Odisha Janamata : ରାୟଗଡା ରେ ଭାରତୀୟ ମଜୁଦୁର ସଂଘ ର ରାଷ୍ଟ୍ରୀୟ ପର୍ଯ୍ୟାବରଣ ଦିବସ ପାଳିତ |

ରାୟଗଡା ରେ ଭାରତୀୟ ମଜୁଦୁର ସଂଘ ର ରାଷ୍ଟ୍ରୀୟ ପର୍ଯ୍ୟାବରଣ ଦିବସ ପାଳିତ |

28-Aug-2026

ରାୟଗଡ଼ାରେ ଭାରତୀୟ ମଜଦୁର ସଂଘର ପର୍ଯ୍ୟାବରଣ ମଞ୍ଚ ପକ୍ଷରୁ ରାଷ୍ଟ୍ରୀୟ ପର୍ଯ୍ୟାବରଣ ଦିବସ ପାଳିତ

ଓଡିଶା ଜନମତରାୟଗଡ଼ା, ୨୮/୦୮,

କାମେଶ୍ୱର କରକରିଆ :------

ଭାରତୀୟ ମଜଦୁର ସଂଘର ପର୍ଯ୍ୟାବରଣ ମଞ୍ଚ ପକ୍ଷରୁ ଅମୃତା ଦେବୀ ବଳିଦାନ ଦିବସକୁ ରାଷ୍ଟ୍ରୀୟ ପର୍ଯ୍ୟାବରଣ ଦିବସ ଭାବେ ପାଳନ କରାଯାଇଛି। ଏହି ଅବସରରେ ରାୟଗଡ଼ା ଜିଲ୍ଲାର ବିଭିନ୍ନ ବ୍ଲକରେ ବୃକ୍ଷରୋପଣ ସହ ପରିବେଶ ସୁରକ୍ଷା ନେଇ ସଚେତନତା କାର୍ଯ୍ୟକ୍ରମ ଆୟୋଜିତ ହୋଇଥିଲା।ଏହି ପରିପ୍ରେକ୍ଷୀରେ ରାୟଗଡ଼ା ବ୍ଲକ ଅନ୍ତର୍ଗତ ଜେମାଦେଇପେଣ୍ଠସ୍ଥିତ ମା’ ମଝିଘରିଆଣୀ ମନ୍ଦିର ପରିସର ସମେତ ଜେମାଦେଇପେଣ୍ଠ, ବୈରାଗୀ ହାଲୁଆ ଓ ଶେଷଖାଲ ପଞ୍ଚାୟତର ବିଭିନ୍ନ ସ୍ଥାନରେ ପ୍ରାୟ ୨୯୦ରୁ ଊର୍ଦ୍ଧ୍ୱ ଔଷଧୀୟ ଓ ଫଳ ଗଛର ଚାରା ରୋପଣ କରାଯାଇଥିଲାକାର୍ଯ୍ୟକ୍ରମରେ ଅତିଥି ଭାବେ ରାଷ୍ଟ୍ରୀୟ ସ୍ୱୟଂସେବକ ସଂଘର ସକ୍ଷମ ଓଡ଼ିଶା ପଶ୍ଚିମ ପ୍ରାନ୍ତର ସଂରକ୍ଷକ ତଥା ଓଡ଼ିଶା କର୍ମଜୀବୀ ସାମ୍ବାଦିକ ସଂଘର ରାଜ୍ୟ ସଭାପତି ଡାକ୍ତର ବାଦଲ କୁମାର ତା, ଶେଷଖାଲ ଥାନା ଅଧିକାରୀ ଖିରୋଦ ଚନ୍ଦ୍ର ବାଗ, ବନପାଳ ଗୌରୀ ଶଙ୍କର ସାହୁ ଓ ଶେଷଖାଲ ସରପଞ୍ଚ ବସନ୍ତ ବିଡ଼ିକା ଯୋଗଦେଇ ଚାରାରୋପଣ କରିଥିଲେ।ମୁଖ୍ୟବକ୍ତା ଭାବେ ଶ୍ରମିକ ନେତା ତଥା ଭାରତୀୟ ମଜଦୁର ସଂଘର ରାଜ୍ୟ ଉପସଭାପତି ଯୋଗେଶ୍ୱର ଦାସ ଯୋଗଦେଇ ପରିବେଶ ସୁରକ୍ଷାର ଗୁରୁତ୍ୱ ଉପରେ ଆଲୋକପାତ କରିଥିଲେ। ସେ କହିଥିଲେ ଯେ, ଅମୃତା ଦେବୀ ବଳିଦାନ ଦିବସକୁ ଏକ ସାର୍ବଜନୀନ ପର୍ବ ଭାବେ ପର୍ଯ୍ୟାବରଣ ଦିବସ ରୂପେ ପାଳନ କରିବା ସହ ପରିବେଶ ସୁରକ୍ଷା ନେଇ ଜନସଚେତନତା ସୃଷ୍ଟି କରିବା ଭାରତୀୟ ମଜଦୁର ସଂଘର ମୁଖ୍ୟ ଲକ୍ଷ୍ୟ ଓ ଉଦ୍ଦେଶ୍ୟ। ବର୍ତ୍ତମାନ ସମୟରେ ଶିଳ୍ପାୟନର ବୃଦ୍ଧି, କଳକାରଖାନାରୁ ନିର୍ଗତ ଧୂଆଁ, ଯାନବାହନର ପ୍ରଦୂଷଣ ଏବଂ ବିଭିନ୍ନ ଶୀତତାପ ନିୟନ୍ତ୍ରିତ ଯନ୍ତ୍ରପାତିରୁ ନିର୍ଗତ ଗ୍ୟାସ୍‌ ଯୋଗୁଁ ପରିବେଶ ଉପରେ ଏହାର ନକାରାତ୍ମକ ପ୍ରଭାବ ପଡ଼ୁଛି। ଫଳରେ ପ୍ରତିବର୍ଷ ତାପମାତ୍ରା ବୃଦ୍ଧି ସହ ଜଳବାୟୁ ପରିବର୍ତ୍ତନ ଭଳି ସମସ୍ୟା ଦେଖାଦେଉଛି। ପରିବେଶ ବିନା ମାନବ ସମାଜର କଲ୍ୟାଣ ଅସମ୍ଭବ। ପରିବେଶ ନ ରହିଲେ ଜୀବସତ୍ତାର ଅସ୍ତିତ୍ୱ ମଧ୍ୟ ରହିବ ନାହିଁ। ତେଣୁ ପରିବେଶ ସଂରକ୍ଷଣ ପାଇଁ ସମସ୍ତଙ୍କ ସହଯୋଗ ଆବଶ୍ୟକ ବୋଲି ଶ୍ରୀ ଦାସ ପ୍ରକାଶ କରିଥିଲେ। ଅତିଥିମାନେ ଭାରତୀୟ ମଜଦୁର ସଂଘର ଏଭଳି ପରିବେଶ ସୁରକ୍ଷାମୂଳକ ପଦକ୍ଷେପକୁ ପ୍ରଶଂସା କରିଥିଲେ। ଶ୍ରମିକଙ୍କ ସମସ୍ୟା ସମାଧାନ ସହ ସମାଜ ଓ ପରିବେଶର ଉନ୍ନତି ପାଇଁ ସଂଘ ପକ୍ଷରୁ କରାଯାଉଥିବା ବିଭିନ୍ନ ସାମାଜିକ କାର୍ଯ୍ୟକ୍ରମ ଚିରସ୍ମରଣୀୟ ବୋଲି ସେମାନେ କହିଥିଲେ। ଭାରତୀୟ ମଜଦୁର ସଂଘର ଜିଲ୍ଲା ସମ୍ପାଦକ ଗଣେଶ କୁମାର ସାହୁ ଏବଂ ପର୍ଯ୍ୟାବରଣ ମଞ୍ଚର ଜିଲ୍ଲା ସଂଯୋଜକ ଦୁର୍ଗା ମାଧବ ଘୋଷଙ୍କ ନେତୃତ୍ୱରେ ଏହି କାର୍ଯ୍ୟକ୍ରମ ଆୟୋଜିତ ହୋଇଥିଲା। ସଂଘର ମୋହନ ରାଓ ମାଝି, ଉଷାରାଣୀ ଦାଶ, ନେହା ସିଂ ଓ କେ. ରାମବାବୁ କାର୍ଯ୍ୟକ୍ରମ ପରିଚାଳନାରେ ସହଯୋଗ କରିଥିଲେ। ଏଥିରେ ରାୟଗଡ଼ା ବନ ବିଭାଗର କର୍ମଚାରୀ, ବରିଷ୍ଠ ସାମ୍ବାଦିକ ଦୀପକ କୁମାର ପୃଷ୍ଟି, ଯୁବ ସାମ୍ବାଦିକ ଅଜୟ କୁମାର ରଥଙ୍କ ସମେତ ବନରକ୍ଷୀମାନେ ଯୋଗଦେଇଥିଲେ। ଏଥିସହ ଭାରତୀୟ ମଜଦୁର ସଂଘ, ପର୍ଯ୍ୟାବରଣ ମଞ୍ଚ, ବିଶ୍ୱକର୍ମା ମଜଦୁର ସଂଘ, ଅଲ୍ ଓଡ଼ିଶା ଅଙ୍ଗନବାଡ଼ି ଲେଡିଜ୍ ୱାର୍କର୍ସ ଆସୋସିଏସନ୍, ଓଡ଼ିଶା ରାଜ୍ୟ ହସ୍ପିଟାଲ କର୍ମଚାରୀ ସଂଘ, ବ୍ୟବସାୟ ମଜଦୁର ସଂଘ, ଓଡ଼ିଶା ରାଜ୍ୟ ଆଶା କର୍ମୀ ସଂଘ, ରାୟଗଡ଼ା ଜିଲ୍ଲା ସଫେଇ ମଜଦୁର ସଂଘ ଓ ଜେ.କେ. ପେପର ମଜଦୁର ସଂଘର ପ୍ରତିନିଧିମାନେ ଉପସ୍ଥିତ ଥିଲେ।