Odisha Janamata : ବେଦାନ୍ତ ର ବକ୍ସାଇଟ ଡ଼ମ୍ପିଙ୍ଗ କୁ ବିରୋଧ ରେ ଶିବ ପଦର ପଞ୍ଚାୟତ ବାସୀଙ୍କ 46ଦିନ ଧରି ଶାନ୍ତିପୂର୍ଣ ଆନ୍ଦୋଳନ |

ବେଦାନ୍ତ ର ବକ୍ସାଇଟ ଡ଼ମ୍ପିଙ୍ଗ କୁ ବିରୋଧ ରେ ଶିବ ପଦର ପଞ୍ଚାୟତ ବାସୀଙ୍କ 46ଦିନ ଧରି ଶାନ୍ତିପୂର୍ଣ ଆନ୍ଦୋଳନ |

21-Jul-2026

ବେଦାନ୍ତର ବକ୍ସାଇଟ୍ ଡମ୍ପିଂକୁ ବିରୋଧ: ଶିବପଦର ପଞ୍ଚାୟତବାସୀଙ୍କ ୪୬ ଦିନ ଧରି ଶାନ୍ତିପୂର୍ଣ୍ଣ ଆନ୍ଦୋଳନ

ଓଡିଶା ଜନମତ ରାୟଗଡା,୨୧/୭,

କାମେଶ୍ୱର କରକରିଆ): -----

ରାୟଗଡ଼ା ଜିଲ୍ଲା ମୁନିଗୁଡା ବ୍ଲକ୍‌ର ଶିବପଦର ପଞ୍ଚାୟତ ଅନ୍ତର୍ଗତ ଦହିଖାଲ ରେଳ ଷ୍ଟେସନ ନିକଟରେ ବେଦାନ୍ତ କମ୍ପାନୀ ପକ୍ଷରୁ ବକ୍ସାଇଟ୍ ଡମ୍ପିଂ ଓ ପରିବହନକୁ ବିରୋଧ କରି ସ୍ଥାନୀୟ ଜନସାଧାରଣଙ୍କ ଶାନ୍ତିପୂର୍ଣ୍ଣ ଆନ୍ଦୋଳନ ଜାରି ରହିଛି। ଗତ ଜୁନ୍ ୫ ତାରିଖରୁ ଆରମ୍ଭ ହୋଇଥିବା ଏହି ଆନ୍ଦୋଳନକୁ ଆଜି ୪୬ ଦିନ ବିତିଥିଲେ ମଧ୍ୟ ପ୍ରଶାସନ ପକ୍ଷରୁ କୌଣସି ସ୍ଥାୟୀ ପଦକ୍ଷେପ ନିଆଯାଇନଥିବା ଅଭିଯୋଗ କରିଛନ୍ତି ଆନ୍ଦୋଳ ନକାରୀ।ଆନ୍ଦୋଳନକାରୀଙ୍କ କହିବା ଅନୁସାରେ, ଦହିଖାଲ ରେଳ ଷ୍ଟେସନରେ ବକ୍ସାଇଟ୍ ଅନଲୋଡ୍ କରାଯାଇ ବେଦାନ୍ତ କମ୍ପାନୀକୁ ପରିବହନ କରାଯାଉଛି। ଏହା ଫଳରେ ଅଞ୍ଚଳର ପରିବେଶ, ଜଳ, ଜମି ଓ ସାଧାରଣ ଲୋକଙ୍କ ସ୍ୱାସ୍ଥ୍ୟ ଉପରେ କୁପ୍ରଭାବ ପଡ଼ିବ ବୋଲି ସେମାନେ ଆଶଙ୍କା ପ୍ରକାଶ କରିଛନ୍ତି। ଧୂଳି ପ୍ରଦୂଷଣ ଯୋଗୁଁ ବିଭିନ୍ନ ରୋଗ ବ୍ୟାପିବା ସହ ପରିବେଶର କ୍ଷତି ହେବାର ସମ୍ଭାବନା ଥିବାରୁ ସେମାନେ ଏହି ରାସ୍ତାରେ ବକ୍ସାଇଟ୍ ପରିବହନକୁ ବିରୋଧ କରୁଛନ୍ତି।
ପଞ୍ଚାୟତବାସୀଙ୍କ ଦାବି ହେଉଛି, ସେମାନଙ୍କ ମୌଳିକ ଅଧିକାର ଓ ପରିବେଶ ସୁରକ୍ଷାକୁ ସମ୍ମାନ ଦିଆଯାଉ। ଦାବି ପୂରଣ ନହେବା ପର୍ଯ୍ୟନ୍ତ ଆନ୍ଦୋଳନ ଜାରି ରହିବ ବୋଲି ସେମାନେ ସ୍ପଷ୍ଟ କରିଛନ୍ତି।ଆଜିର ଆନ୍ଦୋଳନରେ ଶିବପଦର ପଞ୍ଚାୟତର ବହୁ ସଂଖ୍ୟକ ମହିଳା ଓ ପୁରୁଷ ସାମିଲ ହୋଇ ରାସ୍ତା ଅବରୋଧ କରି ବିକ୍ଷୋଭ ପ୍ରଦର୍ଶନ କରିଥିଲେ। ସ୍ଥାନୀୟ ଲୋକଙ୍କ ସ୍ୱାର୍ଥ ଓ ପରିବେଶ ସୁରକ୍ଷା ପାଇଁ ଏହି ଆନ୍ଦୋଳନ କରାଯାଉଥିବା ସେମାନେ କହିଛନ୍ତି।