Odisha Janamata : ମୃତକ ଙ୍କ ପରିବାର କୁ ସମବେଦନା ଜଣାଇବା ସହ ଦଳୀୟ କର୍ମୀଙ୍କ ସ୍ୱାସ୍ଥ୍ୟ ବସ୍ଥା ବୁଝିଲେ ବିଷମ କଟକ ବିଧାୟକ |

ମୃତକ ଙ୍କ ପରିବାର କୁ ସମବେଦନା ଜଣାଇବା ସହ ଦଳୀୟ କର୍ମୀଙ୍କ ସ୍ୱାସ୍ଥ୍ୟ ବସ୍ଥା ବୁଝିଲେ ବିଷମ କଟକ ବିଧାୟକ |

11-Oct-2026

ମୃତକଙ୍କ ପରିବାରକୁ ସମବେଦନା, ଅସୁସ୍ଥ କଂଗ୍ରେସ ନେତାଙ୍କ ସ୍ୱାସ୍ଥ୍ୟାବସ୍ଥା ବୁଝିଲେ ବିଷମ କଟକ ବିଧାୟକ |

ଓଡିଶା ଜନମତ ରାୟଗଡ଼ା, ୧୧/୧୦,

କାମେଶ୍ୱର କରକରିଆ :----

ଦୁଃଖରେ ଭାଙ୍ଗିପଡ଼ିଥିବା ପରିବାରକୁ ସାନ୍ତ୍ୱନା ଦେବା ସହ ଅସୁସ୍ଥ ଦଳୀୟ କର୍ମୀଙ୍କ ସ୍ୱାସ୍ଥ୍ୟାବସ୍ଥା ବୁଝିଲେ ବିଷମକଟକ ବିଧାୟକ ନୀଳମାଧବ ହିକକା। ରବିବାର ରାୟଗଡ଼ା ଜିଲ୍ଲା କଲ୍ୟାଣସିଂହପୁର ବ୍ଲକର ବିଭିନ୍ନ ଗ୍ରାମ ଗସ୍ତ କରି ସେ ଦୁର୍ଘଟଣାରେ ପ୍ରାଣ ହରାଇଥିବା ବ୍ୟକ୍ତିଙ୍କ ପରିବାରବର୍ଗଙ୍କୁ ଭେଟି ସମବେଦନା ଜଣାଇବା ସହ ସେମାନଙ୍କ ଦୁଃଖସୁଖ ବୁଝିଥିଲେ।
ଗସ୍ତ ଅବସରରେ ବିଧାୟକ ଶ୍ରୀ ହିକକା ପୂଜାରୀଗୁଡ଼ା ପଞ୍ଚାୟତ ଅନ୍ତର୍ଗତ ବଡ଼ନାୟକଗୁଡ଼ା ଗ୍ରାମରେ ପହଞ୍ଚି ବନ୍ଧରେ ବୁଡ଼ି ପ୍ରାଣ ହରାଇଥିବା ଦୁଇ ନାବାଳିକା ଛାତ୍ରୀଙ୍କ ପରିବାରକୁ ଭେଟିଥିଲେ। ଅକାଳରେ ଦୁଇ ଝିଅଙ୍କୁ ହରାଇ ଭାଙ୍ଗିପଡ଼ିଥିବା ପରିବାରବର୍ଗଙ୍କୁ ସେ ସାନ୍ତ୍ୱନା ଦେବା ସହ ଏହି ଦୁଃଖଦ ସମୟରେ ସେମାନଙ୍କ ସହ ରହିଥିବା ପ୍ରକାଶ କରିଥିଲେ। ସେହିପରି ବୁଡ଼ାଗୁଡ଼ା ଗ୍ରାମକୁ ଯାଇ ଶିକରପାଇ ବାଲିଯାତ୍ରା ସମୟରେ ଛୁରାମାଡ଼ ଘଟଣାରେ ପ୍ରାଣ ହରାଇଥିବା ମହେଶ କାଡ୍ରାକାଙ୍କ ପରିବାରବର୍ଗଙ୍କୁ ଭେଟି ଶୋକ ପ୍ରକାଶ କରିଥିଲେ। ଏଥିସହ ଗୁରୁତର ଆହତ ରୋହନ କାଡ୍ରାକାଙ୍କ ପରିବାରକୁ ଭେଟି ତାଙ୍କ ଆଶୁ ଆରୋଗ୍ୟ କାମନା କରିଥିଲେ। ଉଭୟ ପରିବାରକୁ ସରକାରୀ ଓ ବ୍ୟକ୍ତିଗତ ସ୍ତରରେ ଆବଶ୍ୟକ ସହାୟତା ଯୋଗାଇଦେବାକୁ ବିଧାୟକ ପ୍ରତିଶ୍ରୁତି ଦେଇଥିଲେ। ଏହାପରେ ବୁଡ଼ାଗୁଡ଼ା ଗ୍ରାମର ବରିଷ୍ଠ କଂଗ୍ରେସ ନେତା ସୁକା କାଡ୍ରାକା କର୍କଟ ରୋଗରେ ପୀଡ଼ିତ ଥିବା ଖବର ପାଇ ବିଧାୟକ ତାଙ୍କ ବାସଭବନରେ ପହଞ୍ଚିଥିଲେ। ଦୀର୍ଘ ଚାରି ମାସ ଧରି ଅସୁସ୍ଥ ଥିବା ସୁକା କାଡ୍ରାକାଙ୍କ ସ୍ୱାସ୍ଥ୍ୟାବସ୍ଥା ବୁଝିବା ସହ ତାଙ୍କ ଉତ୍ତମ ଚିକିତ୍ସା ପାଇଁ ସମସ୍ତ ପ୍ରକାର ସହଯୋଗ କରାଯିବ ବୋଲି ବିଧାୟକ ଆଶ୍ୱାସନା ଦେଇଥିଲେ।
ଏହି ଗସ୍ତ ସମୟରେ କଲ୍ୟାଣସିଂହପୁର ବ୍ଲକ କଂଗ୍ରେସ ସଭାପତି ଚିନ୍ତାଲି ନାଗେଶ୍ୱର ରାଓ, ସାଂସଦ ପ୍ରତିନିଧି କୁମାରସ୍ୱାମୀ କୌଶଲ୍ୟା, ବିଧାୟକ ପ୍ରତିନିଧି ବାଲାରାଓ ବିଡ଼ିକା, ବ୍ଲକ କଂଗ୍ରେସ କମିଟି ସମ୍ପାଦକ ପ୍ରଶାନ୍ତ ନନ୍ଦ କୌଶଲ୍ୟା ଏବଂ ବିଷମକଟକ ବ୍ଲକ କଂଗ୍ରେସ ସଭାପତି କୃଷ୍ଣ ନାଡ଼ଙ୍ଗଙ୍କ ସମେତ ବହୁ ଦଳୀୟ ନେତା ଓ କର୍ମୀ ଉପସ୍ଥିତ ଥିଲେ।