ ଯୋଗେ ଗୋପୀନାଥଙ୍କୁ ଟିକିରି ଉଷାପଡ଼ାସ୍ଥିତ ଡାକ୍ତରଖାନାକୁ ନିଆଯାଇଥିଲା। ସିସପାସ ଗାଁକୁ ପକ୍କା ରାସ୍ତା ନିର୍ମାଣ ପାଇଁ ଗ୍ରାମବାସୀ ଦୀର୍ଘଦିନ ଧରି ଦାବି କରିଆସୁଛନ୍ତି। ହେଲେ ଏଯାଏଁ ରାସ୍ତା ସମସ୍ୟାର ସମାଧାନ ହୋଇନାହିଁ। ଫଳରେ ବର୍ଷା ଦିନେ ଗ୍ରାମବାସୀଙ୍କ ଦୁର୍ଦ୍ଦଶା ଆହୁରି ବଢ଼ିଯାଉଛି। ବିଶେଷକରି ଜରୁରୀ ସମୟରେ ଆମ୍ବୁଲାନ୍ସ ଗାଁରେ ପହଞ୍ଚି ନପାରିବାରୁ ରୋଗୀଙ୍କୁ ଏଭଳି ଖଟିଆରେ ବୋହି ନେବାକୁ ପଡ଼ୁଛି। ସରକାର ଦୁର୍ଗମ ଅଞ୍ଚଳରେ ଯୋଗାଯୋଗ ବ୍ୟବସ୍ଥାର ବିକାଶ ଓ ସମସ୍ତ ଗାଁକୁ ପକ୍କା ରାସ୍ତା ସଂଯୋଗର ଦାବି କରୁଥିବା ବେଳେ ସିସପାସ ଗାଁର ଏହି ଦୃଶ୍ୟ ବାସ୍ତବ ସ୍ଥିତିକୁ ପଦାକୁ ଆଣିଛି। ତୁରନ୍ତ ଗାଁକୁ ପକ୍କା ରାସ୍ତା ନିର୍ମାଣ କରିବା ସହ ନଦୀ ଉପରେ ଆବଶ୍ୟକ ଯାତାୟାତ ବ୍ୟବସ୍ଥା କରିବାକୁ ଗ୍ରାମବାସୀ ଦାବି କରିଛନ୍ତି।