Odisha Janamata : ସଗାଧୁଆ ମାଇନର କେନାଲ କାମରେ ଦୁର୍ନୀତି ହୋଇ ଥିବାରୁ ଚାଷୀଙ୍କ ମନରେ ଅସନ୍ତୋଷ |

ସଗାଧୁଆ ମାଇନର କେନାଲ କାମରେ ଦୁର୍ନୀତି ହୋଇ ଥିବାରୁ ଚାଷୀଙ୍କ ମନରେ ଅସନ୍ତୋଷ |

30-Aug-2026

ସାଗାଧୁଆ ମାଇନର କେନାଲ କାମରେ ଦୁର୍ନୀତି, ଯଂକୋଟି ବେନୁପୁର ଗ୍ରାମରେ ଚାଷୀଙ୍କ ମଧ୍ୟରେ ଅସନ୍ତୋଷ।
ଓଡିଶା ଜନମତ, ଜଗତସିଂହପୁର
ଜ୍ୟୋତିରଞ୍ଜନ ପଟ୍ଟନାୟକ...
ଜଗତସିଂହପୁର(ନି.ପ୍ର): ଜଗତସିଂହପୁର ଅଞ୍ଚଳର ଯଂକୋଟି ବେନୁପୁର ଗ୍ରାମ ଦେଇ ଯାଇଥିବା ସାଗଧୁଆ ମାଇନର କେନାଲର ପ୍ରାୟ ୩ କିଲୋମିଟର ଅଞ୍ଚଳର ସଫେଇ ଓ ମରାମତି କାର୍ଯ୍ୟକୁ ନେଇ ଉଠିଛି ଦୁର୍ନୀତିର ଅଭିଯୋଗ। କେନାଲରେ ଆବଶ୍ୟକ ମାତ୍ରାରେ କାମ ହୋଇନଥିବା ସତ୍ତ୍ୱେ କାଗଜପତ୍ରରେ କାମ ସମ୍ପୂର୍ଣ୍ଣ ହୋଇଥିବା ଦର୍ଶାଯାଇଥିବା ନେଇ ସ୍ଥାନୀୟ ଲୋକ ଓ ଚାଷୀମାନେ ପ୍ରଶ୍ନ ଉଠାଇଛନ୍ତି।
ସ୍ଥାନୀୟ ଲୋକ ମାନଙ୍କ ଅଭିଯୋଗ ଅନୁଯାୟୀ ସାଗାଧୁଆ ମାଇନର କେନାଲ ଉପରେ ଚାଷୀଙ୍କ ଜମିକୁ ଜଳ ଯୋଗାଣ ହୋଇଥାଏ। କେନାଲରେ ପଟୁ, ଦଳ ଓ ଅନାବନା ଗଛଲତା ସବୁ ଜମି ରହିବା ସହ ଅନେକ ସ୍ଥାନରେ କେନାଲର ଅବସ୍ଥା ଆହୁରି ଶୋଚନୀୟ ହୋଇପଡ଼ିଛି। ଏଭଳି ସ୍ଥିତିରେ କେନାଲ ସଫେଇ ଓ ମରାମତି ପାଇଁ ସରକାରୀ ଅର୍ଥ ଖର୍ଚ୍ଚ ହୋଇଥିଲେ ମଧ୍ୟ ତାହାର ସୁଫଳ ଚାଷୀଙ୍କୁ ମିଳୁନଥିବା ଅଭିଯୋଗ ହୋଇଛି।
ପ୍ରାୟ ୩ କିଲୋମିଟର ଲମ୍ବା ଏହି ମାଇନର କେନାଲର ବିଭିନ୍ନ ସ୍ଥାନରେ କାମର ମାନ ଓ ପରିମାଣକୁ ନେଇ ସ୍ଥାନୀୟମାନେ ସନ୍ଦେହ ପ୍ରକାଶ କରିଛନ୍ତି। ଯେତିକି ଅର୍ଥରେ କାମ ହେବା କଥା, ସେହି ଅନୁପାତରେ କାମ ହୋଇଛି କି ନାହିଁ, କେତେ ମାଟି ଉଠାଯାଇଛି, କେତେ ପରିମାଣରେ ସଫେଇ କରାଯାଇଛି ଏବଂ କାମର ମାପଚୁପ କିପରି ହୋଇଛି ଘଟଣା ସବୁକୁ ନେଇ ପ୍ରଶ୍ନ ଉଠିଛି।