Odisha Janamata : ଅଢ଼େଇ ବର୍ଷ ପରେ ପୁରୁଣା ହତ୍ୟା ମାମଲାରେ ଦୁଇ ଗିରିଫ |

ଅଢ଼େଇ ବର୍ଷ ପରେ ପୁରୁଣା ହତ୍ୟା ମାମଲାରେ ଦୁଇ ଗିରିଫ |

29-Aug-2026

ପୁରୁଣା ହତ୍ୟା ମାମଲାର ପର୍ଦ୍ଦାଫାଶ, ଅଢ଼େଇ ବର୍ଷ ପରେ ଦୁଇ ଅଭିଯୁକ୍ତ ଗିରଫ

ଓଡିଶା ଜନ ମତ ବ୍ୟୁରୋ,

ଅଢ଼େଇ ବର୍ଷ ପୂର୍ବେ ଘଟିଥିବା ଏକ ଚର୍ଚ୍ଚିତ ହତ୍ୟା ମାମଲାରେ ରାଉରକେଲା ପୋଲିସ ବଡ଼ ସଫଳତା ହାସଲ କରିଛି। ଝିରପାଣି ଥାନା ଅଞ୍ଚଳରେ ଘଟିଥିବା ମଙ୍ଗଳ ଓରାମ ହତ୍ୟାକାଣ୍ଡରେ ସମ୍ପୃକ୍ତ ଦୁଇ ଅଭିଯୁକ୍ତଙ୍କୁ ଗିରଫ କରାଯାଇଥିବା ସମ୍ପର୍କରେ ଆଜି ଆୟୋଜିତ ସାମ୍ବାଦିକ ସମ୍ମିଳନୀରେ ପୋଲିସ ସୂଚନା ଦେଇଛି।

ପୋଲିସ ସୂଚନା ଅନୁଯାୟୀ, ବିଶ୍ରା ଜାମ୍ବର୍ନା ଅଞ୍ଚଳର ମଙ୍ଗଳ ଓରାମ ୨୮ ଫେବୃଆରୀ ୨୦୨୪ ରେ ନିଜର ମହିନ୍ଦ୍ରା ପିକ୍-ଅପ୍ (ନମ୍ବର: ଓଡି-୧୪ କ୍ୟୁ-୩୬୪୮) ନେଇ ଝିରପାଣି ସାପ୍ତାହିକ ହାଟକୁ ଯାଇଥିଲେ। ସେହିଦିନଠାରୁ ସେ ନିଖୋଜ ହୋଇଯାଇଥିଲେ। ପରେ ଝାଡ଼ଖଣ୍ଡର ସିମଡେଗା ଜିଲ୍ଲା ଜଳଡେଗା ଥାନା ଅନ୍ତର୍ଗତ ଖାରୱାଗଡ଼ା ଅଞ୍ଚଳର ଏକ ଜଳବନ୍ଦୀ କୃଷି କ୍ଷେତରୁ ତାଙ୍କ ଅଚିହ୍ନା ମୃତଦେହ ଉଦ୍ଧାର ହୋଇଥିଲା। ମୃତଦେହ ଚିହ୍ନଟ ପରେ ୮ ମାର୍ଚ୍ଚ ୨୦୨୪ ରେ ଝିରପାଣି ଥାନାରେ ହତ୍ୟା ମାମଲା ରୁଜୁ ହୋଇଥିଲା।

ଦୀର୍ଘ ତଦନ୍ତ ପରେ ପୋଲିସ ରାହୁଲ ଓରଫ ସରଧନ ଶର୍ମା (୪୮) ଓ ଅଜୟ ପାତ୍ର (୩୩)ଙ୍କୁ ଗିରଫ କରିଛି।

ତଦନ୍ତରୁ ଜଣାପଡ଼ିଛି ଯେ, ଅଭିଯୁକ୍ତମାନେ ଜିନିଷ ପରିବହନ କରିବା ବାହାନାରେ ମଙ୍ଗଳ ଓରାମଙ୍କ ଗାଡ଼ି ଭଡ଼ାରେ ନେଇଥିଲେ। ପରେ କେଟିଏଚ୍ ଛକ ନିକଟରେ ଉଚ୍ଚ କ୍ଷମତାସମ୍ପନ୍ନ ନିଦ୍ରା ବଟିକା ମିଶା ଚା ପିଇବାକୁ ଦେଇ ତାଙ୍କୁ ଅଚେତ କରିଥିଲେ। ଏହାପରେ ତାଙ୍କୁ ଗାଡ଼ି ସହ ଝାଡ଼ଖଣ୍ଡକୁ ନେଇ ଜଳଡେଗାର ଖାରୱାଗଡ଼ା ନିକଟସ୍ଥ ଜଳବନ୍ଦୀ ପଡ଼ିଆରେ ଫିଙ୍ଗି ଦେଇଥିଲେ। ସେଠାରେ ବୁଡ଼ି ଯିବାରୁ ମଙ୍ଗଳ ଓରାମଙ୍କ ମୃତ୍ୟୁ ହୋଇଥିବା ପୋଲିସ କହିଛି।

ଘଟଣା ପରେ ଅଭିଯୁକ୍ତମାନେ ପିକ୍-ଅପ୍ ଭ୍ୟାନ୍ ନେଇ ଫେରାର ହୋଇଯାଇଥିଲେ ଏବଂ ପରେ ଏହାକୁ ୧ ଲକ୍ଷ ୭୦ ହଜାର ଟଙ୍କାରେ ବିକ୍ରି କରିଥିବା ଜଣାପଡ଼ିଛି। ପୋଲିସ ବର୍ତ୍ତମାନ ଚୋରି ହୋଇଥିବା ସେହି ମହିନ୍ଦ୍ରା ପିକ୍-ଅପ୍ ଭ୍ୟାନକୁ ଉଦ୍ଧାର କରିଛି।

ପୋଲିସ କହିଛି, ଗିରଫ ଦୁଇ ଅଭିଯୁକ୍ତଙ୍କ ବିରୋଧରେ ଚୋରି, ଡକାୟତି ସମେତ ଏକାଧିକ ଅପରାଧିକ ମାମଲା ରହିଛି। ଏହି ମାମଲାରେ ଅନ୍ୟ କାହାର ସମ୍ପୃକ୍ତି ରହିଛି କି ନାହିଁ ଏବଂ ଅନ୍ୟ ଚୋରି ହୋଇଥିବା ଗାଡ଼ି ଉଦ୍ଧାର ପାଇଁ ତଦନ୍ତ ଜାରି ରହିଛି।

ରାଉରକେଲା ପୋଲିସ କହିଛି, ସମୟ ବିତିଯାଇଥିଲେ ମଧ୍ୟ ଗୁରୁତର ଅପରାଧର ତଦନ୍ତକୁ ନିରନ୍ତର ଭାବେ ଜାରି ରଖି ଅପରାଧୀଙ୍କୁ ଆଇନ ଆଗରେ ଆଣିବା ପାଇଁ ସେମାନେ ପ୍ରତିବଦ୍ଧ।