Odisha Janamata : ଜିଲ୍ଲପାଳ ଙ୍କ ଯୁଗ୍ମ ଅଭିଯୋଗ ଶୁଣାଣୀ ଶିବିର କଲ୍ୟାଣ ସିଂହପୁର ରେ ଅନୁଷ୍ଠିତ ||

ଜିଲ୍ଲପାଳ ଙ୍କ ଯୁଗ୍ମ ଅଭିଯୋଗ ଶୁଣାଣୀ ଶିବିର କଲ୍ୟାଣ ସିଂହପୁର ରେ ଅନୁଷ୍ଠିତ ||

31-Aug-2026

କଲ୍ୟାଣସିଂହପୁରରେ ଜିଲ୍ଲାପାଳଙ୍କ ଯୁଗ୍ମ ଅଭିଯୋଗ ଶୁଣାଣି ଶିବିର

୬୩ଟି ଅଭିଯୋଗର ଶୁଣାଣି, ମାଙ୍କଡ଼ ଆକ୍ରମଣରୁ ଆରମ୍ଭ କରି ଆଧାର, ପାନୀୟଜଳ ଓ ରାସ୍ତା ସମସ୍ୟା ଉଠିଲା

ଓଡିଶା ଜନମତ ରାୟଗଡା, ୩୧/୮,

କାମେଶ୍ୱର କରକରିଆ : -------

ରାୟଗଡ଼ା ଜିଲ୍ଲା କଲ୍ୟାଣସିଂହପୁର ବ୍ଲକ ସଭାଗୃହଠାରେ ରବିବାର ଜିଲ୍ଲାପାଳଙ୍କ ଯୁଗ୍ମ ଅଭିଯୋଗ ଶୁଣାଣି ଶିବିର ଅନୁଷ୍ଠିତ ହୋଇଯାଇଛି। ରାୟଗଡ଼ା ଜିଲ୍ଲାପାଳ ଆଶୁତୋଷ କୁଲକର୍ଣ୍ଣିଙ୍କ ଅଧ୍ୟକ୍ଷତାରେ ଆୟୋଜିତ ଏହି ଶୁଣାଣି ଶିବିରରେ ଅଞ୍ଚଳବାସୀ ବିଭିନ୍ନ ମୌଳିକ ସମସ୍ୟା ନେଇ ଅଭିଯୋଗ ଉପସ୍ଥାପନ କରିଥିଲେ। ଏହି ଶିବିରରେ ଜିଲ୍ଲା ଆରକ୍ଷୀ ଅଧିକ୍ଷକ ରାଜ ପ୍ରସାଦ, ଉପଜିଲ୍ଲାପାଳ ରମେଶ ଚନ୍ଦ୍ର ଜେନା, ପିଏଆଇଟିଡିଏ ଚନ୍ଦ୍ରକାନ୍ତ ମାଝୀ, ସିଡିଏମଓ ଡାକ୍ତର ବିଶ୍ୱମ୍ବର ବେହେରା, ପିଡି ଅକ୍ଷୟ କୁମାର ଖେମୁଣ୍ଡୁ, କଲ୍ୟାଣସିଂହପୁର ପଞ୍ଚାୟତ ସମିତି ଅଧ୍ୟକ୍ଷା ଅମୃତା କାଡ୍ରାକା ଏବଂ ଥାନା ଅଧିକାରୀ ଅଜିତ ପରିଡା ପ୍ରମୁଖ ମଞ୍ଚାସୀନ ରହିଥିଲେ। ଶିବିରରେ ମୋଟ ୬୩ଟି ଅଭିଯୋଗ ଗ୍ରହଣ କରାଯାଇଥିଲା। ସେଥିମଧ୍ୟରୁ ୫୨ଟି ବ୍ୟକ୍ତିଗତ ଅଭିଯୋଗ ଓ ୧୧ଟି ଗୋଷ୍ଠୀଭିତ୍ତିକ ଅଭିଯୋଗ ରହିଥିଲା। ଅଞ୍ଚଳରେ ବଢ଼ୁଥିବା ମାଙ୍କଡ଼ଙ୍କ ଉପଦ୍ରବ ଓ ଲୋକଙ୍କୁ ଆକ୍ରମଣ, ନିୟମଗିରି ଅଞ୍ଚଳର ଡଙ୍ଗରିଆ ସମ୍ପ୍ରଦାୟଙ୍କ ଆଧାର କାର୍ଡ ସମସ୍ୟା, କୃଷି ପଞ୍ଜିକରଣରେ ଅସୁବିଧା, ପାନୀୟଜଳ ସଙ୍କଟ, ରାସ୍ତା, ବିଦ୍ୟୁତ, ବାଲି, କେନାଲ ସମେତ ବିଭିନ୍ନ ମୌଳିକ ସମସ୍ୟା ନେଇ ଲୋକେ ଅଭିଯୋଗ କରିଥିଲେ। ଜିଲ୍ଲାପାଳ ଅଭିଯୋଗଗୁଡ଼ିକର ଶୁଣାଣି କରି ସମ୍ପୃକ୍ତ ବିଭାଗୀୟ ଅଧିକାରୀମାନଙ୍କୁ ସମସ୍ୟାଗୁଡ଼ିକର ଯଥାଶୀଘ୍ର ସମାଧାନ ଦିଗରେ ଆବଶ୍ୟକ ପଦକ୍ଷେପ ନେବାକୁ କହିଥିଲେ। ଶିବିରରେ ଜିଲ୍ଲାସ୍ତରୀୟ ବିଭିନ୍ନ ବିଭାଗର ଅଧିକାରୀମାନଙ୍କ ସମେତ କଲ୍ୟାଣସିଂହପୁର ବିଡିଓ ମନୀଷା ଦାସ, ତହସିଲଦାର ମାନସ ରଞ୍ଜନ ମାନସେଠ, ସହକାରୀ ଯନ୍ତ୍ରୀ କ୍ଷୀରୋଦ କଲଙ୍କ ସହ ବ୍ଲକ, ତହସିଲ ଓ ଶିଶୁ ସମନ୍ୱିତ ବିକାଶ କାର୍ଯ୍ୟାଳୟର କର୍ମଚାରୀମାନେ ଉପସ୍ଥିତ ରହି ଶିବିର ପରିଚାଳନାରେ ସହଯୋଗ କରିଥିଲେ।