Odisha Janamata : କଲ୍ୟାଣ ସିଂହ ପୁର ବିଡ଼ିଓ ଙ୍କ ମନମୁଖୀ କାର୍ଯ୍ୟ ଯୋଗୁଁ ବଜେଡି ର ଉପଜିଲ୍ଲାପାଳ ଙ୍କୁ ଅଭିଯୋଗ ପତ୍ର ପ୍ରଦାନ |

କଲ୍ୟାଣ ସିଂହ ପୁର ବିଡ଼ିଓ ଙ୍କ ମନମୁଖୀ କାର୍ଯ୍ୟ ଯୋଗୁଁ ବଜେଡି ର ଉପଜିଲ୍ଲାପାଳ ଙ୍କୁ ଅଭିଯୋଗ ପତ୍ର ପ୍ରଦାନ |

08-Aug-2026

ବିଡିଓଙ୍କ ମନମୁଖୀ କାର୍ଯ୍ୟ ଅଭିଯୋଗ: କଲ୍ୟାଣସିଂହପୁରରେ ବିଜେଡି ପକ୍ଷରୁ ଲିଖିତ ଦାବିପତ୍ର : ବିଡିଓଙ୍କ ବିରୋଧରେ ବିଜେଡିର ଅଭିଯୋଗ
ଓଡିଶା ଜନମତ ରାୟଗଡା , ୮/୮,

(କାମେଶ୍ୱର କରକରିଆ ):
ରାୟଗଡ଼ା ଜିଲ୍ଲା କଲ୍ୟାଣସିଂହପୁର ବ୍ଲକରେ ବିଡିଓଙ୍କ କାର୍ଯ୍ୟଶୈଳୀକୁ ନେଇ ବିଜେଡି ପକ୍ଷରୁ ଲିଖିତ ଅଭିଯୋଗ ଦାଖଲ କରାଯାଇଛି। ବ୍ଲକର ଦୁଇ ଜିଲ୍ଲାପରିଷଦ ସଦସ୍ୟ, ବ୍ଲକ ଅଧ୍ୟକ୍ଷା, ସରପଞ୍ଚ, ସମିତି ସଦସ୍ୟ ଓ ୱାର୍ଡ ସଦସ୍ୟଙ୍କୁ ଅବଗତ ନକରି ବିଭିନ୍ନ ଉନ୍ନୟନମୂଳକ କାର୍ଯ୍ୟ କରାଯାଉଥିବା ଅଭିଯୋଗରେ ଦଳ ପକ୍ଷରୁ ଏହି ପଦକ୍ଷେପ ନିଆଯାଇଛି। ବ୍ଲକ ସଭାପତି ସୁନ୍ଦର ରାଓ ବାଗଙ୍କ ନେତୃତ୍ୱରେ ବିଜେଡିର ନେତା ଓ କର୍ମୀମାନେ ବିଡିଓ ମନୀଷା ଦାସଙ୍କୁ ଦାବିପତ୍ର ପ୍ରଦାନ କରିବାକୁ ବ୍ଲକ କାର୍ଯ୍ୟାଳୟକୁ ଯାଇଥିଲେ। ବିଡିଓ ଅନୁପସ୍ଥିତ ଥିବାରୁ ଦାବିପତ୍ରଟି ଜିପିଓ ଶ୍ୱେତାମ୍ବର ପ୍ରଧାନଙ୍କୁ ପ୍ରଦାନ କରାଯାଇଥିଲା। ସେହି ସମୟରେ ଉପଜିଲ୍ଲାପାଳ ରମେଶ କୁମାର ଜେନା ଉପସ୍ଥିତ ଥିବାରୁ ତାଙ୍କୁ ମଧ୍ୟ ଦାବିପତ୍ରର ଏକ ନକଲ ଦିଆଯାଇଥିଲା।ଅଭିଯୋଗପତ୍ରରେ ବିଜେଡି ପକ୍ଷରୁ କୁହାଯାଇଛି ଯେ, ପଲ୍ଲିସଭା ଓ ଗ୍ରାମସଭାରେ ଅନୁମୋଦିତ ଉନ୍ନୟନମୂଳକ କାର୍ଯ୍ୟର ତାଲିକା ଅନୁଯାୟୀ ସରକାରଙ୍କ ପକ୍ଷରୁ ଅର୍ଥ ମଞ୍ଜୁର ହେଉଥିଲେ ମଧ୍ୟ ନିର୍ବାଚିତ ଜନପ୍ରତିନିଧିମାନଙ୍କୁ ଅବଗତ ନକରି ବିଡିଓ ନିଜ ଇଚ୍ଛାରେ କାର୍ଯ୍ୟ କରୁଛନ୍ତି। ଏହା ଫଳରେ ଜନପ୍ରତିନିଧିଙ୍କ ଅଧିକାର କ୍ଷୁଣ୍ଣ ହେଉଥିବା ସହ ଉନ୍ନୟନ କାର୍ଯ୍ୟରେ ସ୍ୱଚ୍ଛତା ରହୁନାହିଁ ବୋଲି ଦଳ ଅଭିଯୋଗ କରିଛି।ଏହାସହ ବ୍ଲକରେ ଗତ ଦୁଇ ବର୍ଷ ଧରି ସମିତି ବୈଠକ ଆୟୋଜନ ହୋଇନଥିବା ମଧ୍ୟ ଅଭିଯୋଗରେ ଉଲ୍ଲେଖ କରାଯାଇଛି। ବ୍ଲକ ଅଧ୍ୟକ୍ଷା ଅମ୍ବ୍ରିତା କାଡ୍ରାକା ଏନେଇ ବିଡିଓଙ୍କୁ ଚିଠି ଲେଖିଥିଲେ ମଧ୍ୟ ବୈଠକ ଡକାଯାଇନଥିବାରୁ ବିଡିଓ ମନମୁଖୀ ଭାବେ ପ୍ରଶାସନ ଚଳାଉଥିବା ଅଭିଯୋଗ କରାଯାଇଛି।
ଉପଜିଲ୍ଲାପାଳ ରମେଶ କୁମାର ଜେନା କହିଛନ୍ତି ଯେ, ଏହି ଅଭିଯୋଗକୁ ଜିଲ୍ଲାପାଳଙ୍କ ଦୃଷ୍ଟିଗୋଚର କରାଯାଇ ଆବଶ୍ୟକ ପଦକ୍ଷେପ ନିଆଯିବ।ଏହି କାର୍ଯ୍ୟକ୍ରମରେ ଜିଲ୍ଲାପରିଷଦ ଅଧ୍ୟକ୍ଷା ସରସ୍ୱତୀ ମାଝୀ, ବ୍ଲକ ଅଧ୍ୟକ୍ଷା ଅମ୍ବ୍ରିତା କାଡ୍ରାକା, ଜିଲ୍ଲାପରିଷଦ ସଦସ୍ୟ ବାରା ପ୍ରସାଦ ରାଓ ଓ ଭୂମି ଗୌରୀଦେବୀ, ପୂର୍ବତନ ମନ୍ତ୍ରୀ ତଥା ବିଧାୟକ ଜଗନ୍ନାଥ ସାରକା, କାର୍ଯ୍ୟକାରିଣୀ ସଭାପତି ଜି. ଗୌରୀଶଙ୍କର, ଉପାଧ୍ୟକ୍ଷ ଡମ୍ବରୁ କଞ୍ଜାକା, ଅନୁସୟା ମାଝୀଙ୍କ ସମେତ ବହୁ ବିଜେଡି ନେତା ଓ କର୍ମୀ ଉପସ୍ଥିତ ଥିଲେ।