ଚାଷୀମାନଙ୍କ କହିବା ଅନୁଯାୟୀ, କେନାଲରେ ଠିକ୍ ଭାବେ ସଫେଇ ନହେଲେ ପାଣିର ସ୍ୱାଭାବିକ ପ୍ରବାହ ବାଧାପ୍ରାପ୍ତ ହେବ। ଫଳରେ ଶେଷ ମୁଣ୍ଡରେ ଥିବା ଚାଷ ଜମିକୁ ଆବଶ୍ୟକ ପରିମାଣର ପାଣି ପହଞ୍ଚିବା କଷ୍ଟକର ହୋଇପଡ଼ିବ। ଏହାର ସିଧାସଳଖ ପ୍ରଭାବ ଚାଷ ଓ ଚାଷୀଙ୍କ ଉପରେ ପଡ଼ିବ ବୋଲି ସେମାନେ କହିଛନ୍ତି।
ସରକାର ଚାଷୀଙ୍କୁ ଜଳସେଚନ ସୁବିଧା ଯୋଗାଇବା ପାଇଁ କେନାଲର ରକ୍ଷଣାବେକ୍ଷଣ ଓ ସଫେଇ ଉପରେ ଗୁରୁତ୍ୱ ଦେଉଥିବା ବେଳେ ଏଭଳି ଅଭିଯୋଗ ସାମ୍ନାକୁ ଆସିବା ଘଟଣାକୁ ଗୁରୁତର କରିଛି। ସରକାରୀ ଅର୍ଥରେ ହେଉଥିବା ଏହି କାମରେ ସ୍ୱଚ୍ଛତା ଓ ଗୁଣାତ୍ମକ ମାନ ରକ୍ଷା କରାଯାଇଛି କି ନାହିଁ, ତାହାର ଯାଞ୍ଚ ଆବଶ୍ୟକ ବୋଲି ସ୍ଥାନୀୟ ଲୋକମାନେ ଦାବି କରିଛନ୍ତି।
ଅଭିଯୋଗର ସତ୍ୟତା ଜାଣିବା ପାଇଁ ସମ୍ପୃକ୍ତ ବିଭାଗ ପକ୍ଷରୁ କେନାଲର ସ୍ଥଳ ପରିଦର୍ଶନ କରାଯିବା ସହ ମାପଚୁପ ଓ ରେକର୍ଡ ଯାଞ୍ଚ କରାଯିବା ଆବଶ୍ୟକ। କାର୍ଯ୍ୟାଦେଶ, ଅଟକଳ ମୂଲ୍ୟ, ବିଲ୍, ମେଜରମେଣ୍ଟ ବୁକ୍ ଓ କାମର ବାସ୍ତବ ସ୍ଥିତିକୁ ତୁଳନା କରାଗଲେ ପ୍ରକୃତ ଚିତ୍ର ସାମ୍ନାକୁ ଆସିପାରିବ ବୋଲି ମତ ପ୍ରକାଶ ପାଇଛି। ଏହି ଘଟଣାରେ ଯଦି ସରକାରୀ ଅର୍ଥର ଅପବ୍ୟବହାର କିମ୍ବା କାମରେ ଅନିୟମିତତା ହୋଇଥିବା ପ୍ରମାଣିତ ହୁଏ, ତେବେ ଦାୟୀ ବ୍ୟକ୍ତି ଓ ସମ୍ପୃକ୍ତ ଠିକାଦାରଙ୍କ ବିରୋଧରେ କାର୍ଯ୍ୟାନୁଷ୍ଠାନ ସହ ଅପବ୍ୟବହୃତ ଅର୍ଥ ଆଦାୟ କରିବାକୁ ଚାଷୀମାନେ ଦାବି କରିଛନ୍ତି।
ତେବେ ଏହି ଅଭିଯୋଗ ସମ୍ପର୍କରେ ସମ୍ପୃକ୍ତ ବିଭାଗର ଅଧିକାରୀ ଓ କାର୍ଯ୍ୟ କରିଥିବା ସଂସ୍ଥା ବା ଠିକାଦାରଙ୍କ ପକ୍ଷରୁ ମତାମତ ମିଳିବା ପରେ ଘଟଣାର ପୂର୍ଣ୍ଣ ଚିତ୍ର ସ୍ପଷ୍ଟ ହୋଇପାରିବ। ଏବେ ସ୍ଥାନୀୟ ଚାଷୀ ଓ ଗ୍ରାମବାସୀ ସାଗଧୁଆ ମାଇନର କେନାଲର ୩ କିଲୋମିଟର କାମର ସ୍ୱାଧୀନ ଓ ଉଚ୍ଚସ୍ତରୀୟ ତଦନ୍ତ କରାଯାଇ ପ୍ରକୃତ ତଥ୍ୟ ସାମ୍ନାକୁ ଅଣାଯାଉ ବୋଲି କରିଛନ୍ତି ।