Odisha Janamata : ବର୍ଷା ଯୋଗୁଁ ଭାଙ୍ଗିଲା ନୂଆବନ୍ଧ,, ଚାଷ ଜମି ହେଲା ବାଲିଚର |

ବର୍ଷା ଯୋଗୁଁ ଭାଙ୍ଗିଲା ନୂଆବନ୍ଧ,, ଚାଷ ଜମି ହେଲା ବାଲିଚର |

25-Aug-2026

ବାଲିଚର ପାଲଟିଲା ଚାଷଜମି, ବର୍ଷାରେ ଭାଙ୍ଗିଲା ନୂଆବନ୍ଧ |

ଓଡିଶା ଜନ ମତ,ରାୟଗଡ଼ା, ତା ୨୫/୦୮,

କାମେଶ୍ୱର କର କରିଆ :----

ରାୟଗଡ଼ା ଜିଲ୍ଲା କୋଲନରା ବ୍ଲକ କୈଳାଶପୁର ପଞ୍ଚାୟତ ସାନ ଖିଲାପଦର ଗ୍ରାମରେ ନବ ନିର୍ମିତ ବନ୍ଧର ଅଂଶ ପ୍ରଥମ ଲଗାଣ ବର୍ଷାରେ ଭାଙ୍ଗି ଯାଇଛି। ଫଳରେ ତଳମୁଣ୍ଡରେ ଥିବା ବହୁ ଚାଷଜମି ବାଲିଚର ପାଲଟି ଯାଇଛି।ଲଗାଣ ବର୍ଷାରେ ଜଳସ୍ତର ବୃଦ୍ଧି ପାଇବାରୁ ବନ୍ଧ ଭାଙ୍ଗି ପାଣି ସହ ବିପୁଳ ବାଲି ମାଟି ଚାଷଜମିକୁ ପଶିଛି। କିଛି ଦିନ ତଳେ ରୁଆ ହୋଇଥିବା ଧାନ ଫସଲ ସମ୍ପୂର୍ଣ୍ଣ ନଷ୍ଟ ହୋଇଯାଇଛି। ଅନେକ ଜମିରେ ଆଣ୍ଠୁଏ ଉଚ୍ଚର ବାଲି ଜମି ରହିଥିବାରୁ ଗିର୍ଲିପଦର ଓ ସାନ ଖିଲାପଦର ଗ୍ରାମର ଚାଷୀ ଚିନ୍ତାରେ ପଡ଼ିଛନ୍ତି।ସୂଚନା ଅନୁସାରେ ୨୦୨୩-୨୪ ଏସଏଫସି ଯୋଜନାରେ ୩ ଲକ୍ଷ ଟଙ୍କା ବ୍ୟୟରେ ଏହି ବନ୍ଧ ନିର୍ମାଣ ହୋଇଥିଲା। ନିୟମ ଅନୁସାରେ ସୂଚନା ଫଳକ ରହିବା କଥା କିନ୍ତୁ ଫଳକ ନାହିଁ। ପାଣି ନିଷ୍କାସନ ବ୍ୟବସ୍ଥା ନ କରି ନିମ୍ନମାନର କାମ ହୋଇଥିବା ଚାଷୀ ଅଭିଯୋଗ କରିଛନ୍ତି।ଜମିରୁ ବାଲି ହଟାଇବାକୁ ଅତିରିକ୍ତ ଖର୍ଚ୍ଚ ସହ ଫସଲ ନଷ୍ଟରୁ ଚାଷୀ ଆର୍ଥିକ କ୍ଷତିରେ ପଡ଼ିଛନ୍ତି। ଏ ନେଇ କନିଷ୍ଠ ଯନ୍ତ୍ରୀ ସତ୍ୟ ରଞ୍ଜନ ନାୟକ ତଦନ୍ତ କରି ରିପୋର୍ଟ ଦେବେ ବୋଲି କହିଛନ୍ତି।ବନ୍ଧ ମରାମତି, ଜମିରୁ ବାଲି ହଟା ଓ କ୍ଷତିପୂରଣ ଦାବିରେ କାମେଶ ପିର୍ବାକା, ହରିଚନ୍ଦ୍ର ପିର୍ବାକା, ନୀଳାଦ୍ରି ପୁଷିକା, ସୁରେନ୍ଦ୍ର ପୁଲାକା ପ୍ରମୁଖ ଦାବି କରିଛନ୍ତି।