Odisha Janamata : ଟ୍ରାକ୍ଟର ଧକ୍କା ରେ ମୋଟର ସାଇକେଲ ଚାଳକ ମୃତ |

ଟ୍ରାକ୍ଟର ଧକ୍କା ରେ ମୋଟର ସାଇକେଲ ଚାଳକ ମୃତ |

29-Mar-2026

ଟ୍ରାକ୍ଟର ଧକ୍କାରେ ମୋଟରସାଇକେଲ୍ ଚାଳକ ମୃତ,

ଓଡିଶା ଜନ ମତ, ବ୍ରହ୍ମପୁର, କୈଳାଶ ଚନ୍ଦ୍ର ଚୌଧୁରୀ:--

ଆଜି ଭୋର୍ ପାଞ୍ଚଟା ସମୟରେ ଜିଲିବା କାଳୀ ମନ୍ଦିର ନିକଟରେ ଏକ ଟ୍ରାକ୍ଟର ଧକ୍କାରେ ଜଣେ ମୋଟରସାଇକେଲ୍ ଚାଳକ ରାସ୍ତାରେ କଚାଡ଼ି ହୋଇ ପଡ଼ିଥିଲା I ମୋଟରସାଇକେଲ୍ ଚାଳକକୁ ସ୍ଥାନୀୟ ଲୋକେ ମୁମୁର୍ଷୁ ଅବସ୍ଥାରେ ୧୦୮ ଆମ୍ବୁଲନ୍ସରେ ଭଞ୍ଜନଗର ମେଡିକାଲ୍ ନେଉଥିବା ବେଳେ ବାଟରେ ତାର ପ୍ରାଣବାୟୁ ଉଡ଼ି ଯାଇଥିଲା I ଖବରରୁ ଜଣା ପଡ଼ିଛି ଜଗନ୍ନାଥପ୍ରସାଦ ଥାନା ଖମାର ପୋଲି ଗ୍ରାମର ସ୍ଵର୍ଗତ ସଦାଶିବ ରାଉତଙ୍କ ପୁଅ ଶିବରାମ ରାଉତ ତାର ମାମୁ ଘର ବେଲଗୁଣ୍ଠା ଥାନା ଅନ୍ତର୍ଗତ କୋକଲୁଣ୍ଡାରେ ତା ମାଆ ସୌଦାମିନୀ ରାଉତଙ୍କ ସହ ରହି ଆସୁଥିଲା I ଗତକାଲି ଶିବରାମ କିଛି ସାଙ୍ଗ ସହ ଗାଙ୍ଗପୁର ଥାନା ଅନ୍ତର୍ଗତ ଖୁକୁଣ୍ଡିଆ ଗ୍ରାମକୁ ଦଣ୍ଡନାଚ ଦେଖିବାକୁ ଯାଇଥିଲା I ଅନ୍ୟ ସାଙ୍ଗ ମାନେ ରାତିରେ ନାଚ ଦେଖି ଫେରି ଯାଇଥିବା ବେଳେ ଶିବରାମ ଭୋର୍ ଚାରିଟା ପର୍ଯ୍ୟନ୍ତ ଦେଖିଥିଲା I ଭୋର ଚାରିଟା ପରେ ଶିବରାମ ନିଜ ପେସନ୍ ପ୍ଲସ୍ ମୋଟରସାଇକେଲ୍ ଯୋଗେ ଖୁକୁଣ୍ଡିଆରୁ ଭାୟା ଜିଲିବା ଦେଇ ନିଜ ମାମୁ ଘର ଗାଆଁ କୋକଲୁଣ୍ଡା ଫେରୁଥିବା ବେଳେ ତାକୁ ଓଡି-୩୨-କେ,୧୮୫୩ ନମ୍ବର୍ ବିଶିଷ୍ଟ ଏକ ଟ୍ରାକ୍ଟର ସହ ଧକ୍କା ଦେଇଥିଲା I ଫଳରେ ଶିବରାମ ତଳେ ପଡ଼ି ଗୁରୁତର ଆହତ ହୋଇଥିବା ବେଳେ ତାକୁ ମେଡିକାଲ୍ ନିଆଯାଉଥିବା ବେଳେ ସେ ରାସ୍ତାରେ ତାଙ୍କର ମୃତ୍ୟୁ ଘଟିଛି।ଖବର ପାଇ ବେଲଗୁଣ୍ଠା ଥାନା ପୋଲିସ ଘଟଣାସ୍ଥଳରେ ପହଞ୍ଚି ଶବ ଜବତ କରି ବ୍ୟବଚ୍ଛେଦ ପାଇଁ ପଠାଇ ୧୧୯/୨୬ ଅନୁଯାୟୀ ମକଦ୍ଦମା ରୁଜୁ କରି ଦୁର୍ଘଟଣାଗ୍ରସ୍ତ ଗାଡ଼ି ଦୁଇଟିକୁ ଜବତ କରିବା ସହ ଗାଡ଼ି ଚାଳକ କୁ ଅଟକ ରଖି ଘଟଣାର ତଦନ୍ତ ଆରମ୍ଭ କରିଛନ୍ତି।