Odisha Janamata : ରୋଜଗାର ଅଭାବରୁ 4ଯୁବକ ଙ୍କ ଦାଦନ ମୁହାଁ ||

ରୋଜଗାର ଅଭାବରୁ 4ଯୁବକ ଙ୍କ ଦାଦନ ମୁହାଁ ||

08-Sep-2026

ଘର ସମସ୍ୟା ଓ ସ୍ଥାନୀୟ ରୋଜଗାର ଅଭାବରୁ ୪ ଯୁବକ ଦାଦନ ମୁହାଁ

ଓଡିଶା ଜନମତ ରାୟଗଡା,୭/୯,

କାମେଶ୍ୱର କରକରିଆ :-----

ଘରର ଆର୍ଥିକ ସମସ୍ୟା ଓ ଅଞ୍ଚଳରେ ପର୍ଯ୍ୟାପ୍ତ ରୋଜଗାର ସୁଯୋଗ ନ ମିଳିବାରୁ ରାୟଗଡ଼ା ଜିଲ୍ଲା କଲ୍ୟାଣସିଂହପୁର ବ୍ଲକ କରପା ପଞ୍ଚାୟତ ହେଚକଣା ଗ୍ରାମର ୪ ଜଣ ଯୁବକ ପୁଣିଥରେ ଦାଦନ ଯିବାକୁ ବାଧ୍ୟ ହୋଇଛନ୍ତି। ଚାଷ କାମ ସାରି ଗାଁରୁ ବାହାରକୁ ଯାଇ ଶ୍ରମିକ ଭାବେ କାମ କରି ପରିବାର ଚଳାଇବାକୁ ସେମାନେ ଦାଦନ ଯାତ୍ରା କରିଥିବା ଜଣାପଡ଼ିଛି।
ଦାଦନ ଯାଉଥିବା ଯୁବକମାନେ ହେଲେ ଗିରିଧାରୀ ଶ୍ରେଣୀକା (୨୮), କଲାଙ୍ଗ କାଡ୍ରାକା (୨୬), ପ୍ରସାଦ ମଣ୍ଡିକା (୨୬) ଓ ରାମଚନ୍ଦ୍ର କାଡ୍ରାକା (୨୫)। ସେମାନେ ପୂର୍ବରୁ ଆନ୍ଧ୍ରପ୍ରଦେଶକୁ ଦାଦନ ଖଟିବାକୁ ଯାଇଥିଲେ। ଚାଷ କାମ ପାଇଁ ଗାଁକୁ ଫେରିଥିବା ପରେ ଚାଷ କାମ ସାରି ପୁଣି ବାହାର ରାଜ୍ୟକୁ ଯାଇଥିବା କହିଛନ୍ତି।
ଯୁବକମାନଙ୍କ କହିବାନୁଯାୟୀ ଅଞ୍ଚଳରେ ନିୟମିତ କାମ ମିଳୁନାହିଁ। କାମ ମିଳିଲେ ମଧ୍ୟ ମଜୁରି ଟଙ୍କା ପାଇବା ପାଇଁ ଦୀର୍ଘ ସମୟ ଧରି ଘୁରିବାକୁ ପଡ଼ୁଛି। କେତେକ କାମର ମଜୁରି ତିନିରୁ ଚାରି ମାସ ଧରି ମିଳିନଥିବାରୁ ପରିବାର ଚଳାଇବା କଷ୍ଟକର ହୋଇପଡ଼ୁଛି। ତେଣୁ ବାହାରକୁ ଯାଇ କାମ କରି ସପ୍ତାହକୁ ଥରେ ଘରକୁ ଟଙ୍କା ପଠାଇଲେ ପରିବାର ଚଳିପାରୁଛି ବୋଲି ସେମାନେ କହିଛନ୍ତି। ପ୍ରତିବର୍ଷ ଚାଷ ସମୟରେ ଗାଁକୁ ଫେରି ଚାଷ କାମ ସାରିବା ପରେ ପୁଣି ଦାଦନ ଖଟିବାକୁ ଯିବାକୁ ପଡ଼ୁଛି। ଗାଁରେ ରହିଲେ ପରିବାରର ଭରଣପୋଷଣ କିପରି ହେବ ବୋଲି ସେମାନେ ପ୍ରଶ୍ନ କରିଛନ୍ତି। ସ୍ଥାନୀୟ ଅଞ୍ଚଳରେ ନିୟମିତ କାମ ଓ ସମୟରେ ମଜୁରି ମିଳିଲେ ବାହାରକୁ ଯିବାର ଆବଶ୍ୟକତା ରହିବନାହିଁ ବୋଲି ସେମାନେ କହିଛନ୍ତି। ଏନେଇ ଶ୍ରମିକ ଅଧିକାରୀ ଲୋକେଶ୍ୱରୀ ମାଝୀଙ୍କ ସହ ଯୋଗାଯୋଗ କରାଯାଇଥିଲେ ମଧ୍ୟ ତାଙ୍କର କୌଣସି ପ୍ରତିକ୍ରିୟା ମିଳିପାରିନଥିଲା। ଅନ୍ୟପକ୍ଷରେ ଜିଲ୍ଲା ଶ୍ରମ ଅଧିକାରୀ ରବୀନ୍ଦ୍ରନାଥ ତ୍ରିପାଠୀ କହିଛନ୍ତି ଯେ, ସରକାରୀ ନିୟମ ଅନୁଯାୟୀ ଦାଦନ ଯାଉଥିବା ଶ୍ରମିକମାନେ ବ୍ଲକ, ଥାନା ଓ ଶ୍ରମ ବିଭାଗ କାର୍ଯ୍ୟାଳୟକୁ ସୂଚନା ଦେଇ ଯିବା ଆବଶ୍ୟକ। ପ୍ରତ୍ୟେକ ପଞ୍ଚାୟତର ସରପଞ୍ଚଙ୍କୁ ନେଇ ଦାଦନ ଶ୍ରମିକଙ୍କ ସୁରକ୍ଷା ଓ ସରକାରୀ ନିୟମ ସମ୍ପର୍କରେ ସଚେତନତା କରାଯିବ। ଦାଦନ ଯାଉଥିବା ଶ୍ରମିକମାନେ ନିଜର ପରିଚୟ ଓ ଯାତ୍ରା ସମ୍ପର୍କିତ ସୂଚନା ବ୍ଲକ, ଥାନା ଓ ଶ୍ରମ ବିଭାଗ କାର୍ଯ୍ୟାଳୟରେ ଦେଇ ଯାଇପାରିବେ ବୋଲି ସେ କହିଛନ୍ତି। ସ୍ଥାନୀୟ ଅଞ୍ଚଳରେ ରୋଜଗାର ସୁଯୋଗ ସୃଷ୍ଟି ସହ ଶ୍ରମିକଙ୍କ ପ୍ରାପ୍ୟ ମଜୁରି ସମୟରେ ପ୍ରଦାନ କରାଗଲେ ଦାଦନ ପ୍ରବଣତା ହ୍ରାସ ପାଇପାରିବ ବୋଲି ସାଧାରଣରେ ମତ ପ୍ରକାଶ ପାଇଛି।