Odisha Janamata : ଦାଦନ ଖଟିବାକୁ ଯାଇଥିବା ଯୁବକ ଙ୍କ ମୃତ୍ୟୁ ପରେ, ଶବ ମଧ୍ୟ ପହଞ୍ଚି ପାରିଲା ନାହିଁ ଗାଁରେ |

ଦାଦନ ଖଟିବାକୁ ଯାଇଥିବା ଯୁବକ ଙ୍କ ମୃତ୍ୟୁ ପରେ, ଶବ ମଧ୍ୟ ପହଞ୍ଚି ପାରିଲା ନାହିଁ ଗାଁରେ |

15-Sep-2026

ଦାଦନ ଖଟିବାକୁ ଯାଇ ଆ ଗା କ ଫେରିଲ ନାହି ଯୁବଜ, ମୃତ୍ୟୁ ପରେ ସେଠାରେ ହେଲା ସଂସ୍କାର |

ଗଣେଶ ପୂଜାରେ ଖଜୁରୀଗୁଡ଼ା ଗାଁରେ ଶୋକର ଛାୟା
ଓଡିଶା ଜନମତ ରାୟଗଡା,୧୪/୯ (କାମେଶ୍ୱର କରକରିଆ): ଦାଦନ ଖଟିବାକୁ ଯାଇ ଆଉ ଗାଁକୁ ଫେରିଲେ ନାହିଁ ଯୁବକ। ତାମିଲନାଡୁରେ ମୃତ୍ୟୁ ପରେ ସେଠାରେ ହିଁ ତାଙ୍କ ଶବ ସତ୍କାର କରାଯାଇଛି। ଏଭଳି ଦୁଃଖଦ ଘଟଣା ରାୟଗଡ଼ା ଜିଲ୍ଲା କଲ୍ୟାଣସିଂହପୁର ବ୍ଲକ ସୁନାଖଣ୍ଡି ପଞ୍ଚାୟତ ଖଜୁରୀଗୁଡ଼ା ଗ୍ରାମରେ ଶୋକର ଛାୟା ଖେଳାଇ ଦେଇଛି। ମୃତକ ହେଲେ ଗ୍ରାମର ରାମାରାଓ କୁଲସିକା (୪୪)। ସୂଚନା ଅନୁଯାୟୀ, ରାମାରାଓ ନିଜ ଗାଁରେ ଚାଷ କାମ ସାରି ପ୍ରାୟ ଏକ ମାସ ତଳେ ରୋଜଗାର ଆଶାରେ ତାମିଲନାଡୁର ଇରୋଡକୁ ଦାଦନ ଖଟିବାକୁ ଯାଇଥିଲେ। ସେଠାରେ କାମ କରୁଥିବା ସମୟରେ ଗତ ଶନିବାର ତାଙ୍କର ମୃତ୍ୟୁ ଘଟିଥିବା ପରିବାର ପକ୍ଷରୁ ଜଣାପଡ଼ିଛି। ତେବେ ତାଙ୍କ ମୃତ୍ୟୁର କାରଣ ଏଯାଏଁ ସ୍ପଷ୍ଟ ହୋଇନାହିଁ। ରାମାରାଓଙ୍କ ମୃତ୍ୟୁ ଖବର ଗାଁରେ ପହଞ୍ଚିବା ପରେ ପରିବାରରେ ଶୋକର ବାତାବରଣ ସୃଷ୍ଟି ହୋଇଛି। ପୁଅର ମୃତ୍ୟୁ ଖବର ଶୁଣି ବୃଦ୍ଧା ମାଆ ଭାଙ୍ଗି ପଡ଼ିଛନ୍ତି। ପୁଅକୁ ହରାଇବାର ଦୁଃଖରେ ସେ ଖାଇବା ପିଇବା ଛାଡ଼ି ଦେଇଥିବା ଏବଂ ବାରମ୍ବାର କାନ୍ଦି ପଡ଼ୁଥିବା ପରିବାର ଲୋକେ କହିଛନ୍ତି।
ଏପଟେ ଗଣେଶ ଚତୁର୍ଥୀ ଅବସରରେ ସାରା ରାଜ୍ୟ ଉତ୍ସବମୁଖର ହୋଇଥିବା ବେଳେ ରାମାରାଓଙ୍କ ମୃତ୍ୟୁ ଯୋଗୁଁ ଖଜୁରୀଗୁଡ଼ା ଗାଁରେ ଉତ୍ସବର ଖୁସି ଫିକା ପଡ଼ିଯାଇଛି। ଗାଁର ଯୁବକମାନେ ଗଣେଶ ପୂଜା ବନ୍ଦ ରଖି ଶୋକ ପ୍ରକାଶ କରିଥିବା ଜଣାପଡ଼ିଛି। ରାମାରାଓଙ୍କ ମୃତ୍ୟୁ ପରେ ତାମିଲନାଡୁର ଇରୋଡ଼ରେ ପରିବାର ପକ୍ଷରୁ ମଦନ କୁଲସିକା, ତାଉଡୁ କୁଲସିକା, ଅଜୟ କୁଲସିକା, କୈଳାସ ହୁଇକା, ନିଲାମ୍ବର କୁଲସିକା ଓ ନବେରାଓ କୁଲସିକା ପହଞ୍ଚିଥିଲେ। ସେମାନେ ପହଞ୍ଚିବା ପରେ ଇରୋଡ଼ରେ ହିଁ ରାମାରାଓଙ୍କ ଶବ ସତ୍କାର କରାଯାଇଥିବା ସୂଚନା ମିଳିଛି। ଏନେଇ ରାୟଗଡ଼ା ଜିଲ୍ଲା ଶ୍ରମ ଅଧିକାରୀ ରବୀନ୍ଦ୍ରନାଥ ତ୍ରିପାଠୀଙ୍କୁ ଯୋଗାଯୋଗ କରିବାରୁ ଇରୋଡ଼ରେ ମୃତକଙ୍କ ଶବ ସତ୍କାର ହୋଇସାରିଥିବାରୁ ତାଙ୍କ ଆଧାର କାର୍ଡ ଯାଞ୍ଚ କରାଯାଇ ସରକାରୀ ନିୟମ ଅନୁଯାୟୀ ଆବଶ୍ୟକ ସହାୟତା ପ୍ରଦାନ କରାଯିବ ବୋଲି କହିଛନ୍ତି।