Odisha Janamata : ଭକ୍ତିମୟ ପରିବେଶ ରେ ଗଣ୍ଡଳା ଗ୍ରାମରେ ମା ଗଜଲକ୍ଷ୍ମୀ ଙ୍କ ପୂଜା ଅନୁଷ୍ଠିତ |

ଭକ୍ତିମୟ ପରିବେଶ ରେ ଗଣ୍ଡଳା ଗ୍ରାମରେ ମା ଗଜଲକ୍ଷ୍ମୀ ଙ୍କ ପୂଜା ଅନୁଷ୍ଠିତ |

27-Oct-2026

ଗଣ୍ଡଳାରେ ମା’ ଗଜଲକ୍ଷ୍ମୀଙ୍କ ଆରାଧନା, ଭକ୍ତିମୟ ପରିବେଶରେ ଗ୍ରାମ

ବଡ଼ ସାହି ଓ ନୂଆ ସାହିରେ ମହାଆଡ଼ମ୍ବରରେ ପୂଜାର୍ଚ୍ଚନା; ମା’ଙ୍କ ଦର୍ଶନ ପାଇଁ ଶ୍ରଦ୍ଧାଳୁଙ୍କ ଉତ୍ସାହ

ଓଡିଶା ଜନ ମତ,ହିଞ୍ଜିଳିକାଟୁ, ୨୬/୧୦,

କୃଷ୍ ଚନ୍ଦ୍ ସାମନ୍ତର :---

ଧନ, ଧାନ୍ୟ, ଐଶ୍ୱର୍ଯ୍ୟ ଓ ସମୃଦ୍ଧିର ଦେବୀ ମା’ ଗଜଲକ୍ଷ୍ମୀଙ୍କ ଆରାଧନାରେ ଭକ୍ତିମୟ ହୋଇଉଠିଛି ଗଞ୍ଜାମ ଜିଲ୍ଲା ହିଞ୍ଜିଳିକାଟୁ ବ୍ଲକ୍‌ ଅନ୍ତର୍ଗତ ଗଣ୍ଡଳା ଗ୍ରାମ। ପବିତ୍ର କୁମାର ପୂର୍ଣ୍ଣିମା ଅବସରରେ ଗ୍ରାମର ବଡ଼ ସାହି ଓ ନୂଆ ସାହିରେ ମା’ ଗଜଲକ୍ଷ୍ମୀଙ୍କ ପୂଜା ମହାଆଡ଼ମ୍ବରରେ ଆରମ୍ଭ ହୋଇଛି। ମା’ଙ୍କ ଆଗମନକୁ ନେଇ ଗ୍ରାମରେ ଉତ୍ସବମୁଖର ପରିବେଶ ସୃଷ୍ଟି ହୋଇଥିବା ବେଳେ ଦର୍ଶନ ଓ ପୂଜାର୍ଚ୍ଚନା ପାଇଁ ଶ୍ରଦ୍ଧାଳୁଙ୍କ ମଧ୍ୟରେ ବେଶ୍‌ ଉତ୍ସାହ ପ୍ରକାଶ ପାଇଛି। ପୂଜା ଅବସରରେ ଦୁଇ ସାହିର ପୂଜାମଣ୍ଡପକୁ ଆକର୍ଷଣୀୟ ଢଙ୍ଗରେ ସଜ୍ଜିତ କରାଯାଇଛି। ମା’ଙ୍କ ମନୋହର ପ୍ରତିମା, ରଙ୍ଗବେରଙ୍ଗ ଆଲୋକମାଳା ଓ ସୁନ୍ଦର ସାଜସଜ୍ଜା ମଣ୍ଡପର ଶୋଭା ବୃଦ୍ଧି କରୁଛି। ଧୂପ, ଦୀପ, ପୁଷ୍ପ ଓ ମନ୍ତ୍ରୋଚ୍ଚାରଣରେ ପୂଜାମଣ୍ଡପର ପରିବେଶ ଆଧ୍ୟାତ୍ମିକତାରେ ପରିପୂର୍ଣ୍ଣ ହୋଇଉଠିଛି। ମା’ଙ୍କ ଦର୍ଶନ କରିବା ସହ ପରିବାରର ସୁଖଶାନ୍ତି ଓ ମଙ୍ଗଳ କାମନା କରିବାକୁ ଶ୍ରଦ୍ଧାଳୁମାନେ ମଣ୍ଡପରେ ପହଞ୍ଚୁଛନ୍ତି।
ପାରମ୍ପରିକ ବିଧିବିଧାନ ଅନୁଯାୟୀ ଆଚାର୍ଯ୍ୟ ଦୁର୍ଗାମାଧବ ପାଠୀ, ହୃଷିକେଶ ତ୍ରିପାଠୀ ଓ ସନ୍ତୋଷ ପାଢ଼ୀ, ବିଶ୍ୱଜିତ ତ୍ରିପାଠୀ ଙ୍କ ସମେତ ଅନ୍ୟ ସହଯୋଗୀ ପଣ୍ଡିତଙ୍କ ନେତୃତ୍ୱରେ ମା’ଙ୍କ ପୂଜାର୍ଚ୍ଚନା କରାଯାଇଥିଲା। ସକାଳ ୧୨ଟା ସମୟରେ ଜଳଯାତ୍ରା ଆରମ୍ଭ ହୋଇଥିବା ବେଳେ ପରେ ସୂର୍ଯ୍ୟପୂଜା, ହୋମଯଜ୍ଞ ଓ ଅନ୍ୟାନ୍ୟ ପୂଜାବିଧି ସମ୍ପନ୍ନ ହୋଇଥିଲା। ସନ୍ଧ୍ୟାରେ ମା’ଙ୍କ ଆଳତି ଓ ପ୍ରସାଦ ସେବନର ବ୍ୟବସ୍ଥା ହୋଇଥିଲା। ହିନ୍ଦୁ ଧାର୍ମିକ ପରମ୍ପରାରେ ମା’ ଗଜଲକ୍ଷ୍ମୀଙ୍କୁ ଧନ, ଧାନ୍ୟ ଓ ସମୃଦ୍ଧିର ପ୍ରତୀକ ଭାବେ ପୂଜା କରାଯାଏ। ମା’ଙ୍କ ଆଶୀର୍ବାଦରେ ପରିବାରରେ ସୁଖଶାନ୍ତି, ମଙ୍ଗଳ ଓ ସମୃଦ୍ଧି ରହିବା ନେଇ ଶ୍ରଦ୍ଧାଳୁଙ୍କ ମଧ୍ୟରେ ଗଭୀର ଆସ୍ଥା ରହିଛି। ଏହି ବିଶ୍ୱାସକୁ ନେଇ ଭକ୍ତମାନେ ମା’ଙ୍କ ନିକଟରେ ଦୀପ ଜାଳିବା ସହ ନିଜ ପରିବାର ଓ ଗ୍ରାମର ମଙ୍ଗଳ କାମନା କରୁଛନ୍ତି। ଗଣ୍ଡଳା ଗ୍ରାମରେ ଦୀର୍ଘ ବର୍ଷ ଧରି ଏହି ପୂଜା ପାଳିତ ହୋଇଆସୁଛି। ପୂଜା କମିଟି ଓ ଗ୍ରାମବାସୀଙ୍କ ମିଳିତ ସହଯୋଗରେ ପ୍ରତିବର୍ଷ ମା’ଙ୍କ ଆରାଧନା ଆୟୋଜନ କରାଯାଉଛି। ପୂଜାକୁ ସଫଳ କରିବାରେ ଗ୍ରାମବାସୀଙ୍କ ସହଯୋଗ ଓ ସାମୂହିକ ଉଦ୍ୟମ ଗ୍ରାମର ଏକତା ଓ ଭାଇଚାରାକୁ ପ୍ରତିଫଳିତ କରୁଛି। ମା’ ଗଜଲକ୍ଷ୍ମୀଙ୍କ ଆଗମନରେ ସମଗ୍ର ଗ୍ରାମରେ ଭକ୍ତି ଓ ଆଧ୍ୟାତ୍ମିକତାର ପରିବେଶ ସୃଷ୍ଟି ହୋଇଥିବା ବେଳେ ମା’ଙ୍କ ଆଶୀର୍ବାଦରେ ସମସ୍ତଙ୍କ ଜୀବନ ସୁଖ, ଶାନ୍ତି ଓ ସମୃଦ୍ଧିରେ ପରିପୂର୍ଣ୍ଣ ହେଉ ବୋଲି ଶ୍ରଦ୍ଧାଳୁମାନେ କାମନା କରିଛନ୍ତି।