Odisha Janamata : ତାରାତାରିଣୀ ମହାବିଦ୍ୟାଳୟ ରେ ନିଶାମୁକ୍ତ ଭାରତ ଏକଶହ ସପ୍ତାହ କାର୍ଯ୍ୟକ୍ରମ ଉଦଘାଟିତ ||

ତାରାତାରିଣୀ ମହାବିଦ୍ୟାଳୟ ରେ ନିଶାମୁକ୍ତ ଭାରତ ଏକଶହ ସପ୍ତାହ କାର୍ଯ୍ୟକ୍ରମ ଉଦଘାଟିତ ||

20-Sep-2026

ତାରା ତାରିଣୀ ମହାବିଦ୍ୟାଳୟରେ ‘ନିଶା ମୁକ୍ତ ଭାରତ ୧୦୦ ସପ୍ତାହ ଅଭିଯାନ’ ଉଦ୍ଘାଟିତ

ଓଡିଶା ଜନ ମତ,ପୁରୁଷୋତ୍ତମପୁର, ଶୁଭଙ୍କର ଦାଶ :---

ତାରା ତାରିଣୀ ମହାବିଦ୍ୟାଳୟରେ ଜାତୀୟ ସେବା ଯୋଜନା (NSS) ପକ୍ଷରୁ ‘ନିଶା ମୁକ୍ତ ଭାରତ ୧୦୦ ସପ୍ତାହ ଅଭିଯାନ’ର ଉଦ୍ଘାଟନୀ କାର୍ଯ୍ୟକ୍ରମ ଆୟୋଜିତ ହୋଇଯାଇଛି। NSS ବ୍ରହ୍ମପୁର ବ୍ୟୁରୋର କାର୍ଯ୍ୟକ୍ରମ ସଂଯୋଜକ ଡଃ ଶଙ୍କର୍ଷଣ ମଲ୍ଲିକଙ୍କ ପ୍ରତ୍ୟକ୍ଷ ତତ୍ତ୍ୱାବଧାନ ଏବଂ NSS ମହିଳା ବିଭାଗର କାର୍ଯ୍ୟକ୍ରମ ଅଧିକାରୀ ଡଃ ସ୍ୱାଗତିକା ଦାଶଙ୍କ ଆନୁକୂଲ୍ୟରେ ଏହି କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା।
ମହାବିଦ୍ୟାଳୟର ଅଧ୍ୟକ୍ଷ ଶ୍ରୀ ଅରବିନ୍ଦ ଦାଶ କାର୍ଯ୍ୟକ୍ରମରେ ସଭାପତିତ୍ୱ କରିଥିଲେ। ମୁଖ୍ୟ ଅତିଥି ତହସିଲଦାର ଶ୍ରୀ ବିନୋଦ କୁମାର ବେହେରା ନିଶା ବିରୋଧୀ ସଚେତନତା ସୃଷ୍ଟିରେ ଯୁବସମାଜର ଭୂମିକା ଉପରେ ଆଲୋକପାତ କରିଥିଲେ। ଆଇଆଇସି ଶ୍ରୀ କୁଳମଣି ସେଠୀ ନିଶା ନିବାରଣ ସମ୍ପର୍କିତ ଆଇନ, ବିଭିନ୍ନ ଧାରା ଓ ଦଣ୍ଡବିଧାନ ବିଷୟରେ ସଚେତନ କରାଇଥିଲେ।
ରିସୋର୍ସ ପର୍ସନ ମେଡିକାଲ ଅଫିସର ଶ୍ରୀ ପ୍ରଶାନ୍ତ କୁମାର ବେହେରା ନିଶାସେବନର ସ୍ୱାସ୍ଥ୍ୟଗତ କୁପ୍ରଭାବ, ଏହାର ପ୍ରତିରୋଧ ଏବଂ ନିଶା ନିବାରଣର ବିଭିନ୍ନ ଦିଗ ସମ୍ପର୍କରେ ବିସ୍ତୃତ ଆଲୋଚନା କରିଥିଲେ। ଏହି ଅବସରରେ NSS ସ୍ୱେଚ୍ଛାସେବୀମାନଙ୍କ ପକ୍ଷରୁ ନିଶା ବିରୋଧୀ ସଚେତନତାମୂଳକ ନାଟକ ପରିବେଷଣ କରାଯାଇଥିଲା।
କାର୍ଯ୍ୟକ୍ରମର ଶେଷରେ ଡଃ ପ୍ରକାଶ ବେହେରା ଉପସ୍ଥିତ ଅତିଥି, ଅଧ୍ୟାପକ-ଅଧ୍ୟାପିକା, NSS ସ୍ୱେଚ୍ଛାସେବୀ ଓ ସମସ୍ତ ଅଂଶଗ୍ରହଣକାରୀଙ୍କୁ ଧନ୍ୟବାଦ ଅର୍ପଣ କରିଥିଲେ। ନିଶାମୁକ୍ତ ସମାଜ ଗଠନ ପାଇଁ ଯୁବସମାଜ ମଧ୍ୟରେ ସଚେତନତା ଓ ସାମାଜିକ ଦାୟିତ୍ୱବୋଧ ବୃଦ୍ଧି କରିବା ଏହି ଅଭିଯାନର ମୁଖ୍ୟ ଉଦ୍ଦେଶ୍ୟ ବୋଲି ପ୍ରକାଶ ପାଇଥିଲା।