Odisha Janamata : କୋଦଳା ଏନଏସି କାର୍ଯ୍ୟାଳୟ ପରିସରରେ ସାମ୍ବାଦିକ ଙ୍କୁ ଆକ୍ରମଣ ଘଟଣା, ତଦନ୍ତ ପାଈଁ ପିଡି ଆସି ମୁହଁ ଖୋଲିଲେ ନାହିଁ |

କୋଦଳା ଏନଏସି କାର୍ଯ୍ୟାଳୟ ପରିସରରେ ସାମ୍ବାଦିକ ଙ୍କୁ ଆକ୍ରମଣ ଘଟଣା, ତଦନ୍ତ ପାଈଁ ପିଡି ଆସି ମୁହଁ ଖୋଲିଲେ ନାହିଁ |

02-Dec-2025

କୋଦଳା ଏନଏସି କାର୍ଯ୍ଯାଳୟ ପରିସରରେ ସାମ୍ବାଦିକଙ୍କୁ ଆକ୍ରମଣ ଘଟଣା,
ତଦନ୍ତ ପାଇଁ ଆସିଲେ ପିଡି ମୁହଁ ନ ଖୋଲି ଚାଲିଗଲେ,

ଓଡିଶା ଜନ ମତ,କୋଦଳା, ସୂର୍ଯ୍ୟନାରାୟଣ ବଡୁ, ୦୨/୧୨/୨୦୨୫:

ଗଞ୍ଜାମ ଜିଲ୍ଲା କୋଦଳା ବିଜ୍ଞାପିତ ଅଞ୍ଚଳ ପରିଷଦ କାର୍ଯ୍ୟାଳୟରେ ସାମ୍ବାଦିକ ଭଗବାନ ପାଢୀଙ୍କୁ ମରଣାନ୍ତକ ଆକ୍ରମଣ ଘଟଣାରେ କୋଦଳା ଥାନାରେ ରୁଜୁ ହୋଇଛି ମାମଲା। ପୋଲିସ ତନାଘନା ଜାରି ରଖିଛି, ଅଭିଯୁକ୍ତଙ୍କୁ ଗିରଫ କରିବାକୁ ପୋଲିସ ଖୋଜୁଛି, ହେଲେ ଅଭିଯୁକ୍ତ ମାନଙ୍କୁ ଗିରଫ କରାଯାଇପାରିନାହିଁ। ସେପଟେ କୋଦଳା ଏନଏସି କାର୍ଯ୍ଯାଳୟରୁ ସିସିଟିଭି ଫୁଟେଜ ଗାଏବ୍ ହୋଇଯାଇଥିବା ଜାଣିବାକୁ ମିଳିଛି ! ସିସିଟିଭି ଫୁଟେଜ ନଥିବାରୁ ତଦନ୍ତ ପ୍ରକ୍ରିୟାରେ ବାଧା ସୃଷ୍ଟି ହୋଇଛି ।ଖବର ପ୍ରକାଶ ପରେ ଘଟଣାକୁ ନେଇ ରାଜ୍ୟ ସରକାରଙ୍କ ଗୃହ ବିଭାଗ ଏକ୍ସ ମାଧ୍ୟମରେ ଜିଲ୍ଲା ଆରକ୍ଷୀ ଅଧିକ୍ଷକଙ୍କୁ କାର୍ଯ୍ୟାନୁଷ୍ଠାନ ନେବାକୁ ଅବଗତ କରାଇଛନ୍ତି ।ମାମଲାକୁ ନେଇ ଗଞ୍ଜାମ ଜିଲ୍ଲା ଡୁଡା ପ୍ରକଳ୍ପ ନିର୍ଦ୍ଦେଶକ ସୁନୀଲ କୁମାର କେରକେଟା ମଙ୍ଗଳବାର କୋଦଳା ଏନଏସିରେ ପହଞ୍ଚି ତଦନ୍ତ କରିଛନ୍ତି। ଏନ ଏ ସି କାର୍ଯ୍ୟନିର୍ବାହୀ ଅଧିକାରୀ, ଅଧ୍ଯକ୍ଷଙ୍କ ସହିତ ଘଟଣା ସଂପର୍କରେ ଆଲୋଚନା କରିଛନ୍ତି। ତେବେ ଏନ ଏ ସି କାର୍ଯ୍ଯାଳୟ ପରିସରରେ ବହୁ ସାମ୍ବାଦିକ ଡୁଡା ପିଡିକୁଂ ଘଟଣା ସଂପର୍କରେ ପଚାରିବାରୁ ସେ ମୁହଁ ଖୋଲି ନାହାନ୍ତି। ତଦନ୍ତ ଚାଲିଥିବା କହି ସାମ୍ବାଦିକ ମାନଙ୍କ ବିଭିନ୍ନ ପ୍ରଶ୍ନର ଉତ୍ତର ନଦେଇ ମୁହଁ ଆଡେଇ ଚାଲି ଯାଇଥିଲେ। ଯାହାକୁ ନେଇ ଅଧିକ ସନ୍ଦେହ ଘନୀଭୂତ ହୋଇଛି। ଡୁଡା ପିଡି ନିରପେକ୍ଷ ତଦନ୍ତ କରିବେ ନା ନିଜ କାର୍ଯ୍ୟାଳୟର କର୍ମଚାରୀଙ୍କୁ ସୁରକ୍ଷା ଦେବେ ସେ ନେଇ ଅଞ୍ଚଳବାସି ପ୍ରଶ୍ନ ଉଠାଇଛନ୍ତି।କିନ୍ତୁ ଡୁଡା ପିଡି ମହାଶୟ ଏନଏସି କାର୍ଯ୍ୟାଳୟ ରୁ ଅନ୍ୟ ରାସ୍ତା ଦେଇ କୋଦଳା ଥାନାକୁ ମଧ୍ୟ ଯାଇଥିବା ଦେଖିବାକୁ ମିଳିଛି। ସେପଟେ ମଂଗଳବାର ବହୁ ସାମ୍ବାଦିକ ପୁଣିଥରେ କୋଦଳା ଥାନାକୁ ଯାଇ ଥାନା ଅଧିକାରୀ ସୁବାଷ ଚନ୍ଦ୍ର ବେହେରାଙ୍କୁ ଭେଟି ତଦନ୍ତ ଓ କାର୍ଯ୍ଯାନୁଷ୍ଠାନ ନେଇ ବୁଝିଥିଲେ। ହାର୍ଡ ଡ଼ିସକ ସିଜ କରାଯାଇଛି,ଦୋଷୀକୁ ନିଶ୍ଚିତ ଗିରଫ କରାଯିବ ବୋଲି ପ୍ରତିଶ୍ରୁତି ଦେଇଛନ୍ତି ଥାନା ଅଧିକାରୀ ଶ୍ରୀ ବେହେରା । ଅଧ୍ୟକ୍ଷ ସରକାରୀ ଦଳର ହୋଇ ଥିବାରୁ ଘଟଣାକୁ ଚପାଇ ଦେବାକୁ ଯୋଜନା ଚାଲିଥିବା ଏବଂ ଏଥିରେ ଖୋଦ୍ ଉପରିସ୍ଥ ଅଧିକାରୀ ସହଯୋଗ କରୁଥିବା ମନେ ହେଉଛି। ତୁରନ୍ତ ଅଭିଯୁକ୍ତଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ନହେଲେ ଜିଲ୍ଲା ଏସପିଙ୍କ କାର୍ଯ୍ୟାଳୟରେ ଧାରଣା ଦେବାପାଇଁ ଜିଲ୍ଲା ସାମ୍ବାଦିକ ସଂଘ ପକ୍ଷରୁ ଚେତାବନୀ ଦିଆଯାଇଛି।