Odisha Janamata : ଲଗାଣ ବର୍ଷା ରେ ବୁଡ଼ା ଗୁଡା ହାଇସ୍କୁଲ ନିକଟରେ ଗଛ ପଡ଼ି ରାସ୍ତା ଅବରୋଧ |

ଲଗାଣ ବର୍ଷା ରେ ବୁଡ଼ା ଗୁଡା ହାଇସ୍କୁଲ ନିକଟରେ ଗଛ ପଡ଼ି ରାସ୍ତା ଅବରୋଧ |

29-Jul-2026

ଲଗାଣ ବର୍ଷାରେ ବୁଡ଼ାଗୁଡ଼ା ହାଇସ୍କୁଲ ନିକଟରେ ଗଛ ପଡ଼ି ରାସ୍ତା ଅବରୋଧ; ଘଣ୍ଟାଏ ଅଟକିଲା ଆମ୍ବୁଲାନ୍ସ, ହନ୍ତସନ୍ତ ହେଲେ ଯାତ୍ରୀ

ଓଡିଶା ଜନମତ ରାୟଗଡା , ୨୯/୭,

କାମେଶ୍ୱର କରକରିଆ : -----

ଲଗାଣ ବର୍ଷା ଯୋଗୁଁ ରାୟଗଡ଼ା ଜିଲ୍ଲା କଲ୍ୟାଣସିଂହପୁର ବ୍ଲକ ବୁଡ଼ାଗୁଡ଼ା ହାଇସ୍କୁଲ ନିକଟରେ ଏକ ବିଶାଳ ବରକୋଳି ଗଛ ମୁଖ୍ୟ ରାସ୍ତା ଉପରେ ପଡ଼ିଯିବାରୁ ପ୍ରାୟ ଘଣ୍ଟାଏ ସମୟ ଧରି ଯାତାୟାତ ସମ୍ପୂର୍ଣ୍ଣ ବ୍ୟାହତ ହୋଇଥିଲା। ଏହାଫଳରେ ଏକ ଆମ୍ବୁଲାନ୍ସ ସମେତ ଯାତ୍ରୀବାହୀ ବସ୍, କାର ଓ ଅନେକ ଯାନବାହନ ରାସ୍ତାରେ ଅଟକି ରହିଥିବାରୁ ଯାତ୍ରୀମାନେ ହନ୍ତସନ୍ତ ହୋଇପଡ଼ିଥିଲେ। ଘଟଣା ସମ୍ପର୍କରେ ସ୍ଥାନୀୟ ସମାଜସେବୀ ସନ୍ତୋଷ କୁମାର ବଛା କଲ୍ୟାଣସିଂହପୁର ଅଗ୍ନିଶମ ବିଭାଗକୁ ସୂଚନା ଦେଇଥିଲେ। ଖବର ପାଇ ୱାଇସି ବିଜୟ କୁମାର ବେହେରାଙ୍କ ନେତୃତ୍ୱରେ କନଷ୍ଟେବଳ ରମାକାନ୍ତ ସାହୁ, ରାଜେଶ୍ୱର ବେହେରା ଓ ଅନ୍ୟ କର୍ମଚାରୀମାନେ ତୁରନ୍ତ ଘଟଣାସ୍ଥଳରେ ପହଞ୍ଚି ଗଛ କାଟି ରାସ୍ତା ସଫା କରିଥିଲେ। ପରେ ଯାନବାହନ ଚଳାଚଳ ସ୍ୱାଭାବିକ ହୋଇଥିଲା। ଏପଟେ ଲଗାଣ ବର୍ଷା ସମୟରେ ବାରମ୍ବାର ଗଛ ଉପୁଡ଼ି ରାସ୍ତା ଅବରୋଧ ହେଉଥିବାରୁ ସାଧାରଣ ଲୋକଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି। ମୁଖ୍ୟ ସଡ଼କ କଡ଼ରେ ଥିବା ଶୁଖିଲା ଓ ବିପଦସଙ୍କୁଳ ଗଛଗୁଡ଼ିକୁ ଚିହ୍ନଟ କରି ଶୀଘ୍ର କାଟିବା ସହ ପୂର୍ବ ସତର୍କତାମୂଳକ ପଦକ୍ଷେପ ନେବାକୁ ପିଡବ୍ଲ୍ୟୁଡି ବିଭାଗ ପ୍ରତି ସ୍ଥାନୀୟ ବୁଦ୍ଧିଜୀବୀ ଓ ଅଞ୍ଚଳବାସୀ ଦାବି କରିଛନ୍ତି।