Odisha Janamata : ନିୟମ ଗିରି ଡୋଙ୍ଗରିଆ କନ୍ଧ ସମୁଦାୟଙ୍କ ନିକଟରେ ପହଞ୍ଚିଲା ଗଣ ତନ୍ତ୍ର ର ବାର୍ତ୍ତା |

ନିୟମ ଗିରି ଡୋଙ୍ଗରିଆ କନ୍ଧ ସମୁଦାୟଙ୍କ ନିକଟରେ ପହଞ୍ଚିଲା ଗଣ ତନ୍ତ୍ର ର ବାର୍ତ୍ତା |

02-Jun-2026

ନିୟମଗିରିର ଦୁର୍ଗମ ଫାକେରୀ ଗ୍ରାମରେ SIR-୨୦୨୬ ସଚେତନତା ଅଭିଯାନ
ଡୋଙ୍ଗରିଆ କନ୍ଧ ସମୁଦାୟଙ୍କ ନିକଟରେ ପହଞ୍ଚିଲା ଗଣତନ୍ତ୍ରର ବାର୍ତ୍ତା,

ଓଡିଶା ଜନମତ ରାୟଗଡା , ୦୨/୦୬

କାମେଶ୍ୱର କରକରିଆ :-----
ପାହାଡ଼, ଜଙ୍ଗଲ ଓ ଭାଷାଗତ ପ୍ରତିବନ୍ଧକତାକୁ ଅତିକ୍ରମ କରି ରାୟଗଡ଼ ଜିଲ୍ଲା ପ୍ରଶାସନ ପକ୍ଷରୁ ସ୍ୱତନ୍ତ୍ର ସଘନ ସଂଶୋଧନ (SIR-୨୦୨୬) କାର୍ଯ୍ୟକ୍ରମକୁ ନିୟମଗିରି ପାହାଡ଼ ପାଦଦେଶର ଦୁର୍ଗମ ଫାକେରୀ ଗ୍ରାମରେ ବସବାସ କରୁଥିବା ଡୋଙ୍ଗରିଆ କନ୍ଧ ପିଭିଟିଜି (PVTG) ସମୁଦାୟଙ୍କ ନିକଟରେ ସଫଳତାର ସହ ପହଞ୍ଚାଯାଇଛି।
ରାୟଗଡ଼ ଜିଲ୍ଲାର ୧୩୯-ବିଷମକଟକ ବିଧାନସଭା କ୍ଷେତ୍ର ଅନ୍ତର୍ଗତ ଏହି ଗ୍ରାମରେ ମତଦାତା ସଚେତନତା ସୃଷ୍ଟି ସହ ଏନ୍ୟୁମେରେସନ୍ ଫର୍ମ ବଣ୍ଟନ ଓ ପୂରଣ କାର୍ଯ୍ୟକୁ ସୁଚାରୁ ରୂପେ ସମ୍ପନ୍ନ କରିବା ପାଇଁ ପ୍ରଶାସନ ପକ୍ଷରୁ ଏକ ସ୍ୱତନ୍ତ୍ର ଅଭିଯାନ ଚାଲାଯାଇଥିଲା।ରାୟଗଡ଼ର ଅତିରିକ୍ତ ଜିଲ୍ଲାପାଳ ନବୀନ ଚନ୍ଦ୍ର ନାୟକଙ୍କ ନେତୃତ୍ୱରେ କଲ୍ୟାଣସିଂହପୁର ବ୍ଲକର ବିଡିଓ ମନୀଷା ଦାଶ, ସହକାରୀ ଜିଲ୍ଲାପାଳ ଶିବ ପ୍ରସାଦ ସାହୁ ଓ ପିଇଓ ଶ୍ୱେତାମ୍ବର ପ୍ରଧାନ ଫାକେରୀ ଗ୍ରାମ ପରିଦର୍ଶନ କରିଥିଲେ। ଏହି ଅବସରରେ ଗ୍ରାମର ସରପଞ୍ଚ ଡୋଙ୍ଗରିଆ କନ୍ଧ ଭାଷାରେ ଗ୍ରାମବାସୀଙ୍କ ସହ ଆଲୋଚନା କରି SIR-୨୦୨୬ର ଉଦ୍ଦେଶ୍ୟ, ଗୁରୁତ୍ୱ ଓ ପ୍ରକ୍ରିୟା ସମ୍ପର୍କରେ ବିସ୍ତୃତ ସଚେତନତା ସୃଷ୍ଟି କରିଥିଲେ। ସେହିପରି ଏନ୍ୟୁମେରେସନ୍ ଫର୍ମ ବଣ୍ଟନ ଓ ପୂରଣ କାର୍ଯ୍ୟକୁ ମଧ୍ୟ ସହଜ ଏବଂ ସୁଗମ କରାଯାଇଥିଲା।ଦୁର୍ଗମ ଆଦିବାସୀ ଅଞ୍ଚଳର ଲୋକଙ୍କ ନିକଟରେ ସେମାନଙ୍କ ନିଜସ୍ୱ ଭାଷାରେ ସଚେତନତା ପହଞ୍ଚାଇବା ଫଳରେ SIR-୨୦୨୬ ପ୍ରତି ସେମାନଙ୍କ ଆଗ୍ରହ ଓ ସହଭାଗିତା ବୃଦ୍ଧି ପାଇଥିବା ଦେଖାଯାଇଛି। ପ୍ରଶାସନର ଏହି ପଦକ୍ଷେପ ଗଣତାନ୍ତ୍ରିକ ପ୍ରକ୍ରିୟାରେ ପ୍ରାନ୍ତିକ ଓ ଆଦିବାସୀ ସମୁଦାୟଙ୍କ ସାମିଲ ହେବାକୁ ଆହୁରି ସୁଦୃଢ଼ କରିଛି।"ପ୍ରତ୍ୟେକ ମତଦାତା ଗୁରୁତ୍ୱପୂର୍ଣ୍ଣ ଓ ପ୍ରତ୍ୟେକ କଣ୍ଠସ୍ୱର ମୂଲ୍ୟବାନ"—ଏହି ବିଶ୍ୱାସକୁ ଆଧାର କରି ରାୟଗଡ଼ ଜିଲ୍ଲା ପ୍ରଶାସନ SIR-୨୦୨୬ ପ୍ରକ୍ରିୟାରେ ସମସ୍ତଙ୍କ ସହଭାଗିତା ସୁନିଶ୍ଚିତ କରିବା ଦିଗରେ ନିରନ୍ତର ପଦକ୍ଷେପ ଗ୍ରହଣ କରୁଥିବା ଜଣାପଡ଼ିଛି।