Odisha Janamata : ପୋଖରୀରେ ଗାଧୋଇଲା ବେଳେ ଗୋଡ଼ ଖସି ବୃଦ୍ଧାଙ୍କ ମୃତ୍ୟୁ |

ପୋଖରୀରେ ଗାଧୋଇଲା ବେଳେ ଗୋଡ଼ ଖସି ବୃଦ୍ଧାଙ୍କ ମୃତ୍ୟୁ |

13-Mar-2026

ପୋଖରୀରେ ଗାଧୋଇବ ବେଳ ବୁଡ଼ି ବୃଦ୍ଧାଙ୍କ ମୃତ୍ୟୁ।

*ଗାଧୋଇବା ବେଳେ ଗୋଡ଼ ଖସିଯିବାରୁ ଘଟିଲା ଅଘଟଣ।

ପୋଖରୀକୁ ଗାଧୋଇବାକୁ ଯାଇଥିବା ବେଳେ ଅସାବଧାନତା ବଶତଃ ଗୋଡ଼ ଖସିଯିବାରୁ ପାଣିରେ ବୁଡ଼ି ଜଣେ ବୃଦ୍ଧାଙ୍କ ପ୍ରାଣହାନି ଘଟିଛି।ଏଭଳି ଏକ ଶୋକାକୁଳ ପରିବେଶ ବାଲେଶ୍ଵର ଜିଲ୍ଲା ଜଳେଶ୍ଵର ବ୍ଲକ ରାଇବଣିଆ ଥାନା ଅନ୍ତର୍ଗତ ବାଗବୁଡ଼ା ଗ୍ରାମରେ ଦେଖିବାକୁ ମିଳିଛି।ମୃତକ ହେଲେ ସେହି ଗ୍ରାମର ରାମନାଥ ମହାନ୍ତଙ୍କ ପତ୍ନୀ ମୁଖ ମହାନ୍ତ (୬୫)।ସୂଚନା ମୁତାବକ,ଆଜି ସକାଳ ପ୍ରାୟ ୯ଟା ସମୟରେ ମୁଖ ମହାନ୍ତ ନିକଟସ୍ଥ ବିଲକୁ ମହୁଲ ଗୋଟାଇବା ପାଇଁ ଯାଇଥିଲେ। ମହୁଲ ସଂଗ୍ରହ ସାରି ଫେରିବା ପରେ ସେ ଶୌଚ ହେବା ସହ ଗାଧୋଇବା ପାଇଁ ଘର ନିକଟସ୍ଥ ଏକ ପୋଖରୀକୁ ଯାଇଥିଲେ। ତେବେ ପୋଖରୀ ତୁଠରେ ଗାଧୋଇବା ସମୟରେ ହଠାତ ତାଙ୍କ ଗୋଡ଼ ଖସିଯାଇଥିଲା,ଫଳରେ ସେ ସମ୍ଭାଳି ନପାରି ଗଭୀର ପାଣି ଭିତରକୁ ଚାଲିଯାଇଥିଲେ।
କିଛି ସମୟ ପରେ ପୋଖରୀ ହୁଡ଼ାରେ ଛେଳି ଚରାଉଥିବା ଜଣେ ସ୍ଥାନୀୟ ବ୍ୟକ୍ତି ବୃଦ୍ଧାଙ୍କୁ ପାଣିରେ ଭାସୁଥିବା ଦେଖି ଚିତ୍କାର କରିଥିଲେ। ଖବର ପାଇ ସ୍ଥାନୀୟ ଲୋକେ ତୁରନ୍ତ ତାଙ୍କୁ ପାଣିରୁ ଉଦ୍ଧାର କରି ହାତୀଗଡ଼ ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରକୁ ନେଇଥିଲେ।ମାତ୍ର ସେଠାରେ କାର୍ଯ୍ୟରତ ଡାକ୍ତର ତାଙ୍କୁ `ମୃତ` ଘୋଷଣା କରିଥିଲେ।ଘଟଣା ସମ୍ପର୍କରେ ଜାଣିବା ପରେ ପୋଲିସ ତଦନ୍ତ ଆରମ୍ଭ କରିଛି।ମୃତଦେହକୁ ବ୍ୟବଚ୍ଛେଦ ପାଇଁ ଜଳେଶ୍ଵର ଜିକେ ହସ୍ପିଟାଲକୁ ପଠାଯାଇଛି।ଏହି ଘଟଣା ପରେ ସ୍ଥାନୀୟ ଅଞ୍ଚଳରେ ଶୋକର ଛାୟା ଖେଳିଯାଇଛି।