Odisha Janamata : ସ୍ଥାନୀୟ ଉତ୍ପାଦର ଭ୍ୟାଲୁ ଅଡିସନ ମାଧ୍ୟମରେ ଗଠନ ହୋଇପାରିବ ଦାଦନ ମୁକ୍ତ ସମାଜ |

ସ୍ଥାନୀୟ ଉତ୍ପାଦର ଭ୍ୟାଲୁ ଅଡିସନ ମାଧ୍ୟମରେ ଗଠନ ହୋଇପାରିବ ଦାଦନ ମୁକ୍ତ ସମାଜ |

15-Jun-2026

ସ୍ଥାନୀୟ ଉତ୍ପାଦର ଭ୍ୟାଲୁ ଆଡିସନ୍‌ ମାଧ୍ୟମରେ ଗଠନ ହୋଇପାରିବ ଦାଦନମୁକ୍ତ ସମାଜ : ବିଜେପିର ‘ଜନଜାତି ସଙ୍କୁଳ’ କାର୍ଯ୍ୟକ୍ରମ

ଓଡିଶା ଜନମତ,ରାୟଗଡ଼ା, ୧୫/୬,

କାମେଶ୍ୱର କରକରିଆ :-----

ବିକଶିତ ଭାରତର ଲକ୍ଷ୍ୟ ସାକାର କରିବା ସହ ଦାଦନମୁକ୍ତ ଗାଁ ଗଠନ ଉଦ୍ଦେଶ୍ୟରେ ବିଜେପି ପକ୍ଷରୁ ‘ଜନଜାତି ସଙ୍କୁଳ’ କାର୍ଯ୍ୟକ୍ରମ ଆରମ୍ଭ କରାଯାଇଛି। ରାୟଗଡ଼ା ଜିଲ୍ଲା କାଶୀପୁର ବ୍ଲକର ବାହାର ପଦାମାଞ୍ଜି ଗାଁରେ ଆୟୋଜିତ ଏହି ସମାବେଶରେ ଜାତୀୟ ଓ ରାଜ୍ୟସ୍ତରୀୟ ନେତୃତ୍ୱ ଯୋଗଦେଇ ଆଦିବାସୀ ଅଞ୍ଚଳର ବିକାଶ, କୃଷି ଏବଂ ଜୀବିକା ବୃଦ୍ଧି ଉପରେ ଗୁରୁତ୍ୱାରୋପ କରିଥିଲେ। କୋରାପୁଟ ଲୋକସଭା କ୍ଷେତ୍ରର ପୂର୍ବତନ ପ୍ରାର୍ଥୀ କାଳୀରାମ ମାଝୀଙ୍କ ପୋଷ୍ୟ ଗାଁ ଯୋଜନାରେ ସାମିଲ ହୋଇଥିବା ପାଞ୍ଚଟି ଗାଁର ବିକାଶ କାର୍ଯ୍ୟର ମଧ୍ୟ ସମୀକ୍ଷା କରାଯାଇଥିଲା। ଏହି ସମାବେଶରେ ରାଷ୍ଟ୍ରୀୟ ସଙ୍ଗଠନକ ଭି. ସତୀଶ ମୁଖ୍ୟ ଅତିଥି ଭାବେ ଯୋଗଦେଇଥିଲେ। ତାଙ୍କ ସହ ନବରଙ୍ଗପୁର ସାଂସଦ ବଳଭଦ୍ର ମାଝୀ, ରାଜ୍ୟସଭା ସାଂସଦ ସୁଜିତ କୁମାର, କୋରାପୁଟ ବିଧାୟକ ରଘୁରାମ ମାଛୋ ଓ କୋଟପାଡ଼ ବିଧାୟକ ରୂପୁ ଭତ୍ରା ମଞ୍ଚାସୀନ ଥିଲେ। ଅତିଥିମାନେ କହିଥିଲେ ଯେ, ଆଦିବାସୀ ଅଞ୍ଚଳର ସାମଗ୍ରିକ ବିକାଶ ଓ ସାଧାରଣ ଲୋକଙ୍କ ସଶକ୍ତିକରଣ ହେଉଛି ସରକାର ଓ ସଙ୍ଗଠନର ପ୍ରାଥମିକତା। ଗାଁ ଗାଁରେ ସଙ୍ଗଠନକୁ ଆହୁରି ସୁଦୃଢ଼ କରାଯିବା ସହ ପ୍ରଧାନମନ୍ତ୍ରୀଙ୍କ ‘ସବକା ସାଥ, ସବକା ବିକାଶ, ସବକା ବିଶ୍ୱାସ, ସବକା ପ୍ରୟାସ’ ମନ୍ତ୍ରକୁ ଆଧାର କରି ଜନପ୍ରତିନିଧିମାନଙ୍କୁ ଗାଁ ଆଡପ୍ଟ କରି ଦାଦନମୁକ୍ତ ଗ୍ରାମ ଗଠନ ପାଇଁ ଆହ୍ୱାନ କରାଯାଇଛି। ବାଡ଼ି ଯୋଜନା, ସେଚ୍ଛା ସୁବିଧା ଓ ବହୁଫସଲୀ ଚାଷ ମାଧ୍ୟମରେ କୃଷକଙ୍କ ଆୟ ବୃଦ୍ଧି ଦିଗରେ କାର୍ଯ୍ୟ ଚାଲିଥିବା ବେଳେ ସ୍ଥାନୀୟ ଉତ୍ପାଦର ଭ୍ୟାଲୁ ଆଡିସନ୍‌ ଓ ପ୍ରୋସେସିଂ ଉପରେ ମଧ୍ୟ ଗୁରୁତ୍ୱ ଦିଆଯାଉଛି। ଏହା ମାଧ୍ୟମରେ ଲୋକଙ୍କ ଆୟ ବଢ଼ିବା ସହ ଦାଦନ ପ୍ରଥାକୁ ରୋକାଯାଇପାରିବ ବୋଲି ନେତାମାନେ ମତ ପ୍ରକାଶ କରିଥିଲେ। ସେମାନେ ଆହୁରି କହିଥିଲେ ଯେ, ଏହି ପଦକ୍ଷେପ ଜାରି ରହିଲେ ଅଞ୍ଚଳବାସୀ ଆର୍ଥିକ ଭାବେ ସ୍ୱାବଲମ୍ବୀ ହେବା ସହ ଦାଦନମୁକ୍ତ ସମାଜ ଗଠନରେ ସହାୟକ ହେବେ। ଏହି କାର୍ଯ୍ୟକ୍ରମରେ ରାଜ୍ୟ ସାଧାରଣ ସମ୍ପାଦିକା ପୂର୍ଣ୍ଣିମା ନାଏକ, ରାୟଗଡ଼ା ଜିଲ୍ଲା ସଭାପତି ଗାପି ଆନ୍ଦ, ଏସଡିସି ଚେୟାରମ୍ୟାନ ବିଦ୍ୟାଧର ସାବର, ଅରୂପା ଫାଉଣ୍ଡେସନର ନୀତା ଦ୍ୱିବେଦୀଙ୍କ ସମେତ ବହୁ ନେତୃବୃନ୍ଦ ଉପସ୍ଥିତ ଥିଲେ। ଦୁଷ୍ମନ୍ତ କୁମାର ସିଂହଦେବ ମଞ୍ଚ ପରିଚାଳନା କରିଥିବା ବେଳେ ସ୍ୱତନ୍ତ୍ର ଅତିଥି ଭାବେ ୱେଳା କଣ୍ଡାବାବୁ ଏବଂ ବିଭିନ୍ନ ମଣ୍ଡଳର ସମସ୍ତ ସଭାପତି ଉପସ୍ଥିତ ଥିଲେ।