Odisha Janamata : ମହଙ୍ଗା ଦରରେ ଛାନିଆ ରାୟଗଡା ବାସୀ, ଅଣ୍ଡା ପିଆଜ ସହ ଆକାଶ ଛୁଆଁ ପନିପରିବା ||

ମହଙ୍ଗା ଦରରେ ଛାନିଆ ରାୟଗଡା ବାସୀ, ଅଣ୍ଡା ପିଆଜ ସହ ଆକାଶ ଛୁଆଁ ପନିପରିବା ||

25-Jul-2026

ଅଣ୍ଡା, ପିଆଜ ସହ ପନିପରିବା ଦର ଆକାଶଛୁଆଁ; ମହଙ୍ଗା ମାଡ଼ରେ ଛାନିଆ ରାୟଗଡ଼ାବାସୀ
( ଦୈନିକ ମଜୁରିଆଙ୍କ ପାଇଁ ରୋଷେଇ ଚଳାଇବା କଷ୍ଟକର, ବଜାରରେ ପରିବା ଯୋଗାଣ କମ୍ ଥିବାରୁ ବଢ଼ୁଛି ଦର |

ଓଡିଶା ଜନମତ ରାୟଗଡା ୨୬/୭,

କାମେଶ୍ୱର କରକରିଆ : -----

ରାୟଗଡ଼ା ଜିଲ୍ଲାରେ ଗତ କିଛି ଦିନ ମଧ୍ୟରେ ଅଣ୍ଡା, ପିଆଜ ଓ ପନିପରିବାର ଦର ଅସ୍ୱାଭାବିକ ଭାବେ ବୃଦ୍ଧି ପାଇଥିବାରୁ ସାଧାରଣ ଖାଉଟି, ବିଶେଷକରି ଦୈନିକ ମଜୁରିଆ ଓ ନିମ୍ନ ଆୟ ବର୍ଗର ପରିବାର ଗଭୀର ଚିନ୍ତାରେ ପଡ଼ିଛନ୍ତି। ସପ୍ତାହକ ମଧ୍ୟରେ କେତେକ ଅତ୍ୟାବଶ୍ୟକ ଖାଦ୍ୟ ସାମଗ୍ରୀର ଦର ପ୍ରାୟ ଦୁଇଗୁଣା ବଢ଼ିଯାଇଥିବା ଅଭିଯୋଗ ହେଉଛି। ବଜାରରେ ପରିବାର ଯୋଗାଣ ଚାହିଦା ତୁଳନାରେ କମ୍ ଥିବାରୁ ଅଧିକାଂଶ ପନିପରିବାର ଦର ବେଶ ବଢ଼ିଛି। ବର୍ତ୍ତମାନ କାଙ୍କଡ଼ କିଲୋ ପ୍ରତି ପ୍ରାୟ ୨୫୦ ଟଙ୍କା, ଭେଣ୍ଡି ୧୨୦ ଟଙ୍କା, ପୋଟଳ ୮୦ ଟଙ୍କା, କଲରା ଓ ବାଇଗଣ ୬୦ ଟଙ୍କା, ରସୁଣ ୧୫୦ ଟଙ୍କା, ସାଧାରଣ ଅଦା ୨୫୦ ଟଙ୍କା ଏବଂ ଦେଶୀ ଅଦା ୩୦୦ ଟଙ୍କା କିଲୋ ପିଛା ବିକ୍ରି ହେଉଥିବା ଜଣାପଡ଼ିଛି। ସେହିପରି ପିଆଜର ଦର କିଲୋ ପ୍ରତି ୨୦ ଟଙ୍କାରୁ ବଢ଼ି ୪୦ ଟଙ୍କାରେ ପହଞ୍ଚିଥିବା ବେଳେ ଅଣ୍ଡା ପ୍ରତିଟି ୯ ଟଙ୍କାରେ ବିକ୍ରି ହେଉଛି। ଦୈନିକ ପ୍ରାୟ ୨୫୦ ଟଙ୍କା ମଜୁରି ପାଉଥିବା ଶ୍ରମିକମାନଙ୍କ ପାଇଁ ଏଭଳି ଦରବୃଦ୍ଧି ଘରୋଇ ବଜେଟକୁ ପ୍ରଭାବିତ କରିଛି। ପୂର୍ବରୁ ୫୦୦ ଟଙ୍କାରେ ଏକ ବ୍ୟାଗ୍ ଭର୍ତ୍ତି ପରିବା କିଣି ଘରକୁ ନେଇଯାଉଥିବା ପରିବାରମାନେ ବର୍ତ୍ତମାନ ୧,୦୦୦ ଟଙ୍କା ଖର୍ଚ୍ଚ କରିଲେ ମଧ୍ୟ ପୂର୍ବ ପରି ପରିମାଣର ସାମଗ୍ରୀ କିଣିପାରୁନଥିବା କହୁଛନ୍ତି।ଖାଉଟିମାନଙ୍କ କହିବା ଅନୁସାରେ, ଦରବୃଦ୍ଧି ଯୋଗୁଁ ରୋଷେଇ ଖର୍ଚ୍ଚ ଅନେକ ବଢ଼ିଯାଇଛି। ଅତ୍ୟାବଶ୍ୟକ ଖାଦ୍ୟ ସାମଗ୍ରୀର ଦର ନିୟନ୍ତ୍ରଣ ଓ ବଜାରରେ ପର୍ଯ୍ୟାପ୍ତ ପରିମାଣରେ ପନିପରିବା ଯୋଗାଣ ସୁନିଶ୍ଚିତ କରିବାକୁ ସେମାନେ ପ୍ରଶାସନଙ୍କ ହସ୍ତକ୍ଷେପ ଦାବି କରିଛନ୍ତି।