Odisha Janamata : ଖଲ୍ଲିକୋଟ ରେ ପ୍ରକୃତି ସୁରକ୍ଷା ପଦଯାତ୍ରା କୁ ଉଛ୍ବସିତ ସମ୍ବର୍ଦ୍ଧନା |

ଖଲ୍ଲିକୋଟ ରେ ପ୍ରକୃତି ସୁରକ୍ଷା ପଦଯାତ୍ରା କୁ ଉଛ୍ବସିତ ସମ୍ବର୍ଦ୍ଧନା |

04-Apr-2025

ପ୍ରକୃତି ସୁରକ୍ଷା ପଦଯାତ୍ରାକୁ ଖଲ୍ଲିକୋଟରେ ଉଚ୍ଛ୍ୱସିତ ସମ୍ବର୍ଦ୍ଧନା, ପରିବେଶ ସଚେତନତା ସଭା ଆୟୋଜିତ |

ଓଡିଶା ଜନମତ, ମାଧବ ବେହେରା, ଖଲ୍ଲିକୋଟ
4/4:

ସମ୍ପ୍ରତି ପ୍ରକୃତି ତଥା ପରିବେଶ ଦିନକୁଦିନ ଅବକ୍ଷୟାଭିମୁଖୀ ହୋଇଚାଲିଥିବା ସମୟରେ ସର୍ବସାଧାରଣ ସ୍ତରରେ ଏହିଭଳି ଏକ ଯୁଗାନ୍ତକାରୀ ମହତ୍ ଚିନ୍ତାଧାରାକୁ ଆଧାର କରି ତିରିଶରୁ ଊର୍ଦ୍ଧ୍ବ ପଦଯାତ୍ରୀ "ପ୍ରକୃତି ସୁରକ୍ଷା ପଦଯାତ୍ରା" ନାମରେ ପଦଯାତ୍ରା ସୁଦୂର ମାଲକାନଗିରି ଠାରୁ ଆରମ୍ଭ କରି ୬୭୦ କିଲୋମିଟର ପୁରୀ ପର୍ଯ୍ୟନ୍ତ ଯାତ୍ରା କରୁଅଛନ୍ତି । ସେମାନେ ସକାଳେ ଖଲ୍ଲିକୋଟର ପ୍ରାକୃତିକ ସ୍ଥଳୀ ନିର୍ମଳଝର ଠାରେ ପହଞ୍ଚିଥିଲେ । ଅଗ୍ରଣୀ ସାମାଜିକ ଅନୁଷ୍ଠାନ ଡକ୍ଟର ଏ.ପି.ଜେ.ଅବଦୁଲ କଲାମ ଜନକଲ୍ୟାଣ ଚାରିଟେବୁଲ ଟ୍ରଷ୍ଟର ସଭାପତି ପୂର୍ଣ୍ଣଚନ୍ଦ୍ର ବେହେରା, ସଦସ୍ୟ/ସଦସ୍ୟା ସ୍ଥାନୀୟ ଅଞ୍ଚଳର ବହୁ ସ୍ୱେଚ୍ଛାସେବୀ, ସମାଜସେବୀ, ଶିକ୍ଷାବିତ୍, ବୁଦ୍ଧିଜୀବୀ ସର୍ବୋପରି ସର୍ବସାଧାରଣ ଜନତା ସଂକୀର୍ତ୍ତନ ମଣ୍ଡଳୀଙ୍କ ସଂକୀର୍ତ୍ତନରେ ପାଦରେ ଚାଲି ଚାଲି ବଜାର ପରିକ୍ରମା କରି ସରସ୍ଵତୀ ଶିଶୁ ବିଦ୍ୟାମନ୍ଦିର ଠାରେ ପହଞ୍ଚିଥିଲେ । ଅପରାହ୍ନରେ ସେଠାରେ ଏକ ସଭା ଆୟୋଜିତ ହୋଇଥିଲା । ଏହି ସଭାରେ ମୁଖ୍ୟ ପରିବେଶବିତ୍ ବିଜ୍ଞାନ ଓ ପ୍ରଯୁକ୍ତି ବିଦ୍ୟା, ଓଡ଼ିଶା ସରକାରଙ୍କ ପ୍ରାକ୍ତନ ନିର୍ଦ୍ଦେଶକ ଚିତ୍ତରଞ୍ଜନ ଷଡ଼ଙ୍ଗୀ, ଓଡ଼ିଶା ସ୍ୱାସ୍ଥ୍ୟ ସେବା ସଂଗଠନର ଉପସଭାପତି ଡକ୍ଟର ସ୍ମୃତି ଶେଖର ସାହୁ, ପ୍ରାକୃତିକ ଚିକିତ୍ସାବିତ୍ ଡ଼ାକ୍ତର ପ୍ରକାଶ ଚନ୍ଦ୍ର