Odisha Janamata : ଅଭିଯୋଗ ଶୁଣିବାକୁ ଜିଲ୍ଲପାଳ ଆସୁଥିଲା ବେଳେ ରାସ୍ତା ଅବରୋଧ କଲେ ଗ୍ରାମବାସୀ ||

ଅଭିଯୋଗ ଶୁଣିବାକୁ ଜିଲ୍ଲପାଳ ଆସୁଥିଲା ବେଳେ ରାସ୍ତା ଅବରୋଧ କଲେ ଗ୍ରାମବାସୀ ||

31-Aug-2026

ଜିଲ୍ଲାପାଳଙ୍କ ଅଭିଯୋଗ ଶୁଣାଣିକୁ ଆସିବା ବେଳେ ରାସ୍ତା ଅବରୋଧ

ପାଣି ସମସ୍ୟା ନେଇ ଗରା-ମାଠିଆ ଧରି ସୀତାପୁରବାସୀଙ୍କ ପ୍ରତିବାଦ

ଓଡିଶା ଜନମତ ରାୟଗଡା, ୩୧/୦୮,

କାମେଶ୍ୱର କରକରିଆ :-----

ବର୍ଷ ବର୍ଷ ଧରି ବିଶୁଦ୍ଧ ପାନୀୟଜଳ ମିଳୁନଥିବା ଅଭିଯୋଗରେ ସୋମବାର ରାସ୍ତାକୁ ଓହ୍ଲାଇଲେ ଗ୍ରାମବାସୀ। ରାୟଗଡ଼ା ଜିଲ୍ଲା କଲ୍ୟାଣସିଂହପୁର ବ୍ଲକ ନାରାୟଣପୁର ପଞ୍ଚାୟତ ଅନ୍ତର୍ଗତ ସୀତାପୁର ଗ୍ରାମବାସୀ ଗରା, ମାଠିଆ, ବାଲଟି ଓ ଡେକଚି ଧରି କଲ୍ୟାଣସିଂହପୁର-ରାୟଗଡ଼ା ୪୫ ନମ୍ବର ରାଜ୍ୟ ରାଜପଥ ଅବରୋଧ କରି ପ୍ରତିବାଦ କରିଥିଲେ। ଫଳରେ ପ୍ରାୟ ଦେଢ଼ ଘଣ୍ଟା ଧରି ରାଜପଥରେ ଯାନବାହନ ଚଳାଚଳ ପ୍ରଭାବିତ ହୋଇଥିଲା। ସୂଚନା ଅନୁଯାୟୀ, ସୀତାପୁର ଗ୍ରାମରେ ପ୍ରାୟ ୧୫ଟି ପରିବାରର ଶହେରୁ ଅଧିକ ଲୋକ ବସବାସ କରୁଥିବା ବେଳେ ପାନୀୟଜଳ ପାଇଁ ମାତ୍ର ଦୁଇଟି ନଳକୂପ ରହିଛି। ହେଲେ ଉଭୟ ନଳକୂପରୁ ଗୋଳିଆ ଓ କାଦୁଅ ମିଶା ପାଣି ବାହାରୁଥିବା ଗ୍ରାମବାସୀ ଅଭିଯୋଗ କରିଛନ୍ତି। ଏହି ପାଣି ବ୍ୟବହାର କରି କେତେକ ଲୋକ ଅସୁସ୍ଥ ହୋଇ ଝାଡ଼ାବାନ୍ତି ଓ ଜ୍ୱରରେ ଚିକିତ୍ସିତ ହେଉଥିବା ସେମାନେ କହିଛନ୍ତି। ପାନୀୟଜଳ ସମସ୍ୟାର ସମାଧାନ ପାଇଁ ଗ୍ରାମବାସୀ ପୂର୍ବରୁ ପଞ୍ଚାୟତ କାର୍ଯ୍ୟାଳୟରେ ଅଭିଯୋଗ କରିବା ସହ ଜିଲ୍ଲାପାଳଙ୍କ ଅଭିଯୋଗ ଶୁଣାଣି ଶିବିରରେ ମଧ୍ୟ ଲିଖିତ ଭାବେ ଜଣାଇଥିବା କହିଛନ୍ତି। ହେଲେ ଏଯାଏ ସମସ୍ୟାର ସ୍ଥାୟୀ ସମାଧାନ ହୋଇନଥିବାରୁ ଆଜି ଜିଲ୍ଲାପାଳ କଲ୍ୟାଣସିଂହପୁରରେ ଅଭିଯୋଗ ଶୁଣାଣି ପାଇଁ ଆସୁଥିବା ଖବର ପାଇ ଗ୍ରାମବାସୀ ରାଜପଥ ଅବରୋଧ କରିଥିଲେ। ସୋମବାର ସକାଳ ପ୍ରାୟ ୯ଟାରୁ ଗ୍ରାମବାସୀ ରାସ୍ତା ଉପରେ ଗରା, ମାଠିଆ ଓ ବାଲଟି ରଖି ପ୍ରତିବାଦ କରିବାରୁ ରାଜପଥରେ ଯାତାୟାତ ବ୍ୟାହତ ହୋଇଥିଲା। ସାଧାରଣ ଯାତ୍ରୀଙ୍କ ସମେତ କଲେଜ ଛାତ୍ରଛାତ୍ରୀ ଓ ଅନ୍ୟ ଯାନବାହନ ଚଳାଚଳରେ ମଧ୍ୟ ବାଧା ସୃଷ୍ଟି ହୋଇଥିଲା। ଏହି ସମୟରେ କଲ୍ୟାଣସିଂହପୁରରେ ଜିଲ୍ଲାପାଳଙ୍କ ଯୁଗ୍ମ ଅଭିଯୋଗ ଶୁଣାଣି ଶିବିର ଥିବାରୁ ଜିଲ୍ଲାପାଳ ଆଶୁତୋଷ କୁଲକର୍ଣ୍ଣି ଓ ଏସ୍‌ପି ରାଜ ପ୍ରସାଦ ଉକ୍ତ ରାସ୍ତା ଦେଇ ଯାଉଥିବା ବେଳେ ରାସ୍ତା ଅବରୋଧ ସମ୍ପର୍କରେ ପୁଲିସ ଜାଣିବାକୁ ପାଇଥିଲା। ଖବର ପାଇ ସ୍ଥାନୀୟ ଥାନା ଆଇଆଇସି ଅଜିତ ପରିଡ଼ା ଘଟଣାସ୍ଥଳରେ ପହଞ୍ଚି ଗ୍ରାମବାସୀଙ୍କ ସହ ଦୀର୍ଘ ସମୟ ଧରି ଆଲୋଚନା କରି ବୁଝାସୁଝା କରିଥିଲେ। ରାସ୍ତା ଅବରୋଧ ସମୟରେ ଏସ୍‌ପି ନିଜ ଗାଡ଼ିରୁ ଓହ୍ଲାଇନଥିବା ବେଳେ ଆଇଆଇସି ଅଜିତ ପରିଡ଼ା ଆଗକୁ ଆସି ଗ୍ରାମବାସୀଙ୍କ ସହ ଆଲୋଚନା କରିଥିଲେ। ଖୁବଶୀଘ୍ର ଗ୍ରାମର ପାନୀୟଜଳ ସମସ୍ୟାର ସମାଧାନ ନେଇ ଆବଶ୍ୟକ ପଦକ୍ଷେପ ନିଆଯିବ ବୋଲି ପୁଲିସ ପକ୍ଷରୁ ପ୍ରତିଶ୍ରୁତି ଦିଆଯିବା ପରେ ଗ୍ରାମବାସୀ ରାସ୍ତାରୁ ହଟିଥିଲେ। ଏନେଇ ଉପଜିଲ୍ଲାପାଳ ରମେଶ ଚନ୍ଦ୍ର ଜେନାଙ୍କୁ ପଚାରିବାରୁ ସୀତାପୁର ଗ୍ରାମର ପାନୀୟଜଳ ସମସ୍ୟା ସମ୍ପର୍କରେ ଅବଗତ ଥିବା ଏବଂ ଯଥାଶୀଘ୍ର ଏହାର ସମାଧାନ କରାଯିବ ବୋଲି ସେ ପ୍ରତିକ୍ରିୟା ଦେଇଛନ୍ତି।ପ୍ରାୟ ଦେଢ଼ ଘଣ୍ଟାର ଅବରୋଧ ପରେ ରାଜପଥରେ ଯାନବାହନ ଚଳାଚଳ ସ୍ୱାଭାବିକ ହୋଇଥିଲା। ତେବେ ଦୀର୍ଘଦିନର ପାନୀୟଜଳ ସମସ୍ୟାର ସ୍ଥାୟୀ ସମାଧାନ ନହେଲେ ଆଗାମୀ ଦିନରେ ପୁଣି ଆନ୍ଦୋଳନକୁ ଓହ୍ଲାଇବାକୁ ପଡ଼ିବ ବୋଲି ଗ୍ରାମବାସୀ ଚେତାବନୀ ଦେଇଛନ୍ତି।