Odisha Janamata : ବ୍ରହ୍ମପୁର ପୋଲିସ ଜିଲ୍ଲା ର କେ ନୂଆଙ୍ଗା ଥାନା ପୋଲସରା ଗ୍ରାମରେ ଚୋରି ଅଭିଯୋଗ |

ବ୍ରହ୍ମପୁର ପୋଲିସ ଜିଲ୍ଲା ର କେ ନୂଆଙ୍ଗା ଥାନା ପୋଲସରା ଗ୍ରାମରେ ଚୋରି ଅଭିଯୋଗ |

13-Mar-2026

କେ ନୂଆଙ୍ଗା ଥାନା ପୋଲସରା ଗ୍ରାମରେ ବଡ଼ ଧରଣର ଚୋରି ଅଭିଯୋଗ,

ଓଡିଶା ଜନ ମତ ବ୍ୟୁରୋ,

ବ୍ରହ୍ମପୁର ପୋଲିସ ଜିଲ୍ଲାର କେ.ନୁଆଗାଁ ଥାନା ଅନ୍ତର୍ଗତ ପୋଲସରା ଗ୍ରାମରେ ଗତକାଲି ବିଳମ୍ବିତ ରାତିରେ ଏକ ବଡ଼ ଧରଣର ଚୋରି ଘଟଣା ଘଟିଥିବା ନେଇ ଅଭିଯୋଗ ହୋଇଛି। ଗ୍ରାମର ଆସି ପଦ୍ମାଙ୍କ ଘରେ କୌଣସି ଦୁର୍ବୃତ୍ତ ପଶି ଲକ୍ଷାଧିକ ଟଙ୍କା ମୂଲ୍ୟର ସୁନା ଅଳଙ୍କାର, ରୂପା ଓ ନଗଦ ଟଙ୍କା ଚୋରି କରିନେଇଥିବା ନେଇ ସେ ଚିକିଟୀ ଫାଣ୍ଡିରେ ଲିଖିତ ଅଭିଯୋଗ କରିଥିବା ଜଣାପଡିଛି।ଅଭିଯୋଗ ଅନୁଯାୟୀ, ଆସି ପଦ୍ମାଙ୍କ ଘରେ ଚାରିଜଣ ମହିଳା ବସବାସ କରୁଛନ୍ତି। ସବୁଦିନ ପରି ଗତକାଲି ରାତିରେ ଖାଇପିଇ ପରିବାର ଲୋକେ ଘରେ ଶୋଇଥିଲେ। ପରବର୍ତ୍ତୀ ଦିନ ସକାଳେ ଉଠି ଘରର କବାଟ ଓ ଆଲମିରା ଖୋଲିବା ସମୟରେ ସେଥିରେ ରଖାଯାଇଥିବା ସୁନା, ରୂପା ଓ ନଗଦ ଟଙ୍କା ଚୋରି ହୋଇଥିବା ଦେଖି ଆଶ୍ଚର୍ଯ୍ୟଚକିତ ହୋଇଥିଲେ।ପରେ ପଦ୍ମା ଗ୍ରାମବାସୀ ଓ ଆଖପାଖ ଲୋକଙ୍କୁ ଏହି ଘଟଣା ବିଷୟରେ ସୂଚନା ଦେଇଥିଲେ। ଗ୍ରାମବାସୀ ଓ ପରିବାର ଲୋକେ ଆଖପାଖ ଅଞ୍ଚଳରେ ଖୋଜାଖୋଜି କରିଥିଲେ ମଧ୍ୟ କୌଣସି ସୁତ୍ର ମିଳିନଥିଲା। ପରେ ସେ ଚିକିଟୀ ଫାଣ୍ଡିରେ ଯାଇ ଲିଖିତ ଅଭିଯୋଗ କରିଥିଲେ।ଅଭିଯୋଗରେ ଉଲ୍ଲେଖ ଅନୁସାରେ, ଦୁର୍ବୃତ୍ତମାନେ ବାଡ଼ି ପଟର କବାଟ ଭାଙ୍ଗି ଘରେ ପ୍ରବେଶ କରିଥିଲେ ଏବଂ ଘର ଭିତରେ ଥିବା ଆଲମିରାକୁ ଭାଙ୍ଗି ସେଥିରେ ରଖାଯାଇଥିବା ପ୍ରାୟ ୩୦ ଭରି ସୁନା, ୩ ଭରି ରୂପା ଓ ପ୍ରାୟ ୧୦ ହଜାର ଟଙ୍କା ନଗଦ ଚୋରି କରିନେଇଥିବା କୁହାଯାଇଛି।ଅଭିଯୋଗ ପାଇବା ପରେ ଅପରାହ୍ନ ସମୟରେ ଚିକିଟୀ ଫାଣ୍ଡି ପୋଲିସ ସନ୍ଧାନୀ କୁକୁର ଓ ସାଇଣ୍ଟିଫିକ୍ ଟିମ୍ ସହ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଥିଲେ ଏବଂ ଘରେ ଛାନଭିନ କରିଥିବା ଦେଖିବାକୁ ମିଳିଛି।
ଏହି ସମ୍ପର୍କରେ କେ.ନୁଆଗାଁ ଥାନା ଅଧିକାରୀ ବିଶ୍ୱଜିତ ନାୟକଙ୍କ ସହ ଯୋଗାଯୋଗ କରିବାରୁ ସେ କହିଛନ୍ତି ଯେ, ଜଣେ ମହିଳା ତାଙ୍କ ଘରେ ଚୋରି ହୋଇଥିବା ନେଇ ଅଭିଯୋଗ କରିଛନ୍ତି। ଅଭିଯୋଗ ଆଧାରରେ ଏକ ମାମଲା ରୁଜୁ କରାଯାଇ ଘଟଣାର ତଦନ୍ତ ଆରମ୍ଭ କରାଯାଇଛି।