ନନ୍ଦ, ମହାରାଷ୍ଟ୍ରର ଡକ୍ଟର ଧନଞ୍ଜୟ କୁମାର, ରବୀନ୍ଦ୍ରନାଥ ଥାଟୋଇ, ମାଲକାନଗିରିର ଇ. ସୂର୍ଯ୍ୟନାରାୟଣ ପ୍ରଧାନ, ଇ. ବଳରାମ ପଣ୍ଡା, ଇ. ନେହାଲ ଗାନ୍ଧୀ, ରାଜସ୍ଥାନର ପ୍ରାକ୍ତନ ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ ଶଶିଭୂଷଣ ଦେଓଙ୍କ ସମେତ ବହୁ ବ୍ୟକ୍ତି ଏହି ପଦଯାତ୍ରାରେ ସାମିଲ ହୋଇଛନ୍ତି । ଡକ୍ଟର ଏ.ପି.ଜେ. ଜନକଲ୍ୟାଣ ଚାରିଟେବୁଲ ଟ୍ରଷ୍ଟ ତରଫରୁ ପଦଯାତ୍ରୀଙ୍କୁ ସ୍ୱାଗତ ସମ୍ବର୍ଦ୍ଧନା ପ୍ରଦାନ କରାଯାଇଥିଲା । ଆୟୋଜିତ ପରିବେଶ ସଚେତନତା ସଭାରେ ସଭାପତିତ୍ବ କରିଥିଲେ ଟ୍ରଷ୍ଟର ସଭାପତି ପୂର୍ଣ୍ଣଚନ୍ଦ୍ର ବେହେରା । ସଭାରେ ଜିଲ୍ଲା ଶିକ୍ଷା ଓ ପ୍ରଶିକ୍ଷଣ ପ୍ରତିଷ୍ଠାନ, ଗଂଜାମ, ଖଲ୍ଲିକୋଟର ଅଧ୍ୟକ୍ଷ ଡକ୍ଟର ସନ୍ତୋଷ କୁମାର ପରିଡ଼ା ମୁଖ୍ୟ ଅତିଥି, ନାଗରିକ ମଞ୍ଚର ସଭାପତି ଡାକ୍ତର ହରପ୍ରସାଦ ମହାପାତ୍ର ମୁଖ୍ୟବକ୍ତା, ବରିଷ୍ଠ ଆଇନଜୀବି ରାଜେନ୍ଦ୍ର ପ୍ରସାଦ ରଥ, ଆଇ. ଆଇ. ସି. ରମେଶ ଚନ୍ଦ୍ର ପ୍ରଧାନ, ଅତିରିକ୍ତ ତହସିଲଦାର ଅଜୟ ପ୍ରତାପ ସ୍ୱାଇଁ, ପ୍ରଧାନ ଶିକ୍ଷୟିତ୍ରୀ ମଞ୍ଜୁଳା ସାହୁ, ସାମ୍ବାଦିକ ମନମୋଦନ ସାହୁ, ଶିଶୁ ମନ୍ଦିର ସମ୍ପାଦକ ସନ୍ତୋଷ କୁମାର ମହାପାତ୍ର, ଆଇନଜୀବି ବିନାୟକ ସାହୁ, ଫରେଷ୍ଟର ସନ୍ତୋଷ କୁମାର ବେହେରା, ସି ଆର ସି ସି ଡକ୍ଟର ଦ୍ବାରିକାନାଥ ମହାରଣା ପ୍ରମୁଖ ସମ୍ମାନୀତ ଅତିଥି ଭାବେ ଯୋଗ ଦେଇ ପରିବେଶ ସୁରକ୍ଷାର, ବୃକ୍ଷ ରୋପଣ ଉପରେ ଗୁରୁତ୍ୱ, ଯନ୍ତ୍ରର ବ୍ୟବହାରକୁ ଲାଘବ କରିବା, ପ୍ରାକୃତିକ ବିପର୍ଯ୍ୟୟର ମୁକାବିଲା, ପ୍ରକୃତିର ନିୟମ ମାନିବା ଆଦି ବହୁବିଧ ଦିଗ ସମ୍ପର୍କରେ ସାରସ୍ୱତ ବକ୍ତବ୍ୟ ପ୍ରଦାନ କରିଥିଲେ । ସଭାରେ ଯୁବଗୋଷ୍ଠୀଙ୍କୁ ପ୍ରୋତ୍ସାହିତ କରାଯାଇଥିଲା । ୟୁନିସେଫର ସଦସ୍ୟା ସୁଶ୍ରୀ ନିକି ପ୍ରଧାନ ସମସ୍ତଙ୍କୁ ଧନ୍ୟବାଦ ଜ୍ଞାପନ କରିଥିଲେ ।