Odisha Janamata : ତାଳସର ପଞ୍ଚାୟତ ଖିଡ଼ିଙ୍ଗି ଗ୍ରାମର ଆଶିଷ ଦାଦନ ଖଟିବାକୁ ଯାଇ ମୃତ୍ୟୁ |

ତାଳସର ପଞ୍ଚାୟତ ଖିଡ଼ିଙ୍ଗି ଗ୍ରାମର ଆଶିଷ ଦାଦନ ଖଟିବାକୁ ଯାଇ ମୃତ୍ୟୁ |

22-Sep-2026

କେରଳ ଠାରେ ଓଡ଼ିଆ ଦାଦନ ଶ୍ରମିକଙ୍କ ମୃତ୍ୟୁ l

ଓଡିଶା ଜନମତ, ବେଗୁନିଆପଡା ::22/09/26 :

ଭଞ୍ଜ କିଶୋର ମହାରଣା l

ଓଡିଶାରେ କାମର ଅଭାବ ଏବଂ ଦରିଦ୍ର୍ୟ ଯୋଗୁଁ ରାଜ୍ୟ ବାହାରକୁ ଦାଦନ ଖଟିବାକୁ ଯାଉଥିବା ଶ୍ରମିକ ମାନଙ୍କର ବିଭିନ୍ନ ରାଜ୍ୟରେ ଅସମୟରେ ମୃତ୍ୟ ଘଟିବା ଏକ ଗମ୍ଭୀର ସମସ୍ୟା ହୋଇରହିଛି l ସଂପ୍ରତି ବେଗୁନିଆପଡା ବ୍ଲକ ଅନ୍ତର୍ଗତ ତାଳସର ପଞ୍ଚାୟତର ଖିଡିଙ୍ଗି ଗ୍ରାମର ଅଭିମନ୍ୟୁ ପ୍ରଧାନଙ୍କ ଏଜମାତ୍ର ରୋଜଗାରିଆ ପୁଅ ଆଶିଷ ପ୍ରଧାନଙ୍କ (25) ସୁଦୂର କେରଳରେ ମୃତ୍ୟୁ ଘଟିବା ପରିବାର ତଥା ଅଞ୍ଚଳରେ ଶୋକାକୁଳ ପରିବେଶ ସୃଷ୍ଟି କରିଛି l ପ୍ରାପ୍ତ ସୂଚନାରୁ ପ୍ରକାଶ ମୃତ ଆଶିଷ ଗତ ରବିବାର ସନ୍ଧ୍ୟାରେ କେରଳର କର୍ନୁର ଜିଲ୍ଲାର କର୍ନୁର ଟାଉନ ଥାନା ଅନ୍ତର୍ଗତ ପାରାଖଣ୍ଡି ଗ୍ରାମକୁ ସାଙ୍ଗମାନଙ୍କ ସହ ଗଣେଶ ଭସାଣିରେ ଯୋଗଦେଇ ବିସର୍ଜନ ପାଇଁ ଏକ ପୋଖରୀକୁ ଯାଇଥିଲେ l ପୋଖରୀ ଗଭୀର ଥିବାରୁ ରାତ୍ର ପ୍ରାୟ 9 ବେଳେ ଦୁର୍ଭାଗ୍ୟବଶତଃ ସେଠାରେ ସେ ବୁଡ଼ିଯାଇଥଲେ l ବିସର୍ଜନ ପରେ ସାଙ୍ଗମାନେ ତାକୁ ନପାଇ ଖୋଜାଖୋଜି କରି ପୋଲିସରେ ଖବର ଦେଇଥିଲେ l ଦମକଳବାହିନୀ ଓ ପୋଲିସ ସାହାଯ୍ୟରେ ମୃତ ଦେହ ଉଦ୍ଧାର କରାଯାଇ ଶବ ବ୍ୟବଚ୍ଛେଦ କରାଯାଇଛି l ଏପଟେ ଦୁଃଖରେ ଭାଂଗିପଡି ବୃଦ୍ଧ ପିତାମାତା ପୁଅର ମୃତଦେହ ଅପେକ୍ଷାରେ ଚାହିଁବସିଛନ୍ତି l