Odisha Janamata : ଆମେରିକୀୟ ଗବେଷକ ଦଳଙ୍କ ମଡେଲ ବିଦ୍ୟାଳୟ ପରିଦର୍ଶନ |

ଆମେରିକୀୟ ଗବେଷକ ଦଳଙ୍କ ମଡେଲ ବିଦ୍ୟାଳୟ ପରିଦର୍ଶନ |

22-Dec-2025

ଆମେରିକୀୟ ଗବେଷକ ଦଳଙ୍କ ମଡେଲ୍ ବିଦ୍ୟାଳୟ ପରିଦର୍ଶନ : ଜିଲ୍ଲା ଶିକ୍ଷା ଓ ପ୍ରଶିକ୍ଷଣ ପ୍ରତିଷ୍ଠାନରେ ଆୟୋଜିତ ସମୀକ୍ଷା ବୈଠକରେ ପ୍ରାଥମିକ ଶିକ୍ଷା ସମ୍ପର୍କୀତ ଆଲୋଚନା

ଜାତୀୟ ଶିକ୍ଷା ନୀତି ଆଧାରରେ ପରିଚାଳିତ ପ୍ରାଥମିକ ଶିକ୍ଷା କ୍ରମରେ ମୌଳିକ ସାକ୍ଷରତା ସଂଖ୍ୟାଜ୍ଞାନର କାର୍ଯ୍ୟକାରିତା, ବିଦ୍ୟାଳୟ ସ୍ତରରେ ଶିଶୁ ବାଟିକାରୁ ଅଷ୍ଟମ ଶ୍ରେଣୀ ପର୍ଯ୍ୟନ୍ତ ଛାତ୍ରଛାତ୍ରୀମାନଙ୍କୁ ନେଇ ପରୀକ୍ଷା ମୂଳକ ଭାବେ ବହୁବିଧ କାର୍ଯ୍ୟକ୍ରମରୁ କିଭଳି ସୁଫଳ ମିଳୁଛି, ସେ ନେଇ ୟୁନାଇଟେଡ ଷ୍ଟେଟ ଅଫ୍ ଆମେରିକାର ଦୁଇଗୋଟି ସ୍ୱତନ୍ତ୍ର ଦଳ ଖଲ୍ଲିକୋଟ ବ୍ଲକ ଅଧୀନସ୍ଥ ଦୁଇଗୋଟି ମଡେଲ ବିଦ୍ୟାଳୟ ପରିଦର୍ଶନ କରିଛନ୍ତି । ଛାତ୍ରଛାତ୍ରୀମାନଙ୍କ ପଠନ ଦକ୍ଷତା, ନିୟମିତତା, ଶିକ୍ଷଣ ସାମଗ୍ରୀର ବହୁଳ ବ୍ୟବହାର, ଅଭିନବ ଶିକ୍ଷଣ ଶୈଳୀ ଆଦି ଅନେକ ଦିଗ ସମ୍ପର୍କରେ ଗବେଷଣାତ୍ମକ ତଥ୍ୟ ସଂଗ୍ରହ କରିଥିଲେ । ଉଭୟ ଟିମର ସଦସ୍ୟ ସଦସ୍ୟା ବ୍ଲକ୍ ଅନ୍ତର୍ଗତ କହ୍ନେଇପୁର କ୍ଲଷ୍ଟରର ମାଣିକ୍ୟପୁର ଏବଂ ପତଳା କ୍ଲଷ୍ଟରର ପଣ୍ଡିତ ଗାଁ ବିଦ୍ୟାଳୟ ଭ୍ରମଣ କରି ଖଲ୍ଲିକୋଟ ବ୍ଲକ୍ ଗୋଷ୍ଠୀ ଶିକ୍ଷା ଅଧିକାରୀ ଶ୍ରୀଯୁକ୍ତ ସତ୍ୟନାରାୟଣ ଦାସଙ୍କ ସହିତ ଆଲୋଚନା କରିଥିଲେ । ଜର୍ଜ ଟାଉନ ବିଶ୍ୱବିଦ୍ୟାଳୟ, ୟୁ. ଏସ୍ .ଏ. ର ଗବେଷକ ପ୍ରଫେସର ଜିସ୍ନୁ ଦାସ ଏବଂ ତାଙ୍କ ଟିମର ରୁବି ଫ୍ରେଜର-ଡାଲବି, ଆଭା କାରୋଲିନା ଲଙ୍ଗବେନ୍, ଦାସ୍ ନିଖିଲେଶ ଧୁଲଧୋୟା ପ୍ରମୁଖ ଏଥିରେ ସାମିଲ ହୋଇ ବହୁ ଉପାଦେୟ ତଥ୍ୟ ଆହରଣ କରିଥିଲେ । ସି ଏସ୍ ଏଫର ନିର୍ଦ୍ଦେଶକ ଡକ୍ଟର ପାର୍ଥଜିତ୍ ଦାସ, ସହ ନିର୍ଦ୍ଦେଶକ ଅମରଜିତ୍ ଜେନା, ରାଜ୍ୟ ସ୍ତରୀୟ ନେତୃ ସ୍ଥାନୀୟ କର୍ମକର୍ତ୍ତା ସୁସ୍ମିତ ବିଶ୍ୱାସ, ମିସ୍ ସେହଲତ ଜୋସ, ବରିଷ୍ଠ ପ୍ରକଳ୍ପ ପରିଚାଳିକା ଚାନ୍ଦିନୀ କାର୍ଲା ପ୍ରମୁଖ ଟିମରେ ନିୟୋଜିତ ହୋଇଥିଲେ । ଛାତ୍ରଛାତ୍ରୀମାନଙ୍କ ସହିତ ପ୍ରତ୍ୟକ୍ଷ ଭାବ ବିନିମୟ କରି ଅତ୍ୟନ୍ତ ଆନନ୍ଦିତ ହୋଇଥିଲେ ଟିମର ଉଚ୍ଚ ପଦସ୍ଥ ଅଧିକାରୀଙ୍କ ସମେତ କର୍ମକର୍ତ୍ତାବୃନ୍ଦ । ବିଦ୍ୟାଳୟ ପରିଦର୍ଶନ ସମୟରେ କହ୍ନେଇପୁର କ୍ଲଷ୍ଟରର ସି. ଆର. ସି. ସି. ଲିପନ ପଣ୍ଡା, ପଥରା କ୍ଲଷ୍ଟରର ସି ଆର ସି ସି ପ୍ରକାଶ ଚନ୍ଦ୍ର ସେଠୀ, ଆଭାସ ସି ଆର୍ ସି ସି କୃଷ୍ଣଚନ୍ଦ୍ର ପରିଡ଼ା, କନକା କ୍ଲଷ୍ଟରର ସି ଆର ସି ସି ଡକ୍ଟର ଦ୍ବାରିକାନାଥ ମହାରଣା, ବହୁ ଶିକ୍ଷକ ଶିକ୍ଷୟିତ୍ରୀ, ବିଦ୍ୟାଳୟ ପରିଚାଳନା କମିଟି ସଦସ୍ୟ ଉପସ୍ଥିତ ଥିଲେ ।
ପରିଶେଷରେ ଜିଲ୍ଲା ଶିକ୍ଷା ଓ ପ୍ରଶିକ୍ଷଣ ପ୍ରତିଷ୍ଠାନର ଅଧ୍ୟକ୍ଷ ତଥା ବିଶିଷ୍ଟ ଶିକ୍ଷାବିତ୍ ଡକ୍ଟର ସନ୍ତୋଷ କୁମାର ପରିଡା, ଅତିରିକ୍ତ ଜିଲ୍ଲା ଶିକ୍ଷା ଅଧିକାରୀ ପ୍ରଭାତୀ ମହାପାତ୍ରଙ୍କ ସମେତ ବହୁ ଶିକ୍ଷକ ପ୍ରଶିକ୍ଷକଙ୍କ ସହିତ ଏଫ୍ ଏଲ୍ ଏନ୍ ତଥା ବିବିଧ କାର୍ଯ୍ୟକ୍ରମ ସମ୍ପର୍କରେ ସବିଶେଷ ଆଲୋଚନା କରିଥିଲେ ।