Odisha Janamata : ଗଞ୍ଜାମ ଜିଲ୍ଲା ପାଳ ଙ୍କ ନିର୍ଦ୍ଧେଶ ବିନା ଡାକ୍ତରୀ ପରାମର୍ଶ ରେ ଗର୍ଭପାତ କଲେ ଔଷଧଦୋକାନୀ ଙ୍କ ଉପରେ ହେବ କାର୍ଯ୍ୟନୁଷ୍ଠାନ |

ଗଞ୍ଜାମ ଜିଲ୍ଲା ପାଳ ଙ୍କ ନିର୍ଦ୍ଧେଶ ବିନା ଡାକ୍ତରୀ ପରାମର୍ଶ ରେ ଗର୍ଭପାତ କଲେ ଔଷଧଦୋକାନୀ ଙ୍କ ଉପରେ ହେବ କାର୍ଯ୍ୟନୁଷ୍ଠାନ |

30-Sep-2026

ବିନା ଡାକ୍ତରୀ ପରାମର୍ଶ ବା ପ୍ରେସକ୍ରିପସନରେ ଗର୍ଭପାତ ଅବା ଔଷଧ ବିକ୍ରି କଲେ ଗଞ୍ଜାମ ଜିଲ୍ଲା ପ୍ରଶାସନ ପକ୍ଷରୁ ଦୃଢ କାର୍ଯ୍ୟାନୁଷ୍ଠାନ ହେବ ।।

ଓଡ଼ିଶା ଜନମତ, ଛତ୍ରପୁର ,ତା. ୩୦/ ୯ (କେ.ସତ୍ୟନାରାୟଣ ରେଡ୍ଡୀ)
ବିନା ବୈଧ ଡାକ୍ତରୀ ପରାମର୍ଶ ବା ପ୍ରେସକ୍ରିପସନରେ ଗର୍ଭପାତ ପାଇଁ ବ୍ୟବହୃତ ଔଷଧର ବିକ୍ରି ଉପରେ କଡ଼ା ନଜର ରଖିବାକୁ ଗଞ୍ଜାମ ଜିଲ୍ଲାର ସମସ୍ତ ଔଷଧ ନିରୀକ୍ଷକଙ୍କୁ ନିର୍ଦ୍ଦେଶ ଦିଆଯାଇଛି। ୨୯ ସେପ୍ଟେମ୍ବର ୨୦୨୬ରେ ଜିଲ୍ଲାପାଳ ଭି. କୀର୍ତ୍ତି ଭାସନଙ୍କ ଅଧ୍ୟକ୍ଷତାରେ ଅନୁଷ୍ଠିତ ପିସି ଆଣ୍ଡ ପିଏନଡିଟି ଆଇନ ସମ୍ପର୍କିତ ଜିଲ୍ଲା ପରାମର୍ଶଦାତା କମିଟି ବୈଠକରେ ଏନେଇ ଆଲୋଚନା ପରେ ଏହି ପଦକ୍ଷେପ ନିଆଯାଇଛି।
ଜିଲ୍ଲାର ବିଭିନ୍ନ ଔଷଧ ଦୋକାନରେ ବୈଧ ଡାକ୍ତରୀ ପ୍ରେସକ୍ରିପସନ୍‌ ବିନା ଗର୍ଭପାତ ପାଇଁ ବ୍ୟବହୃତ ଔଷଧ ଉପଲବ୍ଧ ହେଉଥିବା ନେଇ ବୈଠକରେ ଉଦବେଗ ପ୍ରକାଶ ପାଇଥିଲା। ଏଭଳି ଔଷଧର ଅନଧିକୃତ ବ୍ୟବହାର ଫଳରେ ଅସୁରକ୍ଷିତ ଓ ବେଆଇନ ଗର୍ଭପାତ ସହ ମାତୃ ସ୍ୱାସ୍ଥ୍ୟ ଉପରେ ପ୍ରତିକୂଳ ପ୍ରଭାବ ପଡୁଥିବା ଉଲ୍ଲେଖ କରାଯାଇଥିଲା। ଏଥିସହ ଲିଙ୍ଗ ଚୟନ ଆଧାରିତ ଗର୍ଭପାତ ଭଳି ବେଆଇନ କାର୍ଯ୍ୟକଳାପକୁ ରୋକିବା ଉପରେ ମଧ୍ୟ ବୈଠକରେ ଗୁରୁତ୍ୱ ଦିଆଯାଇଥିଲା।
ଔଷଧ ନିରୀକ୍ଷକମାନଙ୍କୁ ଜିଲ୍ଲାର ସମସ୍ତ ଔଷଧ ଦୋକାନ ଓ ଫାର୍ମାସୀକୁ ଆବଶ୍ୟକ ନିର୍ଦ୍ଦେଶ ଦେବା ସହ ଗର୍ଭପାତ ପାଇଁ ବ୍ୟବହୃତ ମିଫେପ୍ରିଷ୍ଟୋନ୍‌, ମିସୋପ୍ରୋଷ୍ଟଲ୍‌ ମିଶ୍ରଣ ଏବଂ ଅନ୍ୟାନ୍ୟ ନିର୍ଦ୍ଦିଷ୍ଟ ଶ୍ରେଣୀର ଔଷଧ ବୈଧ ପ୍ରେସକ୍ରିପସନ୍‌ ବିନା ବିକ୍ରି ନକରିବାକୁ ସୁନିଶ୍ଚିତ କରିବାକୁ କୁହାଯାଇଛି। ଏଥିପାଇଁ ନିୟମିତ ନିରୀକ୍ଷଣ, ଅଚାନକ ଯାଞ୍ଚ ଏବଂ ଆବଶ୍ୟକ ସ୍ଥଳେ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ ପାଇଁ ନିର୍ଦ୍ଦେଶ ରହିଛି।
ସୂଚନାଯୋଗ୍ୟ ଯେ, ଔଷଧ ଓ ପ୍ରସାଧନ ସାମଗ୍ରୀ ଆଇନ, ୧୯୪୦ ଏବଂ ନିୟମାବଳୀ, ୧୯୪୫ ଅନୁଯାୟୀ ନିର୍ଦ୍ଦିଷ୍ଟ ଶ୍ରେଣୀର ଔଷଧ ବୈଧ ପ୍ରେସକ୍ରିପସନ୍‌ ବିନା ବିକ୍ରି କରାଯାଇପାରିବ ନାହିଁ। ପିସି ଆଣ୍ଡ ପିଏନଡିଟି ଆଇନ, ୧୯୯୪ ଅନୁଯାୟୀ ଲିଙ୍ଗ ଚୟନ ଓ ଲିଙ୍ଗ ଚୟନ ଆଧାରିତ ଗର୍ଭପାତ ଭଳି ବେଆଇନ କାର୍ଯ୍ୟକଳାପ ଦଣ୍ଡନୀୟ ଅପରାଧ ଅଟେ।
ଜିଲ୍ଲାର ସମସ୍ତ ଔଷଧ ନିରୀକ୍ଷକଙ୍କୁ ନିର୍ଦ୍ଦେଶ ପ୍ରାପ୍ତିର ୭ ଦିନ ମଧ୍ୟରେ ଗ୍ରହଣ କରାଯାଇଥିବା ପଦକ୍ଷେପ ସମ୍ପର୍କିତ ରିପୋର୍ଟ ଦାଖଲ କରିବାକୁ କୁହାଯାଇଛି